Read Chang Naga 1 LÜNGBÜDOBÜ 28 Bible Online

1 LÜNGBÜDOBÜ 28 - Chang Naga bible

1 LÜNGBÜDOBÜ 28

¹Jerusalema Israelbü leiyeibü pendou phang shuong lei- yeibü, Choba khangenbü jannyinbü leiyeibü shuong hajar thüka lajamleibou, saongao thüka leibou Choba hoba haoeibü shousi shuong nyaksinam hoba samkeisamuk tan thüka ikjaibü shuong Chobaeibü chema leiyeibü shu- ong, laakjaibü mütshuong, hoba shetenbü laakbü hongbü shuong Dawidei liko yoshaitikei.

²Kheijinei Dawid Chobaei meimeian lokei hoba laukei, “Kü to ditshi, ngeibü jaisinasi shuong hoba ngeibü mütli shuong. Ngei ngeibü maangpona BUNYUBOUeibü thebülanbü Saopobü Busen phola shanga hoba seneibü Mühghaü younakshang shanga chem che dangla daman kikei; hoba chemdangla ngei lamlekuakei.

³Lausikei Mühghaüei kü to laukei, nyi ngeibü nyen shanga chem che adanglabü; aishanga no wapyobü müt hoba nyi sii phina.

⁴Khei yingsikei BUNYUBOU Israel Mühghaüei Israelbü thüka ponpen songdakla kübou chem ka ngo pienkei; aieilausi haoei Jihuda phang leiyeibü pienkei, hoba Jihuda phanga hoba küboueibü chem hoba küboueibü shousi yoka haoei Israel pendou thüka Choba lela haoei kü to maangshikei.

⁵Hobaje ngeibü shousi pendou yoa (aishanga BUNYUBOUei kü la shousi juong kukei) haoei ngeibü shou Solomon Israel thüka BUNYUBOU sanglea Choba setshanga setla pienkei.

⁶Haoei kü to laukei, “Ngeibü chem hoba ngeibü matjemshang chem danglabü kho kaibü shou Solomon yinglabü, aishanga ngei hao kü shou yingla piena: hoba ngo haobou yeilabü.

⁷Haoei ngeibü ngühkhüm deikhüm shu- ong hoba songa kibü ngühkhüm shuong athakko tat tegü jungeiko kialonga ngei haoeibü sangle ponpen shanga yaükulabü

⁸“Tou khei yingsije, BUNYUBOU eibü thangnyena Israelbü pendou thedanga hoba seneibü Mühghaüei ditko BUNYUBOU kaneibü Mühghaüei sakkubü shuong pendou jungeiashi, hoba lamenashi; khünei kanei ho kaodak maibü kho leoulabü, hoba kan phainei ponpen shanga apyokula thüklabü.”

⁹Hobaje no, küshou Solomon, kaboueibü Mühghaü ngeashi, hoba maangpon khümboei hoba maangnyu angko hao khangenashi; aieilausi BUNYUBOUei maangbon khümbo lamda, hoba huonsiyou hoba dambü khümbo ditenda. Nyi hao lamalonga nyi hao haplabü; lausikei nyi hao inledalonga haoei no ponpen shanga inletlabü.

¹⁰Tou maang sangashi, aieilausi saoposhang shanga chem che dangla BUNYUBOUei no piena; hau kiashi hoba kho kümashi.

¹¹Kheijinei Dawidei hao shou Solomon la lembü chem sanbütakbü hoba khoeibü chem shuong thanshang chem shuong, khoeibü thükkabou shemjang shuong hoba khoeibü maangkabou shemjang hoba onoubü setshang shanga shemjang noksa kukei.

¹²Hobaje BUNYUBOUeibü chema matjemshang chem shanga haoeibü maanga kibü sanbütakbü pendou kaijembo kibü shemjang shuong Mühghaüeibü chema thanshang hoba khümbo kubü jongsak shanga thanshang;

¹³Ungshedbou shuong hoba Levibü shuong jannyinbü shuong shanga, hoba BUNYUBOUeibü chema khangenbü kümsilei pendou; BUNYUBOUeibü chema kümsilei shanga thungsiphau pendou shanga;

¹⁴kümsilei weko shanga honeibü chaksiam pendou shanga hon seret yaübü kümsilei weko shanga chandinam shikchak nyakchak,

¹⁵honeibü wanthung denshang wekoa kümsileia wanthung denshang weko shanga khambü thüng.

¹⁶Mühghaü thedanga phobü wentek shanga khümsok weko hon seret haubü, seret yaübü chandinam khümsok shanga chandinam,

¹⁷hoba pheyaüjin shiklak nyaklak shanga honlanbü, phauyaang shuong, hoba thung shuong, honeibü phayaang shanga hoba kho weko takbü; chandinam phayaang hoba kho weko takbü, chandinam phau hoba khoeibü takbü weko.

¹⁸Saoposhang honei kümbü jen lemshang shanga hoba khoeibü takbü, tokei BUNYUBOUeibü thebülanbü Saopobü Busen kaakyembü kherabim kaak pinan hoba küplepan kibü kaakyembü kherabim hon tongjin shanga haoeibü sanbütakbü.

¹⁹Ho pendou BUNYUBOUeibü ik ka ho shanga dobüei haoei shanga shattila kümsilei pendou kho haoeibü sanbütakbü tegü kümlabü.

²⁰Kheijinei Dawidei hao shou Solomon to laukei, “Hau kiashi hoba maang kaangashi, hoba kho kümashi. Tehüt, maang apbo teki, aishanga BUNYUBOU Mühghaü ka yoa kia, pendou ayei shongko haoei no alitilabü ayingsi no ainletlabü.

²¹Hobaje chühashi, Mühghaüeibü chema kümsilei pendou shanga ungshedbou shuong hoba Levi shuong jannyinbü kia, hoba ka yoa kümsilei pendoua maangangbü mütpem weko ao kümsilei at shanga shetenbü ki hao yoan kilabü; tokei leiyeibü shuong hoba müt pendou lepde kaibü sakkubü phanga kia.”