Read Chang Naga 2 CHOBA SHUONG 4 Bible Online

2 CHOBA SHUONG 4 - Chang Naga bible

2 CHOBA SHUONG 4

¹Tou thuseibü shuongeibü shousieibü yaksi yoa cheei Elisha to laukei, “No khangenbou kü lao haia hoba no khangenbouei BUNYUBOU to soumo hatko kikei dogo nyi ngekei, hoba kü shou müt nyi aaola lela leian haula külaoeibü matbubou louakei.”

²Hobaje Elishaei sao to laukei, “Ka shanga ngei ai kümla? Kü la lenbü ma. Kaibü chema ai ki?” Hobaje saoei laukei, “Onang thungdou che to liman kaibü samnyu chema ai aki.”

³Kheijinei haoei laukei, “Hauashi, kaibü lepbü shuong pendou ka, thungdou shuong, khei thungdou kongnyu shijo ongje ayingko lotshaiashi.”

⁴“Kheijinei no hoba ka shousi shuong chemmaang to atashi hoba kou khinngailangashi; hoba khübü thungdou pendoua yeian jinashi; hoba shenbü phai nyi sungan phoko leshi.”

⁵Hibü hao jungka sao haukei hoba sao hoba saoeibü shousi shuong kou khinngailangkei; hoba haoenei sao jungto thungdou sungbakei hoba saoei yeian jinkukei.

⁶Hobaje ladang thungdou shuong kho shenkei, saoei shou to laukei, “Tokei kü jungto thungdou che sungba.” Hobaje haoei sao to laukei, “Touje thungdou khüma.” Hobaje onang lotbü thakkei.

⁷Kheijinei sao hauan Elisha thuseibou to lenkei hoba haoei laukei, “Hauashi, hoba onang kho yaakashi, hoba kaibü sangh shemashi; hoba joubü thüka no hoba ka shousi shuong lang kishi.”

⁸Hobaje nyetche keibü sao che kishang danko Shunam to Elisha haukei, hoba saoei Elisha to shaulayungla sukeijakei. Hobaje ho tegü kikei, khei hao ladüngnei dankeiphaikei haoei khünei shaukei yungkei.

⁹Hobaje saoei lao to laukei, “Tou chühashi, sen nyangko athakko danbou ho Mühghaüeibü saopobü müt che dogo ngei chühenda.

¹⁰Setije shemjang hanbü che küm thangan kümbho, hoba khünei hao shanga shen che, khümsok che, setshang che, hoba wanthung denshang che phokukho, hoba ladang ong hao sen jungto loulaje hao khüto atlabü.”

¹¹Nyetche chalou hao khüto loukei hoba shemjang to atkei, hoba khünei haksokei.

¹²Hobaje haoei haoeibü sambü Gehazi to laukei, “Shunam sao kho ngaashi.” Hobaje ladang haoei sao kho ngabakei, hao thedanga sao lokei.

¹³Hobaje haoei Gehazi to laukei, “Tou sao to lenshi, chühashi, nyi kün shanga nongnaeko ho khonsak pendou lea. Ka shanga ai kümla? Ka shangabü Choba ayingsi sepai leiyeibü to denche lentimang sühdalao?” Hobaje saoei jongaikei, “Ngo kü mütli yoa khambü pendou kia.”

¹⁴Hobaje haoei laukei, “Khülonga sao shanga ai khamla?” Hobaje Gehaziei jongaikei, “Maimaitham saoei bousushou aki, hoba saoeibü lao baushi sina.”

¹⁵Hobaje haoei laukei, “Sao ngaashi.” Hobaje ladang sao ngabakei, sao koukhüna lokei.

¹⁶Hobaje haoei laukei, “Ho tegübü jih ladang nyibou lousühlaje, nyi bousushou che baman kiteilabü.” Hobaje saoei laukei, “Aying, ngeibü bunyubou, no Mühghaü müt, kaibü sambüsao to teye- peima!”

¹⁷Hobaje yaksanyu kho mang akongko apbei hoba Elishaei sao to lenbü tegü, nyibou po ladang kho jih sühkei, saoei bousushou che bukkei.

¹⁸Nashou kho chingan phaia hao nyetche hao bou jungto youlatbü shuong yoto koukei.

¹⁹Hobaje haoei bou to laukei, “Ngeibü khu, ngeibü khu!” Hobaje hao bouei sambü che to laukei, “Hao haonyu jungto leian hau- ashi.”

²⁰Hobaje ladang hao leian haukei, hao chajihbou sühko haonyueibü youshia setkei hoba hao haikei.

²¹Hobaje sao angkei hoba Mühghaü müteibü shena hao lengtian phokei hoba kou kapbuan satkei.

²²Hobaje saoei lao ngaan laukei, “Sanoudambo Mühghaü müt jungto ngo tongde hauan longeila kü la sambü yoka müt che gadu che yoan hautibü.”

²³Hobaje haoei laukei, “Aila no tat haula? Ho lit haanbü ayingsi Nounyetkei aying.” Hobaje saoei laukei, “Ai aying, mailabü.”

²⁴Kheijinei sao gadu chenei setkei hoba saoeibü sambü to laukei, “Hali koashi, ngei ka la alen shongko maangyangsho tepaiti.”

²⁵Hibü sao haukei hoba Mühghaü müt jungto Karmel shongh to loukei. Ladang Mühghaü mütei sao heebüa hapbei, haoei haoeibü sambü Gehazi to laukei, “Chühashi, khünei Shunam sao kho kia.

²⁶Sanoudambo tou shuokla laangjung haushi, hoba sao to laushi, ‘No maisho kia lo? Kaibü lao maisho kiakouba lo? Na maisho kia lo?’ ” Hobaje saoei jongaikei, “Maisho kia.”

²⁷Hobaje ladang sao shongh to Mühghaü müt jungto loukei, saoei haoeibü youa hatkei. Hobaje Gehaziei sao nangan apla nyangko loukei, lausikei Mühghaü mütei laukei, “Sao khei ong phokushi, aieilausi saoeibü soushou maanga maangngangko kia, hoba BUNYUBOUei kü ka huan phoakei hoba kü la alen.”

²⁸Kheijinei saoei laukei, “Ngeibü bunyubou to ngei bousushou che hikei sai? Ngo tehuonetti dogo ngei alau lo?”

²⁹Kheijinei haoei Gehazi to laukei, “Kaibü shembe kaiashi, hoba kaibü ika ngeibü julo jungashi, hoba kaibü lamnyu to hauashi, nyi müt at haüyosi hao la salem teku; hoba müt atei ka la salem kusi hao to tejongai, hoba ngeibü julo naeibü thenyeka lengtian phoshi.”

³⁰Hobaje naeibü nyuei laukei, “BUNYUBOU lang ki shongko hoba kaibü soushou lang ki shongko ngei no üpyolabü.” Hobaje hao meimeian sao phai sembei.

³¹Hobaje Gehazi haoen thedang to haukei, hoba naeibü thenyeka julo kho lengtian phokukei; lausikei ngüh ayingsi jongaibü akitei. Hibü hao to haüyola hao ngaikei hoba laukei, “Na kho apida.”

³²Hobaje ladang Elisha chem to lotkei, chühashi, nashou kho haian shena lengtian kikei.

³³Hibü hao maang to atkei, hoba haosi ham khinlepbei, hoba BUNYUBOU to welaukei.

³⁴Hobaje hao ngaikei hoba nashou thüka shingetnyu yepbei hoba haoeibü sembunga haoeibü sembung hoba haoeibü nyeka haoeibü nyek, hoba haoeibü ika haoeibü ik phokei; hoba haoei hao lolo na thüka shingetkei hoba na kho phe lematham apbei.

³⁵Kho phaia longeikei hoba chema che hau longei dogo paikei hoba hao thüka shingetnyu yepbei, hoba nashou khoei nyetnei hatshi shikei, hoba na kho nyek longkei.

³⁶Hobaje haoei Gehazi ngakei, hoba laukei, “Shunambü kho ngaashi!” Hibü haoei sao ngakei. Hobaje ladang sao hao jungto lotkei, haoei laukei, “Ka shou leian sungashi.”

³⁷Kheijinei sao atkei hoba hao junga sao kao to yanan khüpetkei, hoba saoei saoeibü shou leian sungkei hoba satkei.

³⁸Hobaje Elisha nyibou Gilgal to loukei, hoba kaonyeka mühsinou kikei, hoba thuseibü shousi shuong hao thedanga setan kikei, hoba haoei haoeibü sambü to laukei, “Thuseibü shousi shuong shanga chak yaangbü hangashi hoba shikdei laiashi.”

³⁹Hobaje müt che sek to shiksilei lamla koukei hoba yamkabü semlüh long che hapbei hoba khoka ambok neimok che shenko laman kheipakei hoba shikdei laibü chaka khübü kho yeman thungkei; aieilausi haoenei khübü kho ai yingkeije ange.

⁴⁰Hibü mütshuongei khübü kho shaula hakletkei, lausikei haoenei shik kho shaujinei haoenei ngekko laukei, “O Mühghaü müt, shikchaka haibü kia!” Hobaje haoenei kho ashauen.

⁴¹Lausikei haoei laukei, “Khülonga nyak hansho sungba” Hobaje haoei kho chaka jinkukei hoba laukei, “Mütshuong shanga haoenei shaula hakletashi.” Hobaje khünei shikchaka haoenei shaula amaibü ai akitei.

⁴²Hobaje Baal Shalishabü müt che loukei, hoba Mühghaü müt la shaangbü buhek, barli wentek saoche hoba hangi paksilengko haoeibü neimoka sungbakei. Hobaje Elishaei laukei, “Mütshuong la haoenei shaula kuashi.”

⁴³Hobaje hao khangenbouei laukei, “Ailai, ngei ho müt saongao thüka phokula?” Lausikei haoei laukei, “Mütshuong la haoenei shaula kuashi, aieilausi BUNYUBOUei hai lauda, ‘Haoenei shaulabü hoba at joulabü.’ ”

⁴⁴Hibü haoei haoen thedanga phokukei hoba haoenei kho shaukei hoba BUNYUBOUeibü ngüh tegü atje joukei.