Read Chang Naga 1 LÜNGBÜDOBÜ 15 Bible Online

1 LÜNGBÜDOBÜ 15 - Chang Naga bible

1 LÜNGBÜDOBÜ 15

¹Dawidei hao shanga Dawid sangnyua chem dangkei; hoba Mühghaüeibü Saopobü Busen shanga kaoen che kümbei, hoba kho shanga neichem che dangkei.

²Kheijinei Dawidei laukei, “Levibü to liman aoeikei Mühghaü Sao- pobü Busen alenglabü, aishanga BUNYUBOUei haoen kho Mühghaüeibü Busen lengla hoba ponpen shanga hao to khangenla pienkei.”

³Hobaje BUNYUBOUeibü Busen haoei ponpen shanga lamlean kishang to jungan angla shanga Dawidei Israelbü pendou Jerusalem to yoshaitikei.

⁴Hobaje Dawidei Aroneibü shousi shuong hoba Levibü liko yoshaitikei;

⁵Kohat shousi shuong kongnyubou Uriel, hoba haoeibü jaisinasi saongaoto saoche.

⁶Merarieibü shousi shuong, haoeibü jaisianasi saoanto saoche;

⁷Gershon shousi shuong, kongnyu shuong Joel, hoba haoeibü jaisinasi saoanto khujin;

⁸Elizafaneibü shousi shuong kongnyubou Shemaia, hoba haoeibü jaisinasi saoan,

⁹Hebroneibü shousi shuong kongnyubou Eliel, hoba haoeibü jaisinasi saolei,

¹⁰Uzzieleibü shousi shuong, kongnyubou Amminadab; hoba haoeibü jaisinasi saongaoto anthük nyi.

¹¹Kheijinei Dawidei Zadok hoba Abiathar ungshedbou shu- ong, hoba Levibü Uriel, Asaia, Joel, Shemaia, Eliel, hoba Amminadab ngakei.

¹²Hobaje haoen to laukei, “Levibü chempen leiyeibü shuong kho kan ki; khei BUNYUBOU Israel Mühghaüeibü Busen kho ngei ho shanga lamlekuan kishang to kanei jungan anglabü lele kan lolo kan hoba kaneibü jaisinasi shuong saüenan kishi.

¹³Kanei püngla khangla thama kho ajungbü haangjung BUNYUBOU seneibü Mühghaü sen thükto khauang longkei, aieilausi senei songa kibü ngühkhüm tegütham anongasae.

¹⁴Hibü ungshedbou shuong hoba Levibü shuongei BUNYUBOU Israel Mühghaü saopobü Busen jungan angla haoen lolo saüenkei.

¹⁵Hobaje BUNYUBOUeibü ngüh tegütham Mosaei sakkubü tegü Levi shuongei Mühghaüeibü Busen kho haoeneibü phaka kaanga lengkei.

¹⁶Tokei Dawidei Levibü konglebü shuong to olinbü ngühlang longtila kongkin, pithung, teklaang ngühlang yaang longko chia laulabü shuong haoeneibü jaisinasi shuong pienla sakkukei.

¹⁷Hibü Levibü shuongei Joeleibü shou Heman pienkei, hoba haoeibü jaisina Berekaeibü shou Asaf, hoba haoeneibü jaisina Merarieibü shousi shuong Kushaiaeibü shou Ethan,

¹⁸hoba haoen yoa haoeibü jaisina nyiboubü lin Zekharia, Jaaziel, Shemiramot, Jehiel, Unni, Eliab, Benaia, Maaseia, Mattithia, Elifele, Mikneia, hoba koukhün lombou Obededom hoba Jeiel.

¹⁹Chia laubü Heman, Asaf, hoba Ethan haoenei chinam kanglabü;

²⁰Zekharia, Aziel, Shemiramot, Jehiel, Unni, Eliab, Maaseia, hoba Benaia, haoenei Alamot tegü, pithung metlabü.

²¹Lausikei Maatithia, Elifele, Mikneia, Obededom, Jeiel, hoba Azazia, haoenei Sheminit tegübü kongkinei leilabü.

²²Levibü yoa chia leiyeibü Kananialei chia leiyeilabü, aieilausi haoei kho ditenkei.

²³Berekia hoba Elkana Busen shanga koukhün lombü shuong kikei.

²⁴Shebania, Joshafat, Nethaniel, Amasai, Zekharia, Benaia, hoba Eliezer, ungshedbou shuongei Mühghaüeibü Busen thedanga teklaang metlabü. Obededom hoba Jehia haosi Busen shanga koukhün lombü shuong yinglabü.

²⁵Hibü Dawid hoba Israelbü jaishou shuong hoba hajar thüka lajamleibou shuong Obededomeibü chem ka BUNYUBOUeibü thebülanbü Busen jungan angla olinyoko haukei.

²⁶Hobaje BUNYUBOUeibü theyolanyobü Busen jungan haubü Levibü to Mühghaüei thuisije haoenei masu pongsu nyet hoba sanlon nyet lemla kukei.

²⁷Dawidei neisimei phembanei inyaibüei takbü lean kikei, hoba kho tegü Busen jungbü Levibü pendou chia laubü shuong, hoba chia laubü leiyeibü Kenaniaeikei neisimei lekei, hoba Dawidei phembanei ungshedbou saopobü neisimei lean kikei.

²⁸Kho tegü Israelbü pendouei BUNYUBOU to theyolanyobü Busen kho teklaang hoba kongkin thüka ngekko, pithung, tokjin, ngühlang yaang yoa künan longkei.

²⁹Hobaje BUNYUBOU to theyolanyobü Busen kho Dawid sangnyu to loujinei Sauleibü nouyangshou Maikelei koulom ka chühan litikei, hoba Dawid Choba tombolakko olinyoko hapbei; hoba saoei jembü maangpona hao la nyikukei.