Read Chang Naga 1 LÜNGBÜDOBÜ 21 Bible Online

1 LÜNGBÜDOBÜ 21 - Chang Naga bible

1 LÜNGBÜDOBÜ 21

¹Israel khulimbo Satan lokei hoba Israelbü lühbak wela Dawid thungan jinkei.

²Hibü Dawidei Joab hoba sepai leiyeibü to laukei, “Hauashi, Beersheba ka Dan sühko Israel wean chühashi, hoba haoeneibü lühbak ngela kü jungto ngühlang sungba.”

³Lausikei Joabei laukei, “BUNYUBOUei jembü mütli lajoche ki khüjoche saongao penko aei haatishima! Ngeibü bunyubou Choba, haoen pendou kho ngeibü bunyubou khangenbü aying lo? Khülonga aila ngeibü bunyuei ho khamda? Aila haoei Israel to shedbü sungbada?”

⁴Lausikei Joabei Chobaeibü ngüh athük. Hibü Joab kukkei hoba Israel pendou shoongjung haukei, hoba Jerusalem to longeikei.

⁵Hobaje Joabei mütshuong lühbak yoshaibü Dawid la kukei. Israel pendoua injung thükbü shuong bousu million che hajar saongao hoba Jihudaa injungbü hajar saongao leito anjinlei.

⁶Lausikei haoei Levi si Benjaminje lühbak to wean jinla athük, aieilausi Chobaeibü sakkubü kho Joabei amangsühko kikei.

⁷Lausikei ho kümsileiei Mühghaü aolinko kikei, hoba haoei Israel to ngümbei.

⁸Hobaje Dawidei Mühghaü to laukei, “Ngei ho kümsilei kümbüei shabü shona; ngei ka to sudajada, no khangenbouei shed shonbü langkushima, aieilausi ngei aeibou ngoukolouko küma!”

⁹Hobaje BUNYUBOUei Dawideibü thuseibou Gad to joyoko laukei,

¹⁰“Hauashi hoba Dawid to lenshi, BUNYUBOUei hai lauda, ‘Ngei ka la den sem kuda; khübü yoa che pienashi, khünei ngei ka to kümlabü.’ ”

¹¹Hibü Gad Dawid jungto loukei hoba laukei, “BUNYUBOUei hai lauda, ‘Nyi laobou mangsühda pienashi;

¹²po sem mühsinou yingsikei ayingsi kaibü dangbou shuongeibü inei no laphetjinei lit sem kaibü dangbou thedanga leilubü longtilabü yingsikei ayingsi chalou sem BUNYUBOUeibü inei kaodaka shatsinyat lim, hoba BUNYUBOU hangangbüei Israel leilang pendoua mautilabü yingsikei.’ Tou aoei ngo hautikei hao jungto ngei ai jongaibü künla janenashi.”

¹³Kheijinei Dawidei Gad to laukei, “Ngo maangmau yaangbüa kia, BUNYUBOUeibü ika ong ngo attishi, aieilausi haoeibü onou yaangsepbei; lausikei ngo müteibü ikaje tüattima!”

¹⁴Hibü BUNYUBOUei Israelbü thükto shatsinyat hautikei; hoba khünei Israelbü hajar anjinlei tuongkei.

¹⁵Hobaje Mühghaüeibü hangangbü Jerusalem mautila hautikei, lausikei ladang haoei kho mautila kikei, BUNYUBOUei hapbei, hoba amaibü ka hao maangpon senetkei, hoba haoei mautibou hangangbü to laukei, “Khüae leshi, tou kaibü ik sungngaiashi.” Hobaje BUNYUBOUeibü hangangbü kho Jebusbü Araunaeibü amshanga loan kikei.

¹⁶Hobaje Dawidei haoeibü nyek thükaeto chühan angtisi BUNYUBOUeibü hangangbü kho kaodak si müh kanglanga loan hapbei, hoba haoeibü ika Jerusalem thüka in che tokan hapbei. Kheijinei Dawid si jaishou shuong senounei neian the khümbei.

¹⁷Hobaje Dawidei Mühghaü to laukei, “Mütshang wela ngei sakkubü aku lo? Aoei shabü shonkei hoba aeibou amaiko kümbei kho ngo ki. Lausikei habü sanshuongei haoenei ai kümbei? O BUNYUBOU, ngeibü Mühghaü, ngei ka to sudajada, kaibü ik ngo khulimbo hoba küboueibü chemdang khulimbo yingshima; lausikei kaibü mütli thükto shieikoe tekitima.”

¹⁸Kheijinei BUNYUBOUeibü hangangbüei Gad to, Dawid to Jebusbü Araunaeibü amshang to angan BUNYUBOU to lemshang che kümashi hoba khüto angashi, dogo lenla sakkukei.

¹⁹Hibü BUNYUBOU nyena Gadei laubü ngüha Dawid angkei.

²⁰Arauna whet youshou sungyoko kikei, hao sepeikei hoba hangangbü kho hapbei, hoba hao yoa kibü shousi müt lei kho haoen lolo hukei.

²¹Dawid Arauna jungto lousi Araunaei chühkei hoba Dawid hapbei hoba amshang to angkei, hoba haoeibü thenyek kaoae yeian Dawid la salem kukei.

²²Hobaje Dawidei Arauna to laukei, “BUNYUBOU la lemshang che kümbulabü lele kü la amshang kaoen che labüma; mütli ka shieikoe satlabü lele kho tükdebü namtetei kü la kubüma.”

²³Kheijinei Araunaei Dawid to laukei, “Leashi hoba ngeibü BUNYUBOU Choba thedanga ai maikei kümshima, chühashi, juokbü lembü shanga masu hoba bu shanga youho hoba shausi- yung lembü shanga whet youshou ngei kuda. Ngei pendou kuda.”

²⁴Lausikei Dawid Chobaei Arauna to laukei, “Aying, lausikei ngei kho namtet tükdebüei ong jeklabü; kaibü ai ki kho ngei BUNYUBOU shanga alekulabü, ayingsi ngei ai munam akiko juokbü lembü akulabü.”

²⁵Hibü Dawidei Arauna la kao shanga hon shekel saongao lak yaüan kukei.

²⁶Hobaje khünei Dawidei BUNYUBOU to lemshang che kümbei hoba juokbü lembü hoba sangmai lembü kukei, hoba BUNYUBOU to ngakei, hoba haoei juokbü lembü thükto müh ka wanei jongaikei.

²⁷Kheijinei BUNYUBOUei hangangbü kho la sakkukei, hoba haoei haoeibü inlou shoushang to ngaitikei.

²⁸Kho jiha ladang Dawidei Jebusbü Araunaeibü amshanga hao to BUNYUBOUei jongaibü hapbei, haoei haoeibü haitibü lembü khünei kukei.

²⁹Aishanga BUNYUBOUeibü lemshang neichem laobou Mosaei yama dangkei, hoba juokbü lembü lemshanga kho jihsiphaia Gibeona lemshang shongha kikei;

³⁰lausikei Dawidei kho junga Mühghaü to phela ohauen, aishanga hao BUNYUBOUeibü hangangbü inlou to hatko kikei.