Read Chang Naga 2 CHOBA SHUONG 3 Bible Online

2 CHOBA SHUONG 3 - Chang Naga bible

2 CHOBA SHUONG 3

¹Jihudabü Choba Jehoshafat po anthükset boubüa, Sama- riaa Israel thüka Ahabeibü shou Jehoramei songdakla khangkei hoba po anthüknyi songdakkei.

²Haoeikei BUNYUBOU thedanga ai amai, kho kümbei; lausikei bou hoba nyu Jezebel thamje aphat; aishanga bouei küman kibü Baal saopobü thaonyu haoei apbei.

³Khei yingasikei haoei hao the kabü Nebat shou Jeroboam shabü to apetkei; hoba haoei Israel la shabü shontikei hoba kho ka hao abangen.

⁴Tou Moabbü Choba Mesha sanlon sambü che kikei, hoba haoei Israel Choba la sanlon shoushou hajar saongao hoba sanlon paang hajar saongao wi yoan kukei.

⁵Lausikei ladang Ahab haikei, Moabbü Chobaei Israel khulimbo meimeikei.

⁶Hobaje kho jiha Jehoram Choba Samaria ka haukei, hoba Israelbü pendou leishaitikei.

⁷Hobaje hao haukei hoba Jihudabü Choba Jehoshafat jungto hautiko laukei, “Moabbü Chobaei kü khu limbo meimeia, no kü yoa Moab khulimbo lason to hauasao?” Hobaje haoei laukei, “Ngo anglabü, no ai yingkeije ngokei kho ki; ngeibü mütli kaibü mütli shuong tegü, ngeibü koli kaibü koli shuong tegü ki.”

⁸Hobaje haoei laukei, “Laobou lam to sen angla?” Hobaje Joramei jongaikei, “Edom yamlamang to.”

⁹Hibü Israel Choba si Jihuda Choba, hoba Edombü Choba haukei, hoba haoen chalou nyet nyet kaiko paikei; hoba sepai dan shanga hoba haoen phai sembü meisiau shanga dei akitei.

¹⁰Hobaje Israel Chobaei laukei, “Ügütü! Aieilausi BUNYUBOUei habü Choba sem ho Moabbü Choba ik to kula liko ngaakei.”

¹¹Lausikei Jehoshafatei laukei, “BUNYUBOUeibü thuseibü che, senei hao danko BUNYUBOU to phela aki lo?” Hobaje Israelbü Choba khangenbü yoa cheei laukei, “Shafateibü shou Elisha, ao Elijaeibü youjambou kikei, hao hanei kia.”

¹²Hobaje Jehoshafatei laukei, “BUNYUBOUeibü ngüh hao yoa kia.” Hibü Israel Choba, Jehoshafat hoba Edom Choba hao jungto haukei.

¹³Hobaje Elishaei Israel Choba to laukei, “Ngei ka yoa ai kümla ki? Kabou si kanyueibü thuseibü jungto hauashi.” Hobaje Israel Chobaei laukei, “Aying, habü Choba sem ho Moabbü Choba ik to kula BUNYUBOUei ngaakei!”

¹⁴Hobaje Elishaei laukei, “Maimaitham Thükenbou BUNYUBOU, ao thedanga ngo loda, hao lang kisije, Jihuda kabü Choba Jehoshafat shanga ngei adambu tegüje, ngei ka aeto techühkhoulabü ayingsi no tehüpbhoulabü.

¹⁵Lausikei tou kü jungto chia laubü che leiba.” Hobaje ladang chia laubouei kongkin tokkei, BUNYUBOUeibü ik hao thükto lotkei.

¹⁶Hobaje haoei laukei, “BUNYUBOUei ho tegü lauda: ‘Ho pholi püngkhünei shentiashi.

¹⁷Aishanga BUNYUBOUei ho tegü lauda: Kanei yei ühüplabü ayingsi lang ühüplabü, khei yingasikei kho pholi kho deiei shenan kilabü; hoba kanei, kaneibü masu shuong hoba kaneibü shatsinam shuongei yunglabü.’

¹⁸Hobaje BUNYUBOU thedangaje ho thüngathamabü kümsilei che ong ki; haoei tokei Moabbü kaneibü ik to khümbo kulabü.

¹⁹Hobaje kanei laang ba lebü sang khümbo hoba pienan phobü sangnyu khümbo shian aplabü hoba buhek maibü kibü khümbo chengan koutilabü, hoba deikük pendou thaklabü hoba kaomai hansho kibü pendou laangei leilutilabü.”

²⁰Hobaje ngeyang lemla kubü jihsiphaia, chühashi, Edom lam nyangko to dei loukei, hoba deiei kaonyek nyakkei.

²¹Tou ladang Moabbü pendouei haoen khulimbo Choba shuong wapyola louakei dogo ditkei, haoen lolo injung thükbü ka thükae liko yoshaikei hoba thi leilanga lokei.

²²Hobaje haoen ngeyang enyu pikei hoba chanyuei dei thüka haukei hoba Moabbüei haoen thedanga dei kho sii tegü saklangtham hapbei.

²³Hobaje haoenei laukei, “Kho sii yinga; maimaitham Choba shuong liko wapyoa, hoba haoen mütpem wekoei lulueibü jenabou haitia. Hibü tou peisilei to ik shatashi!”

²⁴Hobaje ladang haoen Israelbü shaishang to loukei, Israelbü shuong meimeikei hoba Moabbü to wapyokei, hibü haoen haoen thedang ka linjung satkei; hoba haoen thedang to Moab yoa haoen haitijung khüto atkei.

²⁵Hobaje haoenei sangnyu shuong leilukukei, hoba kaomai hansho kibü yoan haoenei mütpem wekoei luluei jungbü laang sonan jinkukei hoba kho shentikei; hoba haoenei deikük pendou thaktikukei, hoba bulong maibü chengan koutikei, hoba Kir-haresetha ong laang joutian phokukei; khei yingasikei laanglao jungbü shuongei kho shijung haukei hoba khüto wapyokei.

²⁶Hobaje ladang Moabbü Chobaei hao shanga lason aeibou amaiko hapbei, kheijinei in shoubü müt saongao nyet, Edombü Choba jungto nujung atla leian haukei, lausikei haoei athüklang.

²⁷Kheijinei hao jeiko songdakla kibou hao shou jaishoubou haoei leibakei hoba Moabbü mühghaü la juokbü lembü kukei. Hobaje Israel khulimbo maangshat yaang lotkei hoba haoen hao jungka bangkei hoba jembü kaodak to ngaikei.