Read Chang Naga 2 LÜNGBÜDOBÜ 12 Bible Online

2 LÜNGBÜDOBÜ 12 - Chang Naga bible

2 LÜNGBÜDOBÜ 12

¹Ladang Rehoboameibü sangle kaangko sekoktham yeikei, haoei BUNYUBOUeibü ngühkhüm inletkei, hoba hao yoa Israelbü pendou yoan kikei.

²Hobaje Rehoboam Choba po ngaoboubüa, haoenei BUNYUBOU to maang alemsije Ijepbü Choba Shishak Jerusalem khulimbo,

³kailong hajar cheto saoan hoba koli sepai hajar saosem angkei. Hobaje hao yoa loubü shuong Ijep ka Libia, Sukkim hoba Ethio- piabü aweenko haikei.

⁴Hobaje haoei Jihudaa kibü kaangbüsekbü sangnyu shuong lekei, hoba Jerusalem sühko loukei.

⁵Kheijinei thuseibü Shemaia Rehoboam jungto hoba Jihudabü yaangenbü shuong jungto loukei. Haoen Jerusalema Shishak shanga kaman kikei, hoba haoen to laukei, “BUNYUBOUei hai lauda, kanei ngo apyokei, hibü ngei kan Shishak ika apyokei.”

⁶Kheijinei Israelbü yaangenbü shuong hoba Choba haoen lolo eaaoa yeikei hoba laukei, “BUNYUBOU saopobü ki.”

⁷Ladang BUNYUBOUei haoen lolo eaaoa yeibü hapbei, BUNYUBOU ngüh Shemaia jungto louko laukei, “Aishanga haoen lolo eaaoa yeia; ngei haoen amautilabü lausikei ngei haoen la khümet angetlabü at sakkulabü, hoba Jerusalem thükto Shishakeibü ik danko ngeibü maangshat khüpan ajinkulabü.

⁸Khei yingsikei haoen hao khangenbü shuong yinglabü, khünei haoenei ngeibü kümsilei hoba kaodak sangle kümsilei ngelabü.”

⁹Hibü Ijepbü Choba Shishak Jerusalem khulimbo angkei; haoei BUNYUBOUeibü chema thanbü shuong hoba Chobaeibü chem kabü nyaksinam sunglangkei. Haoei ajanjan pendou sunglangkei. Haoei tokei Solomonei kümbü aih shuong sunglangkei.

¹⁰Hobaje Rehoboam Chobaei khübü jeiko chisaknameibü aih shuong kümbei, hoba khübü kho Chobaeibü koukhün lombü khusabü ik to kukei.

¹¹Hobaje ladüngnei Choba BUNYUBOUeibü chem to haulaje, lombü shuongei khübü kho louan jungan satko hoba nyibou lombü shemjang khüto sungngaibako lekei.

¹²Hobaje ladang haoei hao lolo sembeiambei BUNYUBOU maangshat hao lepdeje amautilabü lele sepeinyu ngaikei; aeilaleko Jihuda thumaibou kikei.

¹³Hibü Rehoboam Chobaei hao lolo Jerusalema hau kingaikei hoba songdakkei. Rehoboam haoei songdakla khangjinei po saonyito che kikei, hoba haoei Jerusalema po anthüknyet songdakkei, ho sangnyu BUNYUBOUei Israelbü mütli pendou yoka hao nyen khünei phola pienkei. Haoeibü nyu nyen Naama, Ammonbü sao kikei.

¹⁴Hobaje haoei amaibü kümbei, aieilausi haoei BUNYUBOU lamla haoeibü maang to alou.

¹⁵Tou Rehoboameibü kümsilei khangbü ka thonbü sühko khübü kho thuseibou Shemaia si Iddo thuseiboueibü lüngbüdobü lea doan aki lo? Jeroboam si Rehoboam kanglanga wapyo athakko ong kikei.

¹⁶Hobaje Rehoboam haoeibü bousi shuong yoa yepbei hoba Dawid sangnyua khünkei, hoba haoeibü shou Abijaei hao jeila songdakkei.