Read Chang Naga 1 LÜNGBÜDOBÜ 22 Bible Online

1 LÜNGBÜDOBÜ 22 - Chang Naga bible

1 LÜNGBÜDOBÜ 22

¹Kheijinei Dawidei laukei, “Hanei BUNYUBOUeibü chem kijan, hoba hanei Israelbü shanga juokbü lembü kushang kijan.”

²Hobaje Israel kaodaka kibü küksithang shuong Dawidei liko kamshaitikei, hoba Mühghaüeibü chem dangla shanga haoei laangjakbü shuong, hoba laang thüngenan yentila kümtikei.

³Dawidei tokei, bakhün koukap shuong shanga hoba sapyola kojal shanga nam apsileko thankei, hoba chinamkei seretkei ohauenlabü lele,

⁴hoba cedar wa aweenlabü lele lamlekukei; aieilausi Sidonbü hoba Tairbüei bu juong Dawid jungto sungbakei.

⁵Hobaje Da- widei laukei, “Kü shou Solomon heshou hoba kümaleia nashou, hoba BUNYUBOU shanga chem dangla kibü kho yongko soumo ki; kaonyek pendoua nyenshen hoba soneikangbü yingjan; khei yingbü khoei ngei ho shanga lamlebü kilabü.” Hibü Dawidei hao ühaijinei peisilei juong yoshaikei.

⁶Kheijinei haoei haoeibü shou Solomon ngakei hoba BUNYUBOU Israel Mühghaü shanga chem che dangla sakkukei.

⁷Dawidei Solomon to laukei, “Kü shou, BUNYUBOU ngeibü Mühghaü nyena chem dangla kü maangpona kikei.

⁸Lausikei BUNYUBOUeibü ngüh kü jungto louan laukei, ‘Nyi sii juong angtia hoba wapyo yaangbü wapyoa, nyi ngeibü nyen shanga chem che adangjan; aieilausi nyi kü thedanga kaonyua sii juong phina.

⁹Chühashi, ka la bousu shou che bukkulabü, hao sangmai müt che yinglabü; hoba kaijembo haoeibü dangbou pendou ka ngei hao la sangmai kulabü, aishanga haoeibü nyen Solomon nyenlabü, hoba ngei hao haanga Israelbü la sangmai hoba sangsembü kulabü.

¹⁰Haoei kü shanga chem che danglabü. Hao ngeibü shou yinglabü hoba ngo haobou yinglabü hoba Israela ngei haoeibü Choba setshang ponpen shanga kümbulabü.’

¹¹“Tou, kü shou, BUNYUBOU ka yoa kishi, hoba ka shanga laubü tegü no thükbüminbü yingshi, hoba BUNYUBOU kaibü Mühghaüeibü chem dangashi.

¹²BUNYUBOUei ong khei ladang haoei ka la Israel thüka leiyeila sakkulaje, nyi BUNYUBOU kaibü Mühghaüeibü ngühkhüm jungeienlabü lele ka la songsido hoba ditenbü kushima.

¹³Nyi sakkubü ngühkhüm shuong laobou Israel shanga BUNYUBOUei Mosa la sakkukei kho jungeila maangsangko kialonga kheijinei no naangmailabü. Hau kiashi, maangkaangashi. tehüt, maangtekou.

¹⁴Khonsak yaangei BUNYUBOUeibü chem shanga hon seret khujin bang atbü hajar saongao hoba chandinam million che, chinam hoba nam hauan chühla athüklabü lele yoshaikua, aishanga kho apsileko kia; wa hoba laangkei ngei yoshaikua. Khübü kho nyi jinyojan.

¹⁵Nyi kümla leilabü müt juong kia; laang thüngbü shuong, laangeibü mistri shuong, bueibü mistri shuong, kümsilei phang pendoua sonenbü aweenko kia;

¹⁶hon, chandinam, chinam, hoba nam. Meimeiashi hoba kümaleiashi! BUNYUBOU ka yoa kishi!”

¹⁷Dawidei tokei Israelbü leiyeibü pendou to hao shou Solomon to thuila sakkukei hoba laukei,

¹⁸“BUNYUBOU kaneibü Mühghaü kan yo aki lo? Aishanga haoei kaonyeka kibü pendou ngeibü ik to khümbo kua, hoba BUNYUBOU hoba haoeibü mütli thedanga kaonyek kho khüpet- akei.

¹⁹Tou BUNYUBOU kaneibü Mühghaü lamla kaneibü dambü hoba maangpona takshi. Meimeiashi hoba kanei BUNYUBOUeibü saoposhang dangashi; khünei BUNYUBOUeibü Saopobü Busen hoba Mühghaüeibü saopobü thungsiphau shuong BUNYUBOUeibü nyen shanga dangbü chem che to lotan phola thüklabü.”