Read Chang Naga 2 LÜNGBÜDOBÜ 14 Bible Online

2 LÜNGBÜDOBÜ 14 - Chang Naga bible

2 LÜNGBÜDOBÜ 14

¹Hibü Abija bousi shuong yoa yepbei, hoba haoenei Dawid sangnyua hao khünkei, hoba haoeibü shou Asaei hao jeila songdakkei, hao haanga kaonyek sangsembo po an kikei.

²Hobaje Asaei BUNYUBOU haoeibü Mühghaü thea ai maikei hoba tükde kho kümbei.

³Aishanga haoei küksithang lemshang hoba shongh lemshang sungan apbei, hoba saopobü thaonyu shuong leilukukei, hoba Ashera kuikui wapan koutikukei,

⁴hoba BUNYUBOU haoeneibü pisibou Mühghaü lamla, hoba ngühkhüm hoba sakkubü kümla sengkukei.

⁵Tokei Jihudabü sangnyu pendou ka haoei shongh lemshang hoba chanyueibü noksa shuong sunglangkukei, hoba hao phanga sangle kho hakso kikei.

⁶Hobaje haoei Jihudaa lapheishon sangnyu shuong kümbei; aishanga kaon- yek kho küpjemetnyu kikei, hoba khübü po shuonga hao wapyo akitei; aieilausi BUNYUBOUei hao la hakso kukei.

⁷Aishanga haoei Jihuda to laukei, “Senei habü sangnyu kümbho, hoba khübü kho kümthang hoba lapheishon thon bakhün hoba thangtetei kaijembho, kaonyek kho tokei seneibü, aieilausi senei BUNYUBOU seneibü Mühghaü lambei, senei hao lambei hoba haoei sen la pendou aenei hakso kukei.” Hibü haoenei kümbei hoba ongayasetham kikei.

⁸Hobaje Asaei saolang aih hoba aubu jungbü lakoubü tan che kikei. Jihuda ka hajar saongao sem hoba Benjamin ka aih hoba lau jungbü hajar saoanto saolei khübü pendou maangkaangbü hoba hau yaangbü müt kikei.

⁹Hobaje haoen khulimbo Ethiopiabü Zera lakoubü dan million che hoba kailong saongao sem longkei, hoba Maresha sühko loukei.

¹⁰Kheijinei hao to haüyola Asa haukei, hoba haoenei Mareshaa Zefatha pholia lason lin küman lokei.

¹¹Hobaje Asaei BUNYUBOU haoeibü Mühghaü to ngekkei, hoba laukei, “BUNYUBOU, ka to limbo hau yaangbou hoba hau akibou kanglanga ao aki; kün to thuikai, O BUNYUBOU küneibü Mühghaü; aishanga künei ka to maanglemda, hoba kaibü nyena ho tan khulimbo kün louakei, O BUNYUBOU, no küneibü Mühghaü; kakhu limbo müt la thük tühüpti.”

¹²Hibü BUNYUBOUei Asa si Jihudabü thedanga Ethiopiabü thükkei; hoba Ethiopiabü hatla satkei.

¹³Hobaje Asa si hao yoa kibü shuong haoen Gerar sühko shijung haukei; hoba Ethiopiabü che ongkei langkei jouan aki shongko tuongtikei; aishanga BUNYUBOU thedanga hoba haoeneibü lakjaibou tan thedanga haoen mautikei, hoba haoenei shian apbü peisilei juong sunglangkei.

¹⁴Hobaje Gerar kaijembo sangnyu pendou haoenei shikei, aishanga BUNYUBOU to hatbü haoen thükto loukei; hoba haoenei sangnyu pendou phekenkei; aishanga soletbü juong haoen to kikei.

¹⁵Haoenei samkeisamukeibü chem shuongkei panan apbukei, hoba san juong hoba ut sunglangkei, hoba Jerusalem to ngaikei.