Read Chang Naga 1 LÜNGBÜDOBÜ 17 Bible Online

1 LÜNGBÜDOBÜ 17 - Chang Naga bible

1 LÜNGBÜDOBÜ 17

¹Tou ladang Dawid jembü chema kikei, Dawidei thuseibou Nathan to laukei, “Chühashi, ngo cedar bueibü chema kida, lausikei BUNYUBOUeibü thebülanbü Busenje neichema kia.”

²Hobaje Nathanei laukei, “Kaibü maang- pona ai ki pendou kümashi, aishanga Mühghaü ka yoa kia.”

³Lausikei khüyoutham BUNYUBOUeibü ngüh Nathan jungto loukei.

⁴“Hauashi hoba ngo khangenbou Dawid to lenashi, BUNYUBOUei hai lauda, ‘Nyi kü la kishang chem adangkulabü,

⁵aishanga ngei Israel leiyenbü chalou ka tat sühko ngo chema akida, lausikei ngo neichem che ka neichem che to shongaia.

⁶Ngo lanei ong Israelbü pendou yoa paikei pendou aenei ngei Israel matjembü shuong, aoyou la ngeibü mütli san lomla ngei sakkukei haoen to, aila kanei kü la cedar buei chem che adangkuda dogo ngei alau.’

⁷Hibü tou nyi ngo khangenbou Dawid to lenshi, Thükenbou BUNYUBOUei hai lauda, “Ngei no sanlon lamshaushang ka kü mütli Israel thüka leiyeibou yingla leijung loukei.

⁸Hobaje no lato ong haukei, ngo ka yoa yoan kikei, hoba ka thedang ka dangbou pendou wapan apbua, hoba ngei ka shanga kaodaka yaangbü shuong nyen phatko nyen che longtilabü.

⁹Hobaje kü mütli Israel shanga ngei kaonyek che pienlabü, hoba haoen jembü kishanga kienla, hoba touje akuklabü lele ngei haoen kelabü, hoba kü mütli thüka ngei shaangla matjembü pienbü jihsiphai ka toubü jih sühko amaibou shousi shuongei haoen khonsak kipjim akutilabü,

¹⁰hoba ngei kaibü dangbou shuong pendou naklepkulabü, khoto aei BUNYUBOUei ka la chem che dangkulabü dogo ngei ka la ngetida.

¹¹No ladang kabousi shuong yoa kilabü jihsiphai longlaje, ka phainei ngei kaibü shousi ka che longtikulabü, hoba ngei haoeibü sangle tenan phokulabü.

¹²Haoei kü la chem che dangkulabü hoba ngei haoeibü Choba setshang ponpen shanga tenan phokulabü.

¹³Ngo haoeibü bou yeilabü, hoba hao kü shou kilabü; hoba ka to shaang ao kikei hao ka ngei langbü tegütham ngei hao ka üeisanou alanglabü.

¹⁴Lausikei ngei kü chema hoba ngeibü sanglea ponpen shanga hao kaangtilabü hoba haoeibü Choba setshang ponpen shanga kümbulabü.”

¹⁵Khübü ngüh pendou tegütham, hoba ho mangsang pendou tegütham Nathanei Dawid to joyokei.

¹⁶Kheijinei Dawid Choba atkei hoba BUNYUBOU thedanga setkei hoba laukei, “O BUNYUBOU Mühghaü, nyi ngo halokche leian loulabü ho ngo hoba kü chempenkei ai tegübü ma?

¹⁷O Mühghaü, ho ka theaje hanbüshou che ong kikei; lausikei nyi toukei no khangenbou chemdang shanga loulabü chalou lounyu kian joyoa hoba kü la loulabü meten shanga lena, O BUNYUBOU Mühghaü!

¹⁸Hobaje no khangenbou hangenbü shanga ka to Dawidei ai laula thükla? Aishanga nyi no khangenbou ngeakei.

¹⁹No khangenbou nyena, O BUNYUBOU, hoba no jembü maangpon tegü, habü kümsilei yaangbü pendou ngetila nyi ho kümsilei yaangbü kümbei.

²⁰No phatko ao aki, O BUNYUBOU, küneibü nouei ditbü pendouei ka to aeibü Mühghaü aki.

²¹Kaibü mütli Israel aoyou jungto jembü mütli yingla Mühghaüei angla hautikei nyi Ijep ka aoyou angthetkei haoen thedang ka phangshuong shian sattibüei no lolo nyen yaang hoba hatlamoklabü yeitikei, haoen phatko kaodaka ai phang ki?

²²Hobaje nyi kaibü mütli yeitikei; hoba no, O BUNYUBOU, haoeneibü Mühghaü yeikei.

²³“Hobaje tou, O BUNYUBOU, nyi no khangenbou shanga hoba haoeibü chemdang shanga joyobü ngüh kho ponpen shanga kitishima, hoba nyi lenbü tegü kümshima.

²⁴Hobaje kaibü nyen ponpen shanga kilabü hoba yaangentiko laulabü, Thükenbou BUNYUBOU Israel Mühghaü kho, Israelbü Mühghaü ki, hoba no khangenbou Dawid phang ka thedanga kishang dangan kilabü.

²⁵Aishanga no ngeibü Mühghaü, no khangenbou to hao shanga phangche denshang lamletilabü dogo tang khittikua; hibü no khangenbou ka thedanga welaula maang kaangda.

²⁶Hobaje tou, O BUNYUBOU, no Mühghaü ki, hoba nyi ho kümsilei maibü no khangenbou la thekua.

²⁷Hobaje tou ka junga ponpen shanga athakko kienlabü lele, sanoudambo no khangenbou chemdang haükushima; aieilausi O BUNYUBOU, nyi ai haükua kho ponpen shanga haükua.”