Read Chang Naga 2 CHOBA SHUONG 9 Bible Online

2 CHOBA SHUONG 9 - Chang Naga bible

2 CHOBA SHUONG 9

¹Hobaje Elishaei thuseibü shousi shuong yo ka che ngakei hoba hao to laukei, “Kaibü shembe kaiashi, hoba ho onang thungdou kaibü ika jungan Ramoth Gilead to hauashi.

²Hobaje no ladang khüto loulaje Jehoshafat shou hoba Nimshieibü shi Jehu to chühashi hoba atan haoeibü jaisina yo ka pitiashi, hoba shemjang maangkabou to leian atashi.

³Kho phaia onang thungdou kho sungbaan kho haoeibü khua yeian jinkushi, hoba laushi, ‘BUNYUBOUei ho tegü lauda, Ngei no Israel thüka Choba pienko naangenkua.’ Khoyam kou ipan satashi, hoba phaiko tekhüp.”

⁴Hibü heshoubou thuseibou kho Ramoth Gilead to haukei.

⁵Hobaje ladang hao loukei, chühashi, sepai tan lajamleibü shuong yoa kamshaian hapbei, hoba haoei laukei, “O lajamleibou, ngei ka shanga ngühlang che kia.” Hobaje Jehuei laukei, “Kün laobou jungto?” Hobaje haoei laukei, “Ka jungto, O lajamleibou.”

⁶Hibü hao meimeikei hoba chem to atkei, hoba haoei haoeibü khua onang kho yeian jinkukei hoba hao to laukei, “Israel Mühghaü BUNYUBOUei hai lauda, Ngei no BUNYUBOUeibü mütli thüka, khei Israel thüka Choba lela naangenkua.

⁷Hobaje Jezebel ika ngo khangenbü thuseibü shuong sii hoba BUNYUBOU khangenbü pendoueibü sii phoklamlabü lele nyi Ahab kaibü BUNYUBOU chemdang shemtilabü.

⁸Aishanga Ahab chemdang khümbo maulabü, hoba ngei Ahab ka bousu shou weko hoba Israela khinlepan kibü hoba solo thua apyobü wapan aplabü.

⁹Hobaje ngei Ahab chemdang Nebateibü shou Jeroboam chemdang tegü hoba Ahijaeibü shou Baasha chemdang tegü yeitilabü.

¹⁰Hobaje Jezreel kaoa kei shuongei Jezebeleibü mang shaulabü, hoba sao khünlabü ao akilabü.” Hobaje haoei kou ipbei hoba satkei.

¹¹Kheijinei Jehu haoeibü bunyubou khangenbü shuong jungto loukei, hoba müt cheei hao to phekei, “Pendou maisho kia lo? Aila langet angbü müt kho ka jungto loukei?” Hobaje haoei haoen to laukei, “Kanei müt kho hoba haoei laubü ai kikei ngeakei.”

¹²Hobaje haoenei laukei, “Kho amlang, tou kün la lenbü.” Hobaje haoei laukei, “Hai si hai dogo haoei kü to joyoko laukei, BUNYUBOUei hai lauda, ‘Ngei no Israel thüka Choba lela naangenko piena.’ ”

¹³Kheijinei haoen mütpem wekoei panteiko haoeneibü mangyuk sungan Jehu lolabü younaka imtian phokei, hoba “Jehu Choba” dogo lauko teklaang metkei.

¹⁴Hibü Nimshieibü shou Jehoshafateibü shou Jehuei Joram khulimbo huon takkei. (Tou Joram si Israel pendouei Siria Choba Hazael khulimbo Ramoth Gilead lombo kikei.

¹⁵Lausikei Joram Chobaje haoei Siria Choba Hazael to wapyojinei Siriabüei leilutibü mou maitila shanga Jezreel to ngaian kikei.) Hobaje Jehuei laukei, “Nyi maangangbü yinga longa müt aokei Jezreela kho ngühlang lenla sangnyu khüka tesatti.”

¹⁶Hibü Jehu haoeibü kailong to angan setkei hoba Jezreel to haukei; aieilausi Joram khünei leketnyu yepan kikei. Hobaje Jihudabü Choba Ahaziaei Joram to haüyola louyenan kikei.

¹⁷Tou Jezreela lapheibü che lapheishona loan kikei, hoba Jehu loujinei haoei haoeibü sepai shuong hapbei, hoba laukei, “Tan che ngei hapda.” Hobaje Joramei laukei, “Kolia setbü müt che leian kai hoba ‘Sangmaia sai?’ dogo hao la phetiashi.”

¹⁸Hibü hao shuokla kolia müt che setan haukei, hoba laukei, “Chobaei hai lauda, ‘Sangmaia sai?’ ” Hobaje Jehuei laukei, “Nyi sangmai aila lela? No kü phaito sepeiashi.” Hobaje lapheibouei ngühlang kuko laukei, “Ngühlang kubou kho haoen junga sühlangkei, lausikei hao alongeida.”

¹⁹Kheijinei haoei nyibou müt che kolia setan hautikei, ao haoen jungto loukei hoba laukei, “Chobaei hai lauda, ‘Sangmaia sai?’ ” Hobaje Jehuei jongaikei, “Nyi sangmai aila lela? No kü phaito sepeiashi.”

²⁰Hobaje lapheibouei ngühlang kuko laukei, “Hao haoen junga sühlangkei, lausikei nyibou alongeida, hoba leiyeibü kho Nimshieibü shou Jehuei leiyeibü phatkei; aieilausi haoei maangshatei leiyeida!”

²¹Hobaje Joramei laukei, “Lamleashi.” Hobaje haoenei haoeneibü kailong lamlekei. Hobaje Israelbü Choba Joram hoba Jihudabü Choba Ahazia, lulueibü kailonga Jehu to haüyola haukei hoba Jezreelbü Nabot kaopheia hao hapbei.

²²Hobaje Joramei Jehu hapjinei haoei laukei, “Jehu, no sangmaia louda sai?” Hobaje haoei jongaikei, “Kanyu Jezebel pejapelabü hoba seibüyaübü kümsilei khütetche kian ai sangmai kienla?”

²³Hobaje Joramei haoeibü koli sepeikei hoba satkei, hoba Ahazia to laukei, “O Ahazia, ho khüpettibü kümsilei!”

²⁴Hobaje Jehuei haoeibü hau pendouei lau bühkei hoba Joram to haoeibü phakshok kanglanga kipbei hoba laujin kho haoeibü maangpon paiko atkei hoba haoeibü kailong ka atkei.

²⁵Kheijinei Jehuei haoeibü lajamleibou Bidkar to laukei, “Haoeibü mang kho sungba hoba hao Jezreelbü Naboteibü kaophei khongthua apyoshi; aieilausi seti liko haoeibü bou Ahab phainei kailonga setan haujinei lai BUNYUBOUei hao khulimbo ho ngüh lauan apyokei kho damenashi.

²⁶BUNYUBOUei lauda, ‘Maimaitham ngei miet Naboteibü sii hoba haoeibü shousi shuongeibü sii hapa, hoba ho khongthua tham ngei ka la nyibou ngaitikulabü.’ Hibü tou BUNYUBOUeibü ngüh tegütham hao sungba, hoba hao kao khünei phoyoshi.”

²⁷Ladang Jihudabü Choba Ahaziaei kho hapbei hao chem kabü bamang lam to satkei. Hobaje hao phaito Jehu semjung haukei hoba laukei, “Hao to kailonga nimnim kipashi.” Hibü Ibleam nyangko kibü Gur to angshanga haoenei hao leilutikei. Hobaje hao Megiddo to satkei, hoba khünei haikei.

²⁸Hobaje hao khangenbü shuongei hao kailong chenei Jerusalem to künan haukei, hoba Dawid sangnyua haoeibü bousi shuongeibü heea khünkei.

²⁹Ahabeibü shou Joram po anthükche boubüa Ahaziaei Jihudaa songdakla khangkei.

³⁰Ladang Jehu Jezreel to haukei, Jezebelei kho ditkei, hoba saoei nyekkhüng wia moli naangkei, hoba saoeibü khu hemaiko kümetkei, hoba koulom ka seman angtikei.

³¹Hobaje Jehu bakhün to lotjinei saoei laukei, “No Zimri, kaibü BUNYUBOU haitibou, sangmaia sai?”

³²Jehuei koulom to chühangtikei hoba laukei, “Kü aenei aoyou ki?” Hobaje sungphatbü müt nyiei semei hao to chühan yantikei.

³³Hobaje Jehuei laukei, “Sao jangan attiashi.” Hibü haoenei sao jangan attikei, hoba saoeibü sii at kümthanga, hoba at koli to phinan jinkukei, hoba haoei sao youei nakeikei.

³⁴Kheijinei hao atkei hoba shaukei yungkei hoba haoei laukei, “Shedsikhau baubü yaksa ho to chühashi, hoba sao khünashi; aieilausi sao Chobaeibü nouyangshou ki.”

³⁵Hobaje sao khünla haoen haukei, lausikei saoeibü khulo, you hoba ik to liman haoenei ai ühüp.

³⁶Haoen khüto louan Jehu to lenkei hoba haoei laukei, “Ho BUNYUBOUeibü ngüh ki, laobou haoei hao khangenbou Tishbibü Elija danko: Jezreel kaonyeka Jezebeleibü phe keiei shaulabü;

³⁷hoba Jezebeleibü mang kho Jezreel kaonyeka khongthua odsinot tegü kilabü; khei yingbüei, ‘Ho Jezebeleibü mang,’ dogo haoenei ashenlabü, dogo laukei.”