Read Chang Naga 2 CHOBA SHUONG 7 Bible Online

2 CHOBA SHUONG 7 - Chang Naga bible

2 CHOBA SHUONG 7

¹Kheijinei Elishaei laukei, “Kanei BUNYUBOUeibü ngüh ditashi: BUNYUBOUei hai lauda, Ngiet ho jihsiphaia wennet taksi chenei shekel che lu hoba barli taksi penyia shekel chebang lu Samaria bakhüna yaklabü.”

²Kheijinei Chobaeibü leiyeibü lajamleibou, aoeibü ika Choba nongan kikei, haoei Mühghaü müt to laukei, “Chühashi, BUNYUBOUei müh koulom shuong ipbua tegükei kho thüklaminlabü sai?” Hobaje Elishaei laukei, “Chühashi, nyi kaibü nyekei kho haplabü, lausikei kho ashauoulabü.”

³Tou sangnyu bakhün to atlabü koukhüna imbü müt lei kikei, hoba haoen cheei che to laukei, “Aila sen ühaishongko hanei setla?

⁴Sen sangnyu khüto haukho lausi khünei sangnyua mühsinou kia, hoba sen khünei hailabü; hoba sen tokei hanei setkho lausi tokei sen hailabü. Hibü tou khei yingsije kaiya, hoba Siriabü sepai dan yoto atkho; haoenei seneibü langkei khümena longa sen langkei kilabü, hoba haoenei sen haitia longa sen hai ong hailabü.”

⁵Hobaje Siriabü shaishang to haula haoen langnge saoko meimeikei hoba ladang haoen Siriabü shaishang nyangko loukei, chühashi, khünei müt ao akitei.

⁶Aieilausi BUNYUBOUei Siriabü sepai tan khulimbo kailong langh si koli langh, khei sepai tan yaangbü langh che dittikei, hoba haoen cheei che to laukei, “Ditashi, Israel Chobaei sen khulimbo Hitbü Choba shuong si Ijepbü Choba shuong sen thükto chian jinkuakei.”

⁷Hibü haoen pikei hoba langnge saoko kijinei satkei hoba haoeneibü neichem, haoeneibü koli, hoba haoeneibü gadu, khei shaishang lai kikei khoyam apyokei hoba haoen khu langpangteiko satkei.

⁸Hobaje ladang imbü shuong kho shaishang nyangko loukei, haoen neichem che to atkei, hoba shaukei yungkei; hoba khüka chandinam si hon hoba neisimei sungkei hoba hauan kho huan phokei, hoba haoen longeikei, hoba neichem lubü che to atkei, hoba khokakei sungkei, hoba hauan khokei huan phokei.

⁹Kheijinei haoen cheei che to laukei, “Senei janbü akümda. Tatbü chalou ho ngühlang maibü chalou che ki, lausikei sen ngüh üangko kida; sen ngeyang lang ngeko haiteia longa, kayangei sen laphetlabü; hibü tou kaiya, sen haukho hoba Chobaeibü chema ngühlang kukho.”

¹⁰Hibü haoen louan sangnyu bakhün lombü shuong ngakei, hoba haoenei haoen to laukei: “Kün Siriabü shaishang to loukei, hoba chühashi, khünei müt che ongkei ayingsi müteibü ngüh aikei aki, lausikei koli si gadu shuong ong phenphen phoan hoba neichemkei khoyam ong kiteikei.”

¹¹Kheijinei bakou lombü danei pühnyinkei, hoba kho Choba chema ngühlang kukei.

¹²Hobaje nangnak Choba pikei, hoba haoeibü khangenbü shuong to laukei, “Tou ngei kan la Siriabüei ai kümbei lenkho! Sen mühda dogo haoenei ngekei, hibü ladang haoen sangnyu ka longlaje senei haoen lang laplabü hoba sen sangnyu to atlabü dogo daman haoen shaishang ka haoen lolo hula khongthu to haukei.”

¹³Hobaje haoeibü khangenbü yoa cheei jongaiko laukei, “Ngei ka to sudajada, sangnyua joutian phokubü koli shuong ka pemngao müt at la sungtiashi. Chühashi, hanei jouan kibü Israelbü tan pendou tegü haoen kia; haü, maubü Israelbü tan pendou tegü haoen ki. Hibü senei hautikho hoba ai yingkeije chühkho.”

¹⁴Hibü haoenei kailong penyi koli shuong thonan sungbakei, hoba Chobaei Siriabü sepai phaito hautiko laukei, “Hauashi, hoba chühashi”

¹⁵Hobaje haoen phaito haoen Jordan to haukei, hobaje chühashi, lam sünga Siriabüei haoen panteiko satjinei apbü neisimei hoba insiaubuei shenan kikei. Hobaje ngühlang künbü shuong longeikei hoba Choba to lenkei.

¹⁶Kheijinei mütshuong longkei hoba Siriabü shaishang to soyoko nuyokei. Hibü wennet taksi che shekel che lu hoba barli taksi penyi shekel che lu, BUNYUBOUeibü ngüh tegü yaakkei.

¹⁷Hobaje lajamleibou, aoeibü ika Choba nongan kikei, hao bakhün lomla haoei pienkei; hoba mütshuongei hao thüka bakhüna youei nakeiko paikei, hoba Mühghaü müt aoei Choba hao jungto louyenjinei joyokei, haoei laubü tegü hao haikei.

¹⁸Aishanga ladang Mühghaü mütei Choba to, “Ngiet ho jihsiphaia barli taksi penyi shekel che lu hoba wennet taksi che shekel chebang lu Samaria bakhüna yaklabü” dogo laukei,

¹⁹kheijinei lajamleibouei Mühghaü müt to jongaikei, “Chühashi, BUNYUBOUei müh koulom shuong ipbua tegükei kho thüklaminlabü sai?” Hobaje haoei laukei, “Chühashi, nyi kaibü nyekei kho haplabü, lausikei kho ashauoulabü.”

²⁰Kho tegü hao to haüthükkei, aieilausi mütshuongei hao thüka youei nakeiko paikei hoba hao haikei.