Read Chang Naga 2 LÜNGBÜDOBÜ 10 Bible Online

2 LÜNGBÜDOBÜ 10 - Chang Naga bible

2 LÜNGBÜDOBÜ 10

¹Rehoboam Shekhem to haukei, aishanga Israelbü pendouei hao Choba yeitila Shekhem to louan kikei.

²Hobaje ladang Nebateibü shou Jeroboamei kho ditkei, (aishanga hao Ijepa Solomon Choba thedeng ka khüto satjung hauan kikei) Jeroboam Ijep ka longeikei.

³Hobaje haoenei hautikei hoba hao ngakei; hoba hao hoba Israel pendou Rehoboam to joyoko laukei,

⁴“Kabouei küneibü buleng atshaitikei; tou khei yingbü khoei kaboueibü kümsilei sekbü kho hoba kün thükto haoei jinkubü buleng atshaibü kho songoktishi, hoba künei no khangenkho.”

⁵Hobaje Rehoboamei haoen to laukei, “Chalou semnyet kian nyibou kü jungto kangai,” hoba mütshuong linkei.

⁶Hobaje Solomon lang kijinei hao thedanga lobü jaishou shuong to Rehoboam Chobaei pheyoko laukei, “Ho mütli la jongaibü ngaitikula kaneikei kü la ai dambü kula?”

⁷Hobaje haoenei hao to laukei, “Nyi ho mütli to sanouko jungeialonga hoba haoen olintialonga hoba haoen to ngühmai joyoalonga kheijinei haoen ponpen no khangenbü shuong yinglabü.”

⁸Lausikei jaishou shuongei hao la kubü ngüh kho haoei ale, tekan apbei, hoba hao thedanga lobü hao him heshou shuong yoa ong ngüh janyokei.

⁹Hobaje haoei haoen to laukei, “Habü mütli la jongaibü kula kaneikei kü la ai dambü kula? Haoenei kü to, ‘Kabouei kün la küntibü buleng songokbou yeitishi dogo lauda.’ ”

¹⁰Hobaje hao him shuongei hao to laukei, “Ka to, ‘Kabouei küneibü buleng atshaitikua, lausikei nyi kho kün la songokbou yeitikushi,’ dogo joyobü mütshuong to nyi hai lenshi, ‘Küboueibü shenjang toje ngeibü ikjishou aübou shangkei,

¹¹hoba tou kübouei kan la buleng sekbü petikei yingalonga, ngei kan la buleng aei ong petilabü; kübouei kan to janglühei sembo shieikoekei, lausikei ngeije kan sinkipei shieikoelabü’ dogo laushi.”

¹²Hibü “Sembounyet kai” dogo Chobaei laubü tegü Jeroboam si mütshuong pendou Rehoboam jungto sembounyet loukei.

¹³Hobaje Chobaei haoen to kaangko jongaikei; hoba Rehoboam Chobaei jaishou shuongeibü ngüh tekan apbukei,

¹⁴hoba heshou shuongeibü ngüh tegütham Rehoboam Chobaei haoen to joyoko laukei, “Kübouei kaneibü buleng atsheitham petikei; lausikei ngei ho to aei jinyokulabü; kübouei kan janglühei shieikoekei, lausikei ngeije singkipei shieikoelabü.”

¹⁵Hibü Chobaei mütshuong to ngüha ale; aishanga BUNYUBOUei jembü ngüh haüthüktila shanga Nebateibü shou Jeroboam to Shilonbü Ahija danko ai laukei kho Mühghaü ka longtibü kikei.

¹⁶Hobaje ladang Israelbü pendouei Chobaei haoeneibü ngüha ale dogo chühenkei, mütshuongei jongngaiko laukei, “Dawid yoa kün ai phejan ki? Jesseeibü shou to kün phetphan ühambei; mütpem weko lulueibü neichem lamashi; tou no Dawid jembü chem to chühashi.” Hibü Israelbü pendou lulueibü neichem lambo linkei.

¹⁷Lausikei Jihudaa kibü Israelbü shousi shuong shangaje haoen thüka Rehoboamei songdakkei.

¹⁸Kheijinei Rehoboam Chobaei kümaleia leiyeibou Adoniram hautikei, hoba Israelbü shousi shuongei laangei tetsi hao haikei. Hobaje Rehoboam Choba Jerusalem to satla jembü kailong to angla panteiko haukei.

¹⁹Hibü Israelbüei tat sühko Dawid mütli chung khulimbo louakei.