Read Chang Naga 1 LÜNGBÜDOBÜ 19 Bible Online

1 LÜNGBÜDOBÜ 19 - Chang Naga bible

1 LÜNGBÜDOBÜ 19

¹Tou Ammonbü Choba Nahash haian phaia haoeibü shousi hao jeila songdakkei.

²Hobaje Dawidei laukei, “Nahasheibü shou Hanun to ngei maangkuko jungeilabü, aieilausi haobouei kü to maangshikko jungeikei.” Hibü Dawidei hao maangsula haoeibü youko ikjaibü shuong hautikei. Hobaje Dawid khangenbü shuong hao maangsula Ammonbü kaodaka Hanun jungto loukei.

³Lausikei Ammonbü jaishou shuongei Hanun to laukei, “Dawidei ka jungto maangsubü hautibü khoei haoei kabou la soumo kuda dogo nyi damda sai? Haoeibü khangenbüei lamla hoba tuongtila hoba kaonyek shuchühla shanga ka jungto loukei aying lo?”

⁴Hibü Hanunei Dawideibü khangenbü shuong leijung loukei hoba haoenei khu kütan apbukei, hoba haoeneibü neisimei jenyu ka haoeneibü youshi sühko lipan apbukei, hoba haoen sattikei, hoba haoen meimeijung haukei.

⁵Ladang Dawid la mütshuong shangabü ngetikei, hao haoen shuokla haukei, aieilausi mütshuong kho aeibou himouko kikei. Hobaje Chobaei laukei, “Kan sembung wi alongshongko Jerikhoa kishi, kho phaia sepeinyu kangai.”

⁶Ladang Ammonbüei haoen lolo Dawid thedanga phaiyetlabü lele küma dogo chühenkei, Ammonbü Hanunei Mesopotamia ka, Aramaaka ka, kailong hoba koli sepai shuong jekan jungeila chandinam seret khujin bang atbü hajar che hautikei.

⁷Hobaje haoeneibü kailong hajar khujinto nyi hoba Maaka Choba haoeibü sepai tan shanga mu kukei, ao louan Medeba thedanga shaishang kümbei. Hobaje Ammonbü haoeneibü sangnyu shuong ka leishaikei hoba lason to loukei.

⁸Ladang Dawidei kho ditkei, haoei Joab si lakjaibou sepai tan pendou hautikei.

⁹Hobaje Ammonbü longkei hoba sangnyu sang badanga lin küman lokei, hoba Choba shuong aoyou louan kikei haoen lubüa khongthua kikei.

¹⁰Ladang Joabei lason kho hao naklepbo thedanga hoba phainei kian hapbei, haoei Israelbü müt sonenbü at pienkei hoba Siriabü naklepbo lason lotikei.

¹¹Joubü haoeibü mütshuong kho hao na Abishai phanga haoei phokukei, hoba haoen Ammonbü naklepbo lason lokei.

¹²Hobaje haoei laukei, “Siriabü kü shanga yongko hau kialonga, kheijinei nyi kü to thuilabü; lausikei Ammonbü ka shanga yongko hau kian kialonga ngei ka to thuilabü.

¹³Maang kaangashi, sen mütli shanga hoba seneibü Mühghaü sangnyu shuong shanga sen sekalakakho; hoba BUNYUBOUei hao junga ai maikei kho kümshima.”

¹⁴Hibü Joab si hao yoa kibü mütshuongei Siriabü nyangko lason wapyola loukei, hoba haoen hao jungka satkei.

¹⁵Hobaje ladang Ammonbüei Siriabü satbü chühenkei haoenei kho tegü Joabeibü na Abishai jungka satkei hoba sangnyu khüto atkei. Kheijinei Joab Jerusalem to loukei.

¹⁶Lausikei ladang Siriabüei haoen Israelbü la thüktilep dogo chühenkei, haoenei ngühlang künbü shuong hautikei hoba Siriabü aoyou Eufrates danjung hauan ki, Hadadezereibü sepai tan lajamleibü Shofak haoen thüka khu lean longkei.

¹⁷Hobaje ladang kho Dawid la ngetikei, haoei Israelbü pendou liko leishaikei hoba Jordan danjung hauan haoen khulimbo sepai tan senshaikei. Hobaje ladang Dawidei Siriabü naklepbo lason lokei, haoenei hao khulimbo wapyokei.

¹⁸Hobaje Siriabü Israelbü thed- ang ka satkei; hoba Dawidei Si- riabü kailong hajar nyet, youeibü sepai hajar saonyi wapettikei, hoba tokei sepai tan lajamleibou Shofak haitikei.

¹⁹Hobaje ladang Hadadezer khangenbü shuongei haoen Israelbü la thüktia dogo chühenkei, haoenei Dawid to sangmai kümbei, hoba hao mütshuong la yeikei. Hibü touje Siriabüei Ammonbü thuila maangangko akitei.