Read Chang Naga 2 CHOBA SHUONG 8 Bible Online

2 CHOBA SHUONG 8 - Chang Naga bible

2 CHOBA SHUONG 8

¹Tou yaksa, aoeibü shou Elishaei langngaitikei, sao to Elishaei lenko laukei, “Meimeiashi, hoba kaibü chemdang satashi hoba no lanei otla thüklaje otashi; aieilausi BUNYUBOUei mühsinou che ngaletakei hoba kho tokei po nyet kaonyek thükto loulabü.”

²Yaksanyu kho meimeikei hoba Mühghaü mütei laubü tegütham kümbei; hoba sao saoeibü chemdang yoa haukei hoba Filistiabü kaonyeka po nyet kikei.

³Hobaje po nyet boubü thonlama yaksanyu kho Filistiabü kaonyek ka longeikei; hoba saoei saoeibü chem hoba saoeibü kao shanga lenyola haukei.

⁴Tou Chobaei Mühghaü müt khangenbou Gehazi to hai joyoko kikei: “Sanoudambo Elishaei kümsilei yaangbü kümbü pendou lenbüma.”

⁵Hobaje Elishaei lai haibü langngaitikei kho Choba to lenko kijinei chühashi, yaksanyu, aoeibü shou haoei langngaitikei, saoei saoeibü chem hoba saoeibü kao shanga thenan lenkei. Hobaje Gehaziei laukei, “Ngeibü bunyubou, O Choba, yaksanyu ho hoba Elishaei langngaitibü saoeibü shou kho ho ki.”

⁶Hobaje ladang Chobaei yaksanyu to phekei, saoei hao to lenkei. Hibü Chobaei sao shanga songdakbü che pienkukei hoba laukei, “Saoei kao apyoan satbü chalou ka tat sühko sao shangabü pendou hoba kao ka longbü pendou sao la kungaiashi.”

⁷Kheijinei Elisha Damaska to loukei, hoba Siriabü Choba Benhadad shatko kikei hoba hao to ho hai laukei, “Mühghaü müt hi aeto louakei.”

⁸Hobaje Chobaei Hazael to laukei, “Kaibü ika jongsak at jungashi, hoba Mühghaü müt shuokla hauashi, hoba hao danko BUNYUBOU to pheashi: ‘Ho shatbü ka ngo maiasao’ dogo lenshi.”

⁹Hibü hao to haüyola Hazael hao yoa jongsak jungan haukei, khei Damaskaa peisilei maibü weko ka ut saonyi manko künan hao jungto loukei, hoba hao thedanga lokei hoba laukei, “Kaibü shou Siriabü Choba Benhadadei ho shatbü ka maiasao dogo pheko ngo ka jungto hautikei.”

¹⁰Hobaje Elishaei hao to laukei, “Hauashi, hoba hao to lenshi: ‘Maimaitham no mailabü;’ khei yingasikei hao hailabü dogo BUNYUBOUei kü la lena.”

¹¹Hobaje hao himou abaushongko Elishaei hao to tangko chühkei, hoba Mühghaü müt kho haapbei.

¹²Hobaje Hazaelei laukei, “BUNYUBOU, no aila haapda?” Hobaje haoei jongaikei, “Aieilausi nyi Israel shousi shuong to amaibü kümlabü dogo ngei ngekei. Haoeneibü lapheishona nyi wan sapbulabü, haoeneibü heshou shuong nyi inlouei wapettilabü, hoba haoeneibü bousu nashou hoba nashou hanbü shuong netla phoula yeitkulabü, hoba mang akongbü nyu shuong shimung nyinyetkulabü.”

¹³Hobaje Hazaelei laukei, “Lausikei no khangenbou, kei che kho ai, khei kho kümsilei yaangbü haoei kümla thüklep lo?” Hobaje Elishaei jongaikei, “No Siriabü thüka Choba yeilabü dogo BUNYUBOUei kü la lena.”

¹⁴Kheijinei hao Elisha jungka kukjung haukei, hoba haoeibü bunyu jungto loukei. Chobaei hao to laukei, “Elishaei ka to ai laukei?” Hobaje haoei jongaikei, “Haoei maimaitham no mailabü dogo laukei.”

¹⁵Lausikei nyibounyet haoei yepshang nei che sungan deia hambei hoba khoei haoeibü thenyek yuklepbukei, hoba khünei hao haikei. Hobaje Benhadad jeila Hazaelei songdakkei.

¹⁶Israelbü Choba Ahabeibü shou Joram po ngao boubüa Jihuda Choba Jehoshafateibü shou Jehoramei songdakla khangkei.

¹⁷Hao Choba yeijinei hao po khujinto nyi kikei, hoba Jerusalema haoei po set songdakkei.

¹⁸Hobaje Ahab chemdangei kümbü tegütham, haoei Israelbü Choba shuong lama paikei; aieilausi Ahabeibü nouyangshou haoei yakla lekei, hoba BUNYUBOU thedanga ai amai, kho haoei kümbei.

¹⁹Khei yingasikei haoei Dawid to haoeibü shousi shuong shanga ponpen hantin che hao la kulabü dogo thekusije Dawid nyena BUNYUBOUei Jihuda amautiku.

²⁰Hao hanga Edomei Jihuda songdakbü khulimbo meimeikei hoba haoen thüka Choba che pienkei.

²¹Kheijinei Joramei haoeibü kailong pendou hao yoa leian Zair to haukei, hoba nangnak pian haoen kailepan kibü Edombü hao hoba haoeibü kailong leibou shuongei thükkei hoba mütshuong haoen jembü neichem to satkei.

²²Hibü tat sühko Edomei Jihuda songdak khulimbo longda. Kho tegü kho jihsiphaia tham Libnaei khulimbo khangkei.

²³Hobaje joubü Jorameibü kümsilei, hoba haoei kümbü pendou Jihudabü Choba shuong Lüngbüdobü lea doan aki lo?

²⁴Hobaje Joram haoeibü bousi shuong yoa yepbei, hoba Dawid sangnyua bousi shuong yoa khünkei; hoba hao jeila hao shou Ahaziaei songdakkei.

²⁵Israelbü Choba Ahabeibü shou Joram po anthüknyi boubüa Jihudabü Choba Jorameibü shou Ahaziaei songdakla khangkei.

²⁶Ahaziaei songdakla khangjinei hao po saoto nyi kikei, hoba haoei Jerusalema po che songdakkei. Hobaje haoeibü nyu nyen Athalia Israelbü Choba Omrieibü shou kikei.

²⁷Hobaje Ahab chemdangei kümbü tegütham, haoei Ahab chemdang lamnyua paikei, hoba laobou BUNYUBOU thedanga amai, kho kümbei; aieilausi hao Ahabeibü chemdang kounyang kikei.

²⁸Hobaje Ramoth Gileada Siria Choba Hazael khulimbo Ahabeibü shou Joram yoa hao wapyola haukei, hoba Siriabüei Joram leilutikei.

²⁹Hobaje Siriabü Choba Hazael to wapyojinei Ramaa Siriabüei hao leilutibü Jezreela maitila shanga Joram Choba sepeijung ngaikei. Hobaje Jihuda Choba Jehorameibü shou Ahazia Jezereela Ahabeibü shou Joram to haüyola yankei, aieilausi hao shatko kikei.