Read Chang Naga 1 LÜNGBÜDOBÜ 16 Bible Online

1 LÜNGBÜDOBÜ 16 - Chang Naga bible

1 LÜNGBÜDOBÜ 16

¹Hobaje haoenei BUNYUBOUeibü Saopobü Busen jungan lotkei, hoba Dawidei kho shanga küman kibü neichem maanga phokei, hoba Mühghaü thedanga haoenei juokbü lembü hoba sangmai lembü kukei.

²Hobaje ladang Dawidei juokbü lembü si sangmai lembü kho lamlekhümbei haoei BUNYUBOU nyena mütli shuong haükukei.

³Israelbü pendou la bousu si yaksa weko la wentek che che hoba phejok che che hoba semlüh wen che che janan kukei.

⁴Tokei haoei Levibü at BUNYUBOUeibü Busen junga khangenla, nou noula, olinbü lenla, hoba BUNYUBOU Israel Mühghaü sangle pienkei.

⁵Konglebou kho Asaf hoba hao to thenbou kho Zekharia, Jeiel, Shemiramot, Jehiel, Matthithia, Eliab, Benaia, Obededom hoba Jeiel, habü ho pithung, kongkin kangbü shuong; Asafei chinam kanglabü,

⁶hoba ungshedbou Benaia hoba Jahazielei athakko Mühghaüeibü thebülanbü Sao- pobü Busen thedanga teklaang metlabü.

⁷Khünyet Dawidei shaangla Asaf hoba haoeibü jaisinasi shuong to BUNYUBOU la nyensang kubü chia laula sakkukei.

⁸O BUNYUBOU la nyensang kuashi, hao yaangenbü nyen sangashi; Mütshuong yoa haoeibü kümsilei ngetiashi.

⁹Hao la chia atkuashi, hao to nyensang chia lauashi; Haoeibü maangpanglabü kümsilei pendou lenashi!

¹⁰Hao saopobü nyena soneikangtiashi; Aoyouei BUNYUBOU lamda haoen maangpon olintiashi.

¹¹BUNYUBOU hoba haoeibü hau lamashi; athakko hao yobü lamashi.

¹²Haoeibü maangpanglabü kümsilei haoei kümbü, Haoei kümbü seikümseilei; Haoei matjem ngüh lauan litibü damenashi.

¹³Hao khangenbou Israel shousi shuong, Jakobeibü shousi shuong haoei pienbü shuong!

¹⁴Hao seneibü Mühghaü BUNYUBOU kho ki; Haoeibü matjem kaodak pendoua kia.

¹⁵Ponpen shanga haoeibü thebülanbü, Meten hajar shanga haoei sakkubü ngüh haoei amaako kia.

¹⁶Haoei Abraham to theyolanyobü, Thonsithak akibü theyolanyobü Isak la thekukei.

¹⁷Laobou haoei Jakob la takletbü ngühkhüm tegü, hoba Israel to thon akibü theyolanyobü tegü khangngaitikei.

¹⁸Hobaje laukei, “Kan la Kanan kaodak, kaneibü phejan phetphan che tegü ngei kulabü.”

¹⁹Ladang haoeneibü lühbaka shisho kikei; Haü, aeibou shisho ong, khünei yen la lean kikei.

²⁰Phang che ka phang che to, sangle che ka, Lubü mütli jungto shongaiko kikei.

²¹Haoei aolakei haoen khon akuti; Haoen laüa haoei Choba shuong to haktiko,

²²Laukei, “Ngei naangenko pienbü to temeiti; Ngeibü thuseibü shuong to amaibü teküm.”

²³BUNYUBOU to chia lauashi, kaodak pendou; Chalou angboua haoeibü khümenbü shanga lenashi.

²⁴Phangshuong yoa haoeibü soneikangbü ngetiashi; Haoeibü maangpanglabü kümsilei shuong mütli pendou yoa!

²⁵Aishanga yaangenbou kho BUNYUBOU ki, hoba aeibou sangjan; Hobaje mühghaü pendou thüka hao to hatjan.

²⁶Aishanga mütli shuong mühghaü pendou kho heangsho shuong ki. Lausikei BUNYUBOUei mühshuong kümbei.

²⁷Nyensang si soumo yaangbü hao junga kia; Hao kishanga hau hoba olinbü ki.

²⁸O phangshuong ngühyem shuong, BUNYUBOU la nyensang kuashi. Soneikangbü hoba hau hao la kuashi!

²⁹BUNYUBOU la hao nyen to papbü soneikangbü kuashi; Lembü che jungan kaiya, hoba hao jungto kaiya; Saopobü hele lean BUNYUBOU to lemashi.

³⁰Hao thedanga lühashi kaodak pendou; Haü, kaodak kaangkhühtham loan kia; kho atopeilabü.

³¹Mühshuong olinashi hoba kaonyu olinashi! BUNYUBOUei songdakda dogo phangshuong la lenashi.

³²Yungnyu hoba kho shenko kibü pendouei ngühashi; Khongthu hoba khünei kibü pendou olinashi!

³³Kheijinei yamkabü bulong shuongei olinbüei BUNYUBOU thedanga chia laulabü. Aishanga kaodak matjemla hao louada.

³⁴O BUNYUBOU la nyensang kuashi, aishanga hao maibü ki. Aishanga haoeibü üeisanou süngshonko kida.

³⁵Kanei hao to laushi, “Kün püetashi, O küneibü Khümenbou Mühghaü; hoba phangshuong yo ka kün leiyenashi hoba khümenashi. Hobaje kaibü nyena soneikanglabü.

³⁶Israel Mühghaü BUNYUBOU haübou yingshi!” Thon akibü ka thon akibü sühko. Kheijinei müt pendouei laukei, “Amen!” hoba BUNYUBOU sangkei.

³⁷Hibü Dawidei Asaf si haoeibü jaisinasi shuong khünei BUNYUBOUeibü thebülanbü Sao- pobü Busen junga chalou angbou khambü tegütham athakko Busen thedanga khangenla apyokei.

³⁸Haoei tokei Obededom hoba haoeibü jaisinasi saosemto set; tokei Jeduthuneibü shou Obededom hoba Hosa koukhün lombü shuong kikei.

³⁹Hobaje ungshedbou Zadok hoba haoeibü jaisinasi ungshedbou shuong BUNYUBOU lemshang neichem thedanga Gibeona kibü shongh lemshanga

⁴⁰BUNYUBOUeibü ngühkhüma doan kibü tegü laobou haoei Israel la sakkukei kho pendou tegütham juokbü lemshang thüka athakko ngeyang ka nangnak sühko BUNYUBOU la juokbü lembü kula haoei phokei.

⁴¹Haoen yoa Heman hoba Jeduthun hoba joubü pienan kibü shuong kho hoba shangashatko nyen kuan kibü shuong BUNYUBOU la nyensang kula pienkei, aishanga haoeibü üeisanou ponpen ki.

⁴²Heman si Jeduthuneibü ika saopobü chia shanga chia hoba chia laulabü peisilei hoba teklaang hoba chinam la kikei. Jeduthuneibü shousi shuong koukhüna kila pienkei.

⁴³Kheijinei müt pendou lulu chem to linkei, hoba Dawidei haoeibü chemdang haükula chem to ngaikei.