Read Chang Naga 1 LÜNGBÜDOBÜ 29 Bible Online

1 LÜNGBÜDOBÜ 29 - Chang Naga bible

1 LÜNGBÜDOBÜ 29

¹Hobaje Dawid Chobaei thangyenbü pendou to laukei, “Küshou Solomon, ao Mühghaüei jembüei ong pienan ki, hao heshou hoba songsido alibü hoba kumsilei kho yaangbü; aieilausi Chobaeibü chem kho müt shanga aying lausikei BUNYUBOU Mühghaü shanga ki.

²Hibü ngeibü Mühghaü chem shanga ngei thükbü sühkoje ngei yoshaikua; honeibü peisilei shanga hon, chandinam peisilei shanga chandinam, chinam shanga chinam, namkung peisilei shanga namkung, bueibü peisilei shanga bu kho to liman oniks hoba denshang laang shuong son den den, namsek laang den pendou hoba ninulaang.

³Tokei saopobü pendou to limbo ngei ngeibü hon si chandinam thanshang kia hoba ngeibü Mühghaü chem shanga ngeibü maangpon khümbo kubüei ngei kho ngeibü Mühghaüeibü chem la kuda.

⁴Hon seret khujin bang atbü hajar sem, ofir hon hoba chandinam lanbü seret khujin bang atbü hajar nyet, chemeibü kümthanga jonla shanga,

⁵hoba kümsilei hangsilam hapbü shu- ongei kümlabü kümsilei pendou shanga hon peisilei shanga hon, chandinam peisilei shanga chandinam. Khülonga aoei maangnyu angko jembü lulu tat BUNYUBOU la khümbo kula?”

⁶Kheijinei chung leiyeibü shuongei haoeneibü maangangbü lembü kukei; chung leiyeibü shuongei hajar thüka hoba saongao thüka khuleibü shuong, hoba Chobaeibü kümsilei thüka lamleibü shuong.

⁷Mühghaüeibü chema kümsilei shanga haoenei seret khujin bang atbü hajar ngao hoba honeibü nam hajar an seret khujin bang atbü chandinam hajar an, seret khujin atbü chinam hajar anthük set hoba seret khujin bang atbü namkung hajar saongao.

⁸Hobaje aoyouei namseklaang shuong kikei, BUNYUBOUeibü chem thanshanga Gershonbü Jehieleibü ik to khübü kho kukei.

⁹Kheijinei mütshuong olinyokei, aieilausi khübü maanglansele kukei, aishanga maangpon khümboei maangnyu angko BUNYUBOU la kukei; hoba Dawid Choba aeibou olinkei.

¹⁰Hibü khoei thangyenbü pendou thedanga Dawidei BUNYUBOU haükukei; hoba Dawidei laukei, “O BUNYUBOU küneibü bou Israel Mühghaü, ponpen thon aki. No haübou yingshi.

¹¹O BUNYUBOU yaangenbou, hoba sei hoba soneikangbü hoba thükbü hoba soumo yaangbü kho ka shangabü ki; aieilausi müha hoba kaonyua kibü pendou kaibü, O BUNYUBOU, sangle kho ka shangabü hoba pendou thüka no khu tegü tonenan kia.

¹²Keisiyaang hoba hangenbü ka ka louda, hoba nyi pendou thüka songdakda. Kaibü ika sei hoba hau kia, hoba yaangentila hoba pendou la hau kula kaibü ika kia.

¹³Hobaje tou künei ka nyen sangda, küneibü Mühghaü, hoba kaibü soneikangbü nyen sangda.

¹⁴“Lausikei hai maanglansele künei lemenlabü lele ngokei ao hoba ngeibü mütlikei ailaibü ma? Aishanga peisilei pendou ka ka louda, hoba kaibü ong künei ka la kua.

¹⁵Aishanga küneibü pisibou pendou tegü, kün ka thedanga yenbou shuong ki. Kaodaka küneibü salang mangshoubü che ong hoba aikei maanglem aki.

¹⁶O BUNYUBOU küneibü Mühghaü, kaibü nyen saopobü shanga ka la chem che dangkula künei peisilei juong yoshaian kibü kho pendou ka ik ka hoba pendou kaibü ki.

¹⁷Ngei ngekei, ngeibü Mühghaü, khei nyi maangpon takteida, hoba tangshaibü maangpon to no olinda; ngeibü maangpon tangbüei habü peisilei pendou maanglansele kua, hoba hanei kibü kaibü mütli shuongei maangnyu angko hoba olinangko ka la kubü ngei hapa.

¹⁸O BUNYUBOU, küneibü pisibou Abraham, Isak hoba Israel Mühghaü, ponpen shanga kaibü mütli lamthen hoba maangpona dambü shuong ho tegü phobüma, hoba haoeneibü maangpon ka aeto hautishima.

¹⁹Kü shou Solomon la kaibü sakkubü shuong, kaibü aukabü shuong hoba kaibü sakkubü ngühkhüm pendou jungeiko khei ngei lamlean phokubüei haoei Chobaeibü chem kho dangla penbüsoubü maangpon kushima.”

²⁰Kheijinei Dawidei thang- yenbü pendou to laukei, “Kanei Mühghaü BUNYUBOU haükuashi.” Hobaje thangyenbü pendouei haoeneibü pisibou Mühghaü haükukei, hoba haoeneibü khu khüpjung atkei hoba BUNYUBOU to lembei, hoba Choba to souhat lenkei.

²¹Hobaje haoenei BUNYUBOU la haitibü lembü kukei hoba nyibounyet BUNYUBOU la juokbü lembü masu pongsu hajar che, sanlon hajar che, hoba sanlon shoushou hajar che haoeneibü yunglabü lembü hoba Israelbü pendou shanga haitibü lembü juong kukei.

²²Hobaje khünyet chalou haoenei BUNYUBOU thed- anga olinbü yaangbüei shaukei yungkei. Hobaje haoenei Dawid Chobaeibü shou Solomon nyibou Choba yeitikei, hoba haoenei BUNYUBOU shanga hao leiyeibü pienkei hoba Zadok ungshedbou yeitikei.

²³Kheijinei Solomon haoeibü bou Dawid jeiko BUNYUBOUeibü Choba setshanga Choba tegü setkei, hoba hao naangmaikei hoba Israelbü pendouei hao to ngüha lekei.

²⁴Leiyeibü pendou hoba hau yaangbü mütshuong hoba tokei Dawideibü shousi pendouei Solomon Choba to haoeibü buleng phanga kila thekukei.

²⁵Hobaje BUNYUBOUei Israelbü pendou thedanga Solomon aeibou yaangentikei, hoba hao la kubü tegü hao thedangto Israela ao Choba lakei Chobaeibü soumo yaangbü aku.

²⁶Kho tegü Jesseeibü shou Dawidei Israelbü pendou thüka songdakkei.

²⁷Haoei Israelbü thüka po saonyi songdakkei, Hebrona haoei po nyet songdakkei, hoba Jerusalema po khujinto sem songdakkei.

²⁸Kheijinei hao aeibou baushi sinan salangko kian nyaksinam hoba nyensang nyenhang hapan haikei, hoba hao shou Solomonei hao jeiko songdakkei.

²⁹Tou Dawid Chobaeibü kümsilei shuong shaangbü si phaibü to chühashi; chühenbou Samuel ngühli hoba thuseibou Nathan ngühli, hoba chühenbou Gad ngühlia doakei;

³⁰haoei songdakbü pendou shangabü hoba haoeibü hau, hoba hao thüka hoba Israel thüka, hoba kaodak sangle pendou thüka haüthükbü khübü kho doan ki.