Read Chang Naga 1 LÜNGBÜDOBÜ 11 Bible Online

1 LÜNGBÜDOBÜ 11 - Chang Naga bible

1 LÜNGBÜDOBÜ 11

¹Kheijinei Israelbü pendou Hebrona Dawid jungto kamshaikei hoba laukei, “Kün kaibü lo hoba kaibü phe.

²Danbü jihaphaia, khei Saul Choba kijineikei Israelbü leian haubou hoba leian loubou kho no kikei; hoba BUNYUBOU kaibü Mühghaüei ka to lenkei, ‘No ngeibü mütli Israel sanlombou yinglabü, hoba ngeibü mütli Israel thüka no Choba lelabü.’”

³Hibü Israel jaishou pendou Hebrona BUNYUBOU thedanga theyolanyobü lekei, hoba Samuel danko BUNYUBOUeibü ngüh tegütham haoenei Israel thüka Choba lela Dawid la onang naangkukei.

⁴Hobaje Dawid hoba Israelbü pendou Jerusalem to haukei, kho Jebus, lanei Jebusbü kikei kho kaodak to haukei.

⁵Hobaje Jebusa kibü shuongei Dawid to laukei, “No hato alotlabü. Khei yingsikei Dawidei Zion lapheishon kho Dawid sangnyu lekei.”

⁶Da- widei laukei, “Aoyouei Jebusbü ngüman yeptilaje hao leiyeibü lajamleibou yeitilabü.” Hobaje Zeruiaeibü shou Joab shaang angkei, hibü hao leibou yeikei.

⁷Hobaje Dawid lapheishona kikei, hibü kho to Dawid sangnyu dogo laukei.

⁸Hobaje haoei Millo ka sangnyu kho maisho kailepbei, hoba Joabei joubü sangnyu kho kümetkei.

⁹Hobaje Dawid aei aei yaangbou la yeikei, aieilausi Thükenbou BUNYUBOU hao yoa kikei.

¹⁰Tou Dawideibü hau kibü mütshuong habü ho ki; haoenei hao la Israel pendou to liko Israel shanga BUNYUBOUeibü ngüh tegütham hoba Choba yeitila thuibü yaang hao la kukei.

¹¹Habü ho Dawideibü lakjaibü shuong lühbak ki; Hakmonbü Jashobeam, müt sem yoa kongnyubou; haoei haoeibü aubu tonenkei hoba lason chenei haoei saongao sem haitikei.

¹²Hobaje hau yaangbü müt sem yoa hao to thenbou Ahobü Dodoeibü shou Eleazar kikei.

¹³Pas Dammima Filistiabü khünei lason takshatko kijinei hao Dawid yoa kiteikei. Khünei kaoen hanbüshou che barli youshouei shenan kikei, hoba mütshuong Filistiabü ka satyokei.

¹⁴Lausikei hao sek jenyua lokei, hoba thangetkei; hoba Filistiabü haitikei, hoba BUNYUBOUei thüksimin yaangbüei haoen khümenkei.

¹⁵Ladang Filistiabü sepai tan Refaima shaian kikei, leiyeibü müt khujin yoka müt sem Adullam laangbob ka Dawid jungto laangnyu khüto louyenkei.

¹⁶Kheijinei Dawid lapheishona kikei hoba kheijinei Filistiabü kho Bethlehema kikei.

¹⁷Hobaje Dawidei waangko laukei, “Bakhün nyangko kibü Bethlehem deikhün ka kü la yunglabü dei atei kua yingma!”

¹⁸Kheijinei khübü hau kibü müt semei Filistiabü shaishang to tujung atkei, hoba bakhün nyangko kibü deikhün ka dei khukei hoba kho Dawid jungto sungbakei. Lausikei Dawidei kho ayung; haoei kho BUNYUBOU la jonkukei,

¹⁹hoba laukei, “Ngeibü Mühghaü thedanga ngei ho kümlaje anat. Habü mütshuongeibü langkeibü sii ngei yunglep lo? Aishanga haoeneibü langkei khümbo kuan haoenei kho sungbakei.” Hibü haoei kho ayung. Habü kümsilei hau yaangbü müt semei kümbei.

²⁰Tou Abishai, Joabeibü na, müt khujin yoa kongnyubou kikei. Hobaje haoei saongao sem khulimbo haoeibü aubu tonkei hoba haoen pendou haitikei, hoba müt semei tegü nyenhang sungbakei.

²¹Khujin yoa hao khuleibou kikei, hoba haoeneibü leibou yeikei; lausikei haoei sem khoje aonlang.

²²Hobaje Jehoiadaeibü shou Benaia kho Kabzeela maangkaangbü müt kümsilei yaangbü kümbü che kikei; Moaba haoei Arieleibü shou müt nyi haitikei. Tokei hao louyenkei hoba ninthu lenan kijinei püngkhüna molosaonyu che haitikei.

²³Hobaje haoei Ijepbü che haitikei, mütlou mütyaang, iknop ngao loubü Ijepbou kho haoeibü ika aubu che neitakbü jim tegü che kikei, lausikei Benaia hao jungto julo che jungan yankei, hoba Ijepboueibü ik ka aubu kho japlangkukei, hoba haoeibü aubuei hao suettikei.

²⁴Habü kümsilei ho Jehoiadaeibü shou Benaiaei kümbei hoba hau kibü sem tegü nyenhang sungbakei.

²⁵Hao khujin yoa nyenhang kikei, lausikei haoei müt sem khoje aonlang. Dawidei hao lombou shuong thüka phokukei.

²⁶Lubü hauki yaangkibü sepai shuong habü kiteikei: Joabeibü na Asahel Bethlehem ka Dodo shou Elhanan Haror ka Shammoth Pelon ka Helez Tekoa ka Ikkesh shou Ira Anathot ka Abiezer Hushat ka Sibbekai Aho ka Ilai Netofa ka Maharai Netofa ka Baana shou Heled Benjamin kabü Gibea ka Ribai shou Ithai Pirathon ka Benaia Gaash nyangkobü yomang ka Hurai Arba ka Abiel Bahurum ka Azmavet Shaalbon ka Eliaba Gizon ka Hashem Harar ka Shagee shou Jonathan Harar ka Sakhar shou Ahiam Ur shou Elifal Mekhera ka Hefer Pelon ka Ahija Garmel ka Hezro Ezbai shou Naarai Nathaneibü jaisina Joel Hagri shou Mibar Ammon ka Zelek Beeroth ka Zeruia shou Joabeibü insiaubu jungbou Naharai Ithri ka Ira Ithri ka Gareb Hitbü Uria Ahlai shou Zabad Shiza shou Adina (Hao Reuben phanga konglebou; hao yoa jembü sepai khujin thonan) Maaka shou Hanan Mithni shou Joshafat Ashter(...)