Read Chang Naga 2 CHOBA SHUONG 6 Bible Online

2 CHOBA SHUONG 6 - Chang Naga bible

2 CHOBA SHUONG 6

¹Tou thuseibü shousi shuongei Elisha to laukei, “Tou chüh- ashi, ka phanga kün shanga kün kishang aeibou nyunyeman kia!

²Tou kün Jordan to haukho hoba khüka mütpem wekoei pangkhüm che bang sungkho hoba kün kila thüklabü lele kün shanga khünei künei kishang che kümbho.” Hobaje haoei jongaikei, “Kan hauashi.”

³Hobaje haoen yoa cheei laukei, “Sanoudaman no khangenbü shuong yoto haula maangangshima.” Hobaje haoei jongaikei, “Ngo haulabü.”

⁴Hibü hao haoen yoa haukei. Hobaje haoen Jordan to louan bu akkei.

⁵Lausikei cheei ngekkei, “Ügütü, ngeibü BUNYUBOU! Aieilausi ho mü ka lotla sungkei!”

⁶Hobaje Mühghaü müt khoei laukei, “Lanei atkei?” Hobaje haoei hao la kaoen lenkei. Hobaje haoei julou che wapan sungan khoto attikei, hoba wou kho deia phongentikei.

⁷Hobaje haoei laukei, “Nyi kho sungenashi.” Hibü haoei haoeibü ik shingan kho sungkei.

⁸Tou Siriabü Chobaei Israelbü khulimbo wapyoko kikei, hoba haoei haoeibü khangenbü shuong to ngühsong wanyoan laukei, “Ho tegü, ho tegübü kaoena ngeibü kishang kilabü.”

⁹Hobaje Mühghaü mütei Israelbü Choba jungto hautiko laukei, “Ho tegübü kaoen to adanla maangsangashi, aieilausi khüto Siriabü louyanada.”

¹⁰Hobaje Mühghaü mütei maangsangla lenbü kaoen khüto Israel Chobaei hautikei, hoba hao khünei che nyinei ong ayingko khümenkei.

¹¹Tou Siria Chobaeibü maang- pon kho kümsilei shangabü aeibou khonkukei. Hobaje haoei hao khangenbü shuong ngakei hoba haoen to laukei, “Sen yoa ao Israelbü Choba shanga ki kanei kü la alenlep lo?”

¹²Hobaje hao khangenbü shuong yoa cheei hao to laukei, “Ao aki, ngeibü bunyubou, O Choba; lausikei Israela kibü thuseibou Elishaei kaibü yepshang poba joyobü ngüh shuong Israel Choba la lenda.”

¹³Hobaje haoei laukei, “Ngei hautian hao lapoulabü lele hao lan kije hauashi hoba chühashi.” Hobaje kho hao la ngetiko laukei, “Chühashi, hao Dothana kia.”

¹⁴Khei yingsije haoei khüto koli, kailong hoba sepai tan yaangbü che hautikei hoba haoen nangnak loukei hoba sangnyu kailepbei.

¹⁵Hobaje ladang Mühghaü müt khangenbou kho enyu pikei, hoba haukei, chühashi, koli si kailong yoa sepai shuongei sangnyu kaijeman kikei. Hobaje hao khangenbouei hao to laukei, “Ügütü, ngeibü bunyubou! Seti lai kümla?”

¹⁶Haoei jongaikei, “Tehüt, aieilausi aoyou sen yoa ki, khübü kho haoen yoa kibü tokei juongbou ki.”

¹⁷Kheijinei Elishaei welaukei hoba laukei, “BUNYUBOU, ngei ka to welauda, haoei haplabü lele hao la nyek ipbuashi.” Hobaje BUNYUBOUei samboueibü nyek ipbukei hoba haoei hapbei, hoba chühashi, Elisha kaijembo koli si waneibü kailongei shongh nyakko kikei.

¹⁸Hobaje ladang haoen hao jungto louyankei, Elishaei BUNYUBOU to welaukei hoba laukei, “Ngei ka to sudajada, habü mütshuong nyek thutiashi.” Hobaje Elishaeibü ngüh tegütham haoei haoeneibü nyek thutikei.

¹⁹Kheijinei Elishaei haoen to laukei, “Ho lamnyu aying, ho sangnyu khokei aying, kü phai semashi, hoba kanei lambü müt jungto ngei kan leian haulabü.” Hobaje haoei haoen Samaria to leian haukei.

²⁰Hobaje ladang haoen Samaria to loukei, Elishaei laukei, “BUNYUBOU, habü mütshuongei haplabü lele nyi haoen la nyek ipbushima.” Hobaje BUNYUBOUei haoeneibü nyek ipbukei, hoba haoenei hapbei; hoba chühashi, haoen Samaria sangchia kikei.

²¹Hobaje haoei ladang Israel Chobaei haoen hapbei, haoei Elisha to laukei, “Ngei haoen haitikho no abou? Ngei haoen haitikho no?”

²²Hobaje haoei jongaikei, “Tou! Kaibü in si laujinei nyi aoyou thüngbou la ayeiti, haoen nyi haitilep lo? Haoen shauan yungan haoeneibü Choba jungto ngaitila shanga haoen thedanga wentek si dei phokuashi.”

²³Hobaje haoen shanga haoei lem yaangbü che lamlekei hoba haoen shauan yungan haoeneibü Choba jungto ngaikei. Khünyet ka jaüan Siriabü shuong Israel kaodak to sangshila alot.

²⁴Hobaje kho phaia Siriabü Choba Benhadadei haoeibü sepai shuong pendou leishaikei hoba angkei, hoba Samaria komlepbei.

²⁵Hobaje Samariaa mühsinou yaang longkei, hoba gadueibü khulo chenei chandinam shekel saolei lu hoba dukutuk phet thungdak phejan lei la janan chenei chandinam shekel ngao lu ayaak shongko athakko haoenei kho komlepan kikei.

²⁶Hobaje Israelbü Choba ba nyangko danjung haujinei khünei yaksa cheei hao to ngekko laukei, “Thuiashi, ngeibü bunyubou, O Choba!”

²⁷Hobaje haoei laukei, “BUNYUBOUei ka to athui longa ngei ka to laka thuila! Amshang ka ayingsi semlüh nitshang ka ngei no thuilep lo?”

²⁸Hobaje Chobaei sao to phekei, “No aiei khonkuda?” Hobaje saoei jongaikei, “Yaksanyu khoei kü to laukei, ‘Tat senei shaula kashou kuashi, hoba ngiet senei küneibü shou shaulabü.’

²⁹Hibü künei küshou thungkei hoba shaukei; hoba ngei sao to nyibounyet laukei, ‘Hao senei shaulabü lele kaibü shou kuashi;’ lausikei saoei jembü shou huan apbei!”

³⁰Ladang Chobaei yaksanyueibü ngüh khübü kho ditkei, haoei haoeibü nei jitnyinkei (tou hao ba nyangko danjung hauko kikei) hoba mütshuongei chühko kisi maang aenei haoeibü manga senounei kikei.

³¹Kheijinei haoei laukei, “Shafateibü shou Elishaeibü khu tat hao to thonan kia longa Mühghaüei kü to kho tegü, hoba amaibou kümshima!”

³²Tou Elisha haoeibü chema jaishou shuong yoa setan kikei, hoba Chobaei hao jungka ngühlang künbü che hautikei; lausikei ngühlang künbou hao jungto aloutoua, haoei jaishou shuong to laukei, “Müt haitiboueibü shou hoei lai ngeibü khu langla hautian ki kho kanei hapdalao? Pialemashi, ladang ngühlang künbou loulaje, kou kapashi, hao thedangto kou kapngailangshi; haoeibü bunyubou paibü youlangh hao phainei aki lo?”

³³Hobaje tokei haoei haoen to joyoko kijinei chühashi, ngühlang künbou hao jungto louyenkei. Hobaje Chobaei laukei, “Chühashi, ho khonsak BUNYUBOU ka ki! Ngei tokei aila BUNYUBOU shanga haiyeiko kila?”