Read Chang Naga 2 CHOBA SHUONG 24 Bible Online

2 CHOBA SHUONG 24 - Chang Naga bible

2 CHOBA SHUONG 24

¹Haoeibü chalou shuonga Babilonbü Choba Nebukhadnezzar longkei hoba kaonyek kho shikei, hoba Jehoakimei po sem hao khangenkei, kho phaia hao ngaian hao khulimbo longkei.

²Hobaje BUNYUBOUei hao khulimbo Khaldibü dan, Siriabü dan, Moabbü dan, Ammonbü dan, hautikei hoba BUNYUBOUeibü ngüh, haoeibü khangenbü shuong hoba thuseibü shuongei joyobü tegütham, Jihuda mautila haoen hautikei.

³Maimaitham Manasseeibü shedbü haangjung haoei kümbü pendou tegü, hoba tokei haoei laobou shedbü akibü sii angtikei; aieilausi haoei shedbü akibü siiei Jerusalem shentikei.

⁴BUNYUBOUei sakkubüei ho hao ka sungngaila shanga Jihuda thükto ho loushadkei, khoei BUNYUBOUei shedbü üpbu.

⁵Tou Jehoakimei kümbü lubü kümsilei hoba haoei kümbü pendou kho Jihudabü Choba shuong Lüngbüdobü lea doan aki lo?

⁶Hibü Jehoakim haoeibü bousi shuong yoa yepbei, hoba haoeibü shou Jehoakhinei hao jeiko songdakkei.

⁷Hobaje touje Ijepbü Choba nyibou jembü kaodak ka along; aieilausi Babilonbü Chobaei Ijep shumang ka Eufrates shumang sühko Ijep Chobaeibü pendou lean kikei.

⁸Jehoakhinei songdakla khangjinei hao po anthükset kikei, hoba haoei Jerusalema lit sem songdakkei, hoba haoeibü nyu Nehusta Jerusalembü Elnathaneibü nouyangshou kikei.

⁹Hobaje bouei kümbü pendou tegütham, laobou BUNYUBOU thedanga ai amaibü ki kho haoei kümbei.

¹⁰Kho chaloua Babilonbü Choba Nebukhanezzar khangenbü shuong Jerusalem to sangshila loukei hoba sangnyu kho komlepbei.

¹¹Hobaje Babilonbü Choba Nebukhadnezzar, haoeibü khangenbü shuongei kho komlepan kijinei sangnyu khüto angkei;

¹²hoba Jihudabü Choba Jehoakhin Babilonbü Choba jungto hao hoba haoeibü nyu hoba hao khangenbü shuong, hoba haoeibü yaangenbü shuong hoba haoeibü sungphatbü mütshuong haukei, hoba haoei songdakbü po set boubüa Babilonbü Chobaei hao lapbei.

¹³Hobaje BUNYUBOUei laubü tegütham, BUNYUBOUeibü chem ka haoei nyaksinam pendou hoba Chobaeibü chema kibü nyaksinam sunglangkei, hoba Solomon Chobaei kümbü honeibü thung si phau pendou netla yeiko wapnyinkukei.

¹⁴Hobaje haoei Jerusalem pendou hoba yaangenbü pendou, hau kibü sekbülakbü pendou, khei thüngbü müt hajar an, hoba bueibü kümsilei kümbü hoba nam yaübü pendou langsenkei; kaonyeka shaleboutham tan to liman ao üpyo.

¹⁵Hobaje haoei Jehoakhin Babilon to leilangkei hoba Chobaeibü nyu hoba Chobaeibü yaksi shuong, hoba haoeibü sungphatbü mütshuong hoba kaonyeka konglebü shuong haoei Jerusalem ka Babilon to laplangkei.

¹⁶Hobaje hauki yaangkibü mütshuong pendou, khei hajar nyet hoba bueibü kümsilei kümbü hoba namyaübü hajar che, haoen pendou haukibü hoba wapyola mubü, haoen kho Babilonbü Chobaei lapan Babilon to leilangkei.

¹⁷Hobaje Babilonbü Chobaei Jehoakhineibü bou nashoubou hao jeiko Choba yeitikei, hoba haoeibü nyen Zedekia jeikukei.

¹⁸Zedekia Choba yeibü jiha hao po saoto che kikei, hoba haoei Jerusalema po anthük che songdakkei, hoba haoeibü nyu nyen Hamutal, Libnabü Jeremiaeibü nouyangshou kikei.

¹⁹Hobaje haoei Jehoakimei kümbü pendou tegütham, laobou BUNYUBOU thedanga ai amaibü kikei kho kümbei.

²⁰Aishanga BUNYUBOU khauangbü danko Jerusalem si Jihudaa hao thedang ka haoen tekan üpshongko ho loushedkei, hoba Zedekiaei Babilonbü Choba khulimbo lokei.