Read Chang Naga 1 LÜNGBÜDOBÜ 18 Bible Online

1 LÜNGBÜDOBÜ 18 - Chang Naga bible

1 LÜNGBÜDOBÜ 18

¹Kho phaia Dawidei Filistiabü thükkei hoba haoen phanga phokei, hoba haoei Gat si khoeibü sang shuong Filistiabü ik ka sungkei.

²Hobaje haoei Moab thükkei, hoba Moabbü Dawid khangenbü shuong la yeikei hoba khüm sungbakei.

³Tokei Dawidei Hadadezer, Zobabü Choba Hamat aenei kibü Eufratesa haoei jembü nyenhang noksa phola haujinei thükkei.

⁴Hobaje Dawidei hao ka koli sepai hajar nyet hoba youeibü sepai hajar che sungkei, hoba Dawidei kailong koli pendoueibü youshi phejak wapan apbukei, lausikei kailong saongao shanga souko apyokei.

⁵Hobaje ladang Siriabü Damaska ka Zobabü Choba Hadadezer thuila loukei, Dawidei Siriabü müt hajar saoto nyi haitikei.

⁶Kheijinei Dawidei Siriaa kibü Damaskaa lapheibü tan phokukei, hoba Siriabü Dawid khangenbü shuong yeikei, hoba khüm sungbakei. Hobaje BUNYUBOUei Dawid la hao haushang pendoua thükbü kukei.

⁷Hobaje Hadadezer khangenbü shuongei kümbü haoeneibü aih shuong kho Dawidei sokei, hoba khübü kho Jerusalem to sungbakei.

⁸Hobaje Hadadezereibü sangnyu shuong Tibhath ka hoba Kun ka Dawidei chinam juong sungkei; khoei Solomonei chinam sidang hoba thaonyu shuong chinam chaksiam thungsiphau kümbei.

⁹Ladang Hamatbü Choba Touei Zobabü Choba Hadadezereibü sepai tan khümbo Dawidei thüka dogo ditkei,

¹⁰haoei haoeibü shou Hatoram Dawid Choba jungto hao la salem kula hoba thükbü nyensang kula hautikei, aieilausi haoei Hadadezer dankthetko wap- yokei hoba hao thükkei, aieilausi Hadadezer annebenko Tou to wapyoko kikei. Hobaje haoei hon chandinam hoba chinam peisilei den pendou hautikei.

¹¹Khübü khokei tokei Dawid Chobaei BUNYUBOU la lepde kuan apbei, haoei phang pendou ka Edon ka Moab ka, Ammonbü ka, Filistiabü ka hoba Amalekbü ka haoei jungan louan kibü hon hoba chandinam to liko kukei.

¹²Hobaje Zeruaeibü shou Abishaiei Jem pholia Edombü hajar anthükset haitikei.

¹³Hobaje haoei Edom lapheibü sepai tan phokei, hoba Edombü pendou Da- wid khangenbou yeikei. Hobaje BUNYUBOUei Dawid la hao haushang pendoua thüksimin kukei.

¹⁴Hibü Dawidei Israelbü pendou thüka songdakkei, hoba haoei ngühmaia matjembei hoba müt pendou thüka jeteitei jungeikei.

¹⁵Hobaje Zeruiaeibü shou Joab sepai tan thüka kikei, hoba Ahiludeibü shou Jehoshafat dobou kikei.

¹⁶Hobaje Ahitubeibü shou Zadok hoba Abiathareibü shou Abimelek ungshedbou shu- ong kikei; hoba Shavsha dobou kikei;

¹⁷hoba Jehoiadaeibü shou Benaia Keretbü hoba Peletbü thüka kikei, hoba Dawideibü shousi shuong Choba kümaleia konglebü shuong kikei.