Read Chang Naga 2 LÜNGBÜDOBÜ 17 Bible Online

2 LÜNGBÜDOBÜ 17 - Chang Naga bible

2 LÜNGBÜDOBÜ 17

¹Hobaje hao shou Jehosha- fatei hao jeiko songdakkei; hoba Israel khulimbo hau king- aikei.

²Hobaje lapheishon kümbü Jihudabü sangnyu pendoua haoei sepai phokei hoba Jihuda kaodaka hoba Efraim sangnyu shuong laobou haobou Asaei sungkei khünei sepai lombü dan phokei.

³Hobaje BUNYUBOU Jehoshafat yoa kikei, aieilausi haoei haobou Dawid shaangla paibü lamnyua paikei hoba haoei Baal alam;

⁴lausikei haoei haoboueibü Mühghaü lambei, hoba haoei sakkubüa paikei, hoba Israelbüei kümbü phai asem.

⁵Hibü haoeibü ika sangle kaangtikei; hoba Jihudabü pendouei Jehoshafat jungto jongsak sungbakei; hoba haoei nyaksinam hoba nyensang nyenhang juong kikei.

⁶Hobaje BUNYUBOUeibü lamnyua haoeibü maangpon kaangkhühtham kikei, hoba aeila leko Jihuda ka haoei shongh khua lemshang hoba Ashera sungan aptikei.

⁷Tokei haoei songdakbü sembou poa haoei leiyeibü Benhail, Obadia, Zekharia, Nethaniel, hoba Mikaia, Jihuda sangnyu shuonga songlenla hautikei.

⁸Hobaje haoen yoa Levibü Shemaia, Nethania, Zebadia, Asahel, Shemiramot, Jehonathan, Adonija, Tobija, hoba Tob Anonija, khübü Levibü yoa Elishama hoba Jehoram ungshedbou shuong hautikei.

⁹Hobaje BUNYUBOUeibü ngühkhüm le haoen yoa jungan haoenei Jihudaa songlenko haukei, hoba haoenei Jihudabü sangnyu pendou shoongko mütli yoa songlenkei.

¹⁰Hobaje Jihuda kaijembo kibü sangle pendou thüka BUNYUBOU to hatbü kikei, hibü Jehoshafat khulimbo haoenei awapyo.

¹¹Hobaje Filistiabü ateije Jehoshafat la jongsak sungbakukei, hoba khüm shanga chandinam kukei; hoba Arabiabüeikei hao la sanlon paang hajar nyetto saongao nyet sungbakukei.

¹²Hobaje Jehoshafat aeibou yaangenkei; hoba haoei Jihudaa laang chem hoba thanshang sangnyu shuong kümbei.

¹³Hobaje Jihuda sangnyu shuonga haoei nyaksinam juong jankuko kikei, hoba Jerusalema hau yaangbü lakjaibü shuong kikei.

¹⁴Hobaje pithen bouthen haangphai ka webü hai kikei; Jihuda ka hajar thüka leiyeibü, Adna lajamleibou, hoba hao yoa hau yaangbü wapyobü müt hajar saongao sem;

¹⁵hao to thenbou kho Jehohanan, lajamleibou, hoba hao yoa hajar saoanto saolei,

¹⁶hoba hao to thenbou Amasia, Zikrieibü shou, haoei jembü lolo BUNYUBOU la maanglansele kukei, hoba hao yoa lakjaibü müt hajar saoan,

¹⁷Benjamin ka Eliadas lakjaibou müt che, hao yoa lau si aih jungbü hajar saoan,

¹⁸hoba hao to thenbou Jehozabad yoa hajar sao ngaoto saolei wapyola lamlean kibü.

¹⁹Lapheishon shebü sangnyu shuonga Jihuda pendoua Chobaei apyobü Chobaeibü kümaleia kikei.