Read Chang Naga 2 LÜNGBÜDOBÜ 16 Bible Online

2 LÜNGBÜDOBÜ 16 - Chang Naga bible

2 LÜNGBÜDOBÜ 16

¹Asaei songdakbü po khujinto lakboubüa Israel Choba Baashaei Jihuda khulimbo angkei, hoba Jihuda Choba Asa jungto aokei üangla ayingsi alottila shanga haoei Rama kümbei.

²Kheijinei Asaei BUNYUBOUeibü chem hoba Chobaeibü chem thanshang ka chandinam si hon sungkei hoba khübü kho Damaskaa kibü Seria Choba Benhadad jungto hautiko laukei,

³“Kübou si kabou ham kanglanga kibü tegü seti kanglanga thangjam kikho; chühashi, ngei ka jungto chandinam hoba hon hautida; hauashi, Israel Choba yoka kan thangjam leiluashi, khoei ong haoei kü ka sukngailanglabü.”

⁴Hobaje Benhadedei Asa Choba to ngüha lekei, hoba Israelbü sangnyu shuong khulimbo haoei lakoubü shuong dan thükto lajamleibü shuong hautikei, hoba haoenei Ijon, Dan, Abelmaim, hoba Naftali thanshang sangnyu pendou shian apbei.

⁵Hobaje ladang Bashaei kho ditkei, haoei Rama kümbü ka nangkei, hoba haoeibü kümsilei thaktikei.

⁶Kheijinei Asa Chobaei Jihuda pendou sungkei, hoba Bashaei chem dangko kibü Rama laang hoba bu haoenei sunglangkei, hoba khübü khoei haoei Geba si Mizpa kümbei.

⁷Kho chaloua Asa Choba jungto thuseibou Hanani loukei, hoba hao to laukei, “Nyi BUNYUBOU kaibü Mühghaü to maangalembo Siriabü Choba to maanglembü haangjung ka ka Siriabü lakjaibü dan lintikua.

⁸Ethiopiabü hoba Libiabü kailong shuong hoba koli sepai shuong lakoubü dan juong aying lo? Khei yingsikei nyi BUNYUBOU to maanglemsije haoei haoen kaibü ik to kukei.

⁹Aishanga aoyoueibü maangpon BUNYUBOU aenei tükde ki haoen shanga haoeibü hau lenla kaodak khümbo thüka haoeibü nyek hau longai dogo nongaida. Khünei nyi ngoualoua küma; aishanga tou ka jaüanje nyi wapyo kilabü.”

¹⁰Kheijinei Asaei thuseibou to maangpokkei, hoba hao thüngshanga phokei, aieilausi kho haangjung haoei hao to khauangkei. Hobaje khüto yoko Asaei müt at üeisanou akiko khonkutikei.

¹¹Asaeibü kümsilei khangbü ka thonbü sühko, Jihuda hoba Israel Choba shuong lea doan kia.

¹²Haoei songdakbü po khujinto güboubüa Asaeibü youa shat baukei, hoba haoeibü shat kho aeibou amaiko yeikei; khei yingasikei haoeibü shat shanga haoei BUNYUBOU alam, lausikei daktar shuong ong lambei.

¹³Hobaje haoei songdakbü po saonyito che boubüa haian haoeibü pisibousi shuong yoa yepbei.

¹⁴Haoenei hao Dawid sangnyua hoba haoei jakan phobü heea khünkei, hoba ponlem maibü hoba ponlem phang phanga hibü moli ngebü shanenbüei lamlebüei nyakbü shen haoei phokei hoba hao hangenko haoenei wan yaang metkei.