Read Chang Naga 2 CHOBA SHUONG 5 Bible Online

2 CHOBA SHUONG 5 - Chang Naga bible

2 CHOBA SHUONG 5

¹Tou Naaman, Siria Chobaeibü sepai tan thüka lajamleibou, haoeibü bunyubou thedanga aeibou yaangbü hoba nyensang nyenhang hapbü müt che kikei; aieilausi hao danko BUNYUBOUei Siriabü la thükbü kukei. Tokei hao maangkaangbü lakjaibü che, lausikei hao im baubü müt che kikei.

²Hobaje Siriabü tan shoongjung haujinei Israel kaodak ka yaksa nashou che lang senjung loukei, hoba saoei Naamaneibü yak khangenkei.

³Hobaje saoei saoeibü jembünyu to laukei, “Samariaa kibü thuseibü yoa ong ngeibü bunyubou kei kitimang sühnyu! Khünei haoei haoeibü im maitikulabü.”

⁴Hobaje müt che haoeibü bunyubou jungto haukei hoba Israel ka loubü yaksa nashouei ai laukei kho hao la lenkei.

⁵Hobaje Siriabü Chobaei laukei, “Tou hauashi, hoba ngei Israel Choba jungto le che hautikulabü.” Hibü Naaman haukei, hoba hao yoa neisimei yoa chandinam thamchak an, hon shekel hajar lak hoba neisimei shangtüngbü an künan haukei.

⁶Hobaje haoei Israelbü Choba jungto le kho jungan loukei hoba laukei, “Ladang ho le ka jungto loulaje chühashi, ngei ngo khangenbou Naaman, nyi haoeibü im maitila ka jungto hautikei dogo ngeashi.”

⁷Hobaje ladang Israelbü Chobaei le kho wekei, haoei jembü neisimei jitnyinkei hoba laukei, “Haitila hoba lang kitila ngo mühghaü sai? Khei im baubü müt maitila kü jungto hautida lo? Lausikei daman chühashi, khei haoei lai kü to ngühsak nepla lamda, chühashi!”

⁸Lausikei ladang Mühghaü müt Elishaei Israel Chobaei haoeibü neisimei jitnyinbü ditkei, haoei Choba jungto ngühlang hautiko laukei, “Aila nyi kaibü neisimei jitnyinkei? Hao kü jungto loutiashi, hoba Israela thuseibou che kia dogo haoei ngelabü!”

⁹Hibü Naaman haoeibü koli hoba kailong yoa haukei, hoba Elishaeibü koukhüna lokei.

¹⁰Hibü Elishaei ngühlang künbü hautiko laukei, “Hauashi, hoba Jordana nyetnei sakashi hoba kaibü phe nyibou chingngailabü hoba hinseilabü.”

¹¹Lausikei Naaman khauangko satkei hoba laukei, “Chühashi, hao tükde kü jungto longan lolabü, hoba BUNYUBOU haoeibü Mühghaü nyena ngalabü hoba imbü mou kishang to haoeibü ikei jipeiko im kho maitilabü dogo dambei!

¹²Israelbü dei pendou tokei Damaska shumang shuong Apana si Farpar maibou aying lo? Ngei khübüa saklabü hoba hinseian akilep lo?” Hibü hao sepeian khauangko satkei.

¹³Hobaje haoeibü khangenbü shuong nyangko louan hao to laukei, “Abou, thuseibouei ka to kümsilei yaangbü kümla sakkusi nyi kho akümbo kilep lo? Yingsije ‘Sakashi, hoba hinseian kishi’ dogo laubü kho lai?”

¹⁴Hibü Naaman yankei hoba Mühghaü mütei laubü tegü hao lolo Jordana nyetnei shembei; hoba haoeibü phe nashou hanbü phe tegü nyibou yeikei, hoba hinseian apbei.

¹⁵Hobaje hao Mühghaü müt jungto ngaikei, hao hoba haoeibü mütshuong hao thedanga loan laukei, “Tou chühashi, ngei ngea, Israel to liman kaodak pendoua lubü Mühghaü aki; hibü tou sanoudambo kaibü samboueibü jongsak leashi.”

¹⁶Lausikei haoei laukei, “BUNYUBOU lang ki shongko, ao thedanga ngo loda, ngei ai alelabü.” Khei yingasikei Naamanei kho sungtila thungeijangeikei, lausikei haoei asunglet.

¹⁷Hobaje Naamanei laukei, “Khei ayinglonga ngei ka to sudajada no khangenbou la gadu penyi manko tham künlangtikai; aieilausi no khangenbouei BUNYUBOU to limbo tou ka jaüan juokbü lembü ayingsi haitibü lembü lubü mühghaü la akulabü.

¹⁸Ho kümaleia BUNYUBOUei no khangenbou la habü shanga amai apbushima: ladang ngeibü BUNYUBOU Rimmon chem to khünei lemla atlaje, hoba haoei ngeibü phema nonglaje, hoba ngei Rimmon chema khü- petlaje, hoba ngei ngo lolo Rimmon chema khüpetlaje!”

¹⁹Hobaje Elishaei laukei, “Haksoa hauashi.” Hibü hao hao jungka longche bangjung satkei.

²⁰Lausikei Mühghaü müt Elishaeibü khangenbou Gehaziei hao lolo laukei, “Chühashi, ngeibü bunyubouei ho Siriabou Naamaneibü ik ka haoei sungbabü asungletko ngaitia. BUNYUBOU lang kisije, ngei hao phai shilabü, hoba hao ka denche hilabü.”

²¹Hibü Gehaziei Naaman phai sembei. Hobaje ladang Naamanei hao phaito müt laangjung loubü hapbei, hao kailong ka louyenkei hoba laukei, “Pendou maisho kiakouba lo?”

²²Hobaje Gehaziei laukei, “Pendou maisho kia. Ngeibü BUNYUBOUei ngo hautiko lauda, ‘Chühashi, tou ong thuseiboueibü shou müt nyi Efraim shongh kaodak ka kü jungto louakei, sanoudambo haoen la chandinam thamchak che hoba neisimei jeiyolabü tang penyi kushi.’ ”

²³Hobaje Naamanei laukei, “He, tükde, nam chandinam thamchak penyi kho sungashi.” Hibü haoei thungeiko neisimei jeiyolabü tang penyi yoa chandinam thamchak penyi neimoka shokukei hoba khübü kho haoeibü sambü la küntian Gehazi thedangto hautikei.

²⁴Hobaje ladang hao shongh to loukei, haoei khübü kho haoeibü ik ka sungletkei hoba khübü kho chema küpjeman phokei, hoba haoei mütshuong kho ngaitikei.

²⁵Lausikei hao chem to atkei hoba haoeibü bunyubou thedanga lokei. Hobaje Elishaei hao to laukei, “Gehazi, no lae ka louda?” Hobaje haoei laukei, “No khangenbou laetokei ohau.”

²⁶Hobaje haoei hao to laukei, “Müt kho ka to haüyola haoeibü kailong ka nyibou sepeijinei kü soushou ka yoa ohau lo? Nam si neisimei sungletla hoba oliv bamang hoba semlühlaak, sanlon hoba masu, sambü, sambüsao sungletla ho jihsiphai sai?

²⁷Hibü Naamaneibü im kho ka to hoba kaibü lilabü to ponpen shanga kilabü.” Kheijinei hao Elisha jungka imthu bauan satkei.