Read Chang Naga 1 LÜNGBÜDOBÜ 20 Bible Online

1 LÜNGBÜDOBÜ 20 - Chang Naga bible

1 LÜNGBÜDOBÜ 20

¹Choba shuong lason to haubü kejih ongjiha Joabei sepai tan leian haukei, hoba Ammonbü kaonyek shikei, hoba louan Rabba komlepbei. Lausikei Dawid Jerusalema kikei. Hobaje Joabei Rabba thükkei hoba kho shian apbei.

²Hobaje Dawidei haoeneibü heangsho Choba khun haoeibü khu ka sungkei; haoei kho takan chühbü hon seret khujin bang atbü che hapbei hoba khonei namseklaang kikei hoba khübü kho Dawideibü khuna jinkei. Hobaje haoei sangnyu ka soletbü peisilei juong künbakei.

³Hobaje khünei kibü shuong haoei leian longkei hoba bulat namju simbü hoba wou jungeitiko kümsilei kümtikei; hoba kho tegü Dawidei Ammonbü sangnyubü shuong to kümbei. Kho phaia Dawid si müt pendou Jerusalem to longeikei.

⁴Hobaje kho phaia Filistiabü to Gezera wapyo longkei, kheijinei Hushatbü Sibbekaiei Filistiabü mütlou mütyaang shuong ka pakbü müt che Sippai nyenbü haitikei, hoba Filistiabü hao phanga phokei.

⁵Hobaje tokei Filistiabü to wapyoko kikei, hoba Gatbü Goliat, aoeibü aubu neitakbüeibü jim tegü kikei, haoeibü na Lahmi, Jaireibü shou Elhananei haitikei.

⁶Tokei Gata wapyo kikei, khünei süngsilop yaangbü che kikei, aoeibü ik wekoa ikjishou lakbang kikei hoba you wekoa youjishou lakbang kikei pendouei saotolei, hoba tokei hao mütlou mütyaang ka pakbü kikei.

⁷Hobaje ladang haoei Israelbü khulimbo meimeikei, Dawideibü na Shimeaeibü shou Jonathanei hao haitikei.

⁸Khübü kho Gatbü yoa mütlou mütyaang shuong ka pakbü kikei; hoba haoen Dawid ika hoba haoeibü khangenbü shuong ika tuongkei.