Read Chang Naga 2 LÜNGBÜDOBÜ 1 Bible Online

2 LÜNGBÜDOBÜ 1 - Chang Naga bible

2 LÜNGBÜDOBÜ 1

¹Dawid Chobaeibü shou Solomonei haoeibü sangle hau kingaikei hoba BUNYUBOU haoeibü Mühghaü hao yoa kikei hoba yongko yaangentikei.

²Hobaje Israelbü pendou to hajar thükkabü hoba saongao thükkabü lajamleibou to, matjembü shuong hoba Israelbü pendoua leiyeibü pendou, püshi shuong hoba jaishou shuong to Solomonei joyokei.

³Hobaje Solomon hoba hao yoa tan pendou, Gibeona lemshang shongh to haukei; aieilausi Mühghaüeibü kamshang neichem laobou BUNYUBOU khangenbou Mosaei yama dangkei, kho khünei kikei.

⁴(Lausikei Mühghaü Saopobü Busen Kiriath-Jearim ka Dawidei kho shanga lamlekuan kishang to jungan angan kikei, aishanga Jerusalema ho shanga haoei neichem dangko kikei.)

⁵Lausikei Hureibü shou, Urieibü shou, Bezalelei chinam lemshanga kümbo kibü kho, Gibeona BUNYUBOUeibü lemshang neichem thedanga kikei. Hobaje Solomon hoba müt pendouei khünei BUNYUBOU lembei.

⁶Hobaje Solomon BUNYUBOU thedanga chinam lemshon laobou noknyüheibü neichema kikei khüto angan juokbü lemshon thüka hajar cheei lembei.

⁷Khüyou Solomon jungto BUNYUBOU longkei hoba hao to laukei, “Ngei ka la ai kulaje pheashi.”

⁸Solomonei Mühghaü to laukei, “Nyi kübou Dawid la onou yaang lena hoba ngokei hao jeiko Choba yeitia;

⁹O BUNYUBOU Mühghaü, kübou Dawid to kaibü thebülanbü tou haüthüktishima, aieilausi kaoa phetsen lajuche khüjocheeibü mütli thüka nyi ngo Choba yeitikei.

¹⁰Ho mütli thedanga ngo longko atko lela songsihon hoba hapbüngebü songsido tou kü la labüma, aieilausi aoei kaibü mütli hajuche ho thüka song dakenla?”

¹¹Mühghaüei Solomon to jongaikei, “Ho kaibü maangpona kisije hoba nyaksinam, kibükeibü, nyenhang, ka to mangsenbü langkei haitila ayingsi kaibü langkei shanga salang ahi, lausikei ngeibü mütli aoyou thüka ngei no Choba yeitikei, haoen thüka nyi song dakenla shanga songsihon hoba hapbüngebü ong hikei.

¹²Songsihon hoba hapbüngebü ka la sakkua. Ngei tokei namsek peisilei, nyaksinam, hoba nyenhang, Choba shuong aoeikei ka thedanga akibü hoba ka phainei haibü ho akilabü ka la kulabü.”

¹³Hibü Gibeona lemshang shongh ka hoba kamshang neichem ka Solomon Jerusalem to loukei, hoba haoei Israel thüka songdakkei.

¹⁴Solomonei kailong hoba koli sepai liko leishaikei, haoeibü kailong hajar anthüklei kikei hoba koli sepai hajar anthüknyi kikei, haoei khübü kailong sangnyu shuonga hoba Jerusalema Choba yoa phokei.

¹⁵Hobaje Chobaei chandinam hoba hon Jerusalema laang tegü apsileko yeitikei, hoba haoei cedar bulong Shefelaa bhuklong tegü juong yeitikei.

¹⁶Hobaje Solomonei koli shuong Ijep hoba Kue ka sungbakei, hoba Chobaeibü namyak namseibü shuongei khübü kho Kue ka munam kuan jekbakei.

¹⁷Haoenei Ijep ka kailong che chandinam shekel saongao lakei jekan sungbakei, hoba koli chenei shekel saongaoto anjinsem kukei; kho tegü haoen danko Hitbü Choba pendou hoba Siriabü Choba shuong jungto hautikei.