Read Chang Naga 2 LÜNGBÜDOBÜ 18 Bible Online

2 LÜNGBÜDOBÜ 18 - Chang Naga bible

2 LÜNGBÜDOBÜ 18

¹Tou Jehoshafat nyaksinam hoba nyenhang juong kikei; hoba haoei Ahab to yen lambei.

²Hobaje po shisho kian hao Ahab jungto Samaria to yankei. Hobaje Ahabei sanlon hoba masu juong hao shanga hoba hao yoa kibü shanga haitikei, hoba hao yoa Ramoth Gilead khulimbo angla thungeijangeikei.

³Hobaje Israelbü Chobaei Jihudabü Choba Jehosha- fat to laukei, “No kü yoa Ramoth Gilead to longasao?” hoba haoei hao to jongaikei, “Ngo no tegü ong, hoba ngeibü mütli kaibü mütli tegü ong ki; hoba kün ka yoa wapyoa yolabü.”

⁴Hobaje Jehosha- fatei Israel Choba to laukei, “Ngei sudajada, tat BUNYUBOUeibü ngüh shanga phean chühashi.”

⁵Kheijinei Israel Chobaei ungshedbou shuong kamshaitikei, müt saongao lei, hoba haoen to laukei, “Kün Ramoth Gilead lason to haula si ngei haiyeila?” hoba haoenei laukei, “Angashi, aishanga Mühghaüei Chobaeibü ik to jinkulabü.”

⁶Lausikei Jehoshafatei laukei, “BUNYUBOUeibü thuseibü lubü che ongkei aki lo?”

⁷Hobaje Israel Chobaei Jehoshafat to laukei, “BUNYUBOU to phela shanga tokei müt che, Imlaeibü shou Mikaia kia; lausikei ngei hao to mangsenda, aieilausi haoei ladangkei kü shanga maibü atetenkuda, lausikei ponpen amaibü ong tetenkuda.” Hobaje Jehoshafatei laukei, “Chobaei khei telauma.”

⁸Kheijinei Israel Chobaei leiyeibü che ngakei hoba laukei, “Imlaeibü shou Mikaia tongde leiba.”

⁹Tou Israelbü Choba si Jehoshafat Choba hele lean Choba setshanga setan kikei; hoba Samaria bakhün to atshang amshanga haoen setan kikei, hoba haoen thedanga thuseibü pendouei tetenko kikei.

¹⁰Hobaje Kenaanaeibü shou Zedekiaei jembü lolo namjuei laang kümbei hoba laukei, BUNYUBOUei hai lauda, “Habüei kanei Siriabü haoen amauti shongko kanei aüan aplabü.”

¹¹Hobaje thuseibü pendouei khei tetenkei hoba laukei, “Ramoth Gilead to angashi hoba thük hapshi; BUNYUBOUei kho Chobaeibü ik to kulabü.”

¹²Hobaje Mikaia ngala hautibou ngühlang künbouei laukei, “Chühashi, thuseibü pendouei Choba shanga ngüh maibü jetei ong kia, kaibü ngühkei haoeneibü tegü yingshi, hoba ngühmai laushi.”

¹³Lausikei Mikaiaei laukei, “BUNYUBOU lang ki shongko ngeibü Mühghaüei ai lauda, kho ngei laulabü.”

¹⁴Hobaje hao ladang Choba jungto loukei, Chobaei hao to laukei, “Mikaia, kün Ramoth Gilead to wapyola angla si ayingsi ngei haiteila?” Hobaje haoei jongaikei, “Angashi hoba thük hapshi, haoen kaibü ik to kulabü.”

¹⁵Lausikei Chobaei hao to laukei, “Ngei ladüngnei ka to BUNYUBOU nyena tükde ong lenshi dogo theyolanyoko lentila?”

¹⁶Hobaje Mikaiaei laukei, “Ngei Israelbü pendou sanlombü akibü tegü linan hapa;” hoba BUNYUBOUei laukei, “Habü ho bunyu akibü, mütshuong sangmaia jembü chem to ngaiashi.”

¹⁷Hobaje Israel Chobaei Jehoshafat to laukei, “Ngei ka to kü shangabü haoei amaibü to liman aikei maibü atetenlabü dogo alen lo?”

¹⁸Hobaje Mikaiaei laukei, “Hibü BUNYUBOUeibü ngüh ditashi; ngei BUNYUBOU Choba setshanga setan, hoba khuthükbü tan pendou haoeibü mae aenei hoba nanaenei loan hapa;

¹⁹hoba BUNYUBOUei laukei, ‘Aoei Israelbü Choba Ahab, hao Ramoth Gilead to angan tuongtila shanga suletla?’ Hobaje cheei che laukei, hoba lubü cheei che laukei.

²⁰Kheijinei sou che thedang aeto loukei, hoba BUNYUBOU junga loan laukei, ‘Ngei hao suletlabü.’ Hobaje BUNYUBOUei hao to laukei, ‘Ai huoneiyouei?’

²¹Hobaje haoei laukei, ‘Ngo haulabü, hoba haoeibü thuseibü shuong sembung pendoua yepeijawebü soushou jinkulabü.’ Hobaje haoei laukei, ‘Nyi hao suletlabü, hoba nyi thük haplabü; hauashi hoba kho tegü kümashi.’”

²²Hibü tou chühashi, “BUNYUBOUei khübü kaibü thuseibü sembunga jinkua; BUNYUBOUei ka shanga amaibü joyoa!”

²³Kheijinei Kenaanaeibü shou Zedekia nyangko loukei hoba Mikaiaeibü omlanga ipbei, hoba laukei, “BUNYUBOUeibü soushou kü jungka ka to joyola laobou lam ka haukei?”

²⁴Hobaje Mikaiaei laukei, “Chühashi, no lolo hula shanga shemjang maangkabü to atbü chaloua nyi haplabü.”

²⁵Hobaje Israel Chobaei laukei, “Mikaia lapan leiba, hoba sangnyua governor Amon jungto hoba Chobaeibü shou Joash jungto leian hauashi;

²⁶hoba lenashi, Chobaei hai lauda, ho müt thüngshanga phoashi, hoba ngo sangmaia alongei shongko nyak shibang hoba dei shibangei pangteishi.”

²⁷Hobaje Mikaiaei laukei, “No sangmaia longeialonga BUNYUBOUei kü to ajoyo;” hoba haoei tokei laukei, “Mütli pendouei ngei laubü ngüh kho ditashi!”

²⁸Hibü Israelbü Choba si Jihudabü Choba Jehoshafat Ramoth Gilead to angkei.

²⁹Hobaje Israel Chobaei Jehoshafat to laukei, “Ngei ngo lolo hukoshepbo lason to atlabü, lausikei nyije kaibü hele leashi.” Hibü Israel Chobaei hao lolo hukoshepbo hele lekei; hoba haoen lason to haukei.

³⁰Tou Siriabü Chobaei haoeibü kailong shuong thüka lajamleibou shuong la sakkuko laukei, “Hanbü ayingsi yaangbü to tewapyo, lausikei Israelbü Choba to ong wapyoshi.”

³¹Hobaje ladang kailong lajamleibou shu- ongei Jehoshafat hapbei, haoenei laukei, “Ho Israelbü Choba kho.” Hibü hao khulimbo wapyola haoen sepeikei, hoba Jehoshafatei ngekkei, hoba BUNYUBOUei hao to thuikei, hoba Mühghaüei haoen hao ka kuktikei.

³²Aishanga ladang kailong shuong lajamleibouei kho Israelbü aying dogo ngekei, hao shijung haubü ka haoen sepeikei.

³³Lausikei müt cheei haoeibü lau mangthem bühkei, hoba Israelbü Choba la phakshuok to kipan jinkukei, hibü haoei haoeibü kailong leibou to laukei, “Sepeiashi, hoba lason ka ngo langshi, aieilausi ngo leilua.”

³⁴Hobaje khünyet lashuok kangan kikei, hoba Israelbü Chobaei haoeibü kailonga angan setan Siriabü ae yeian chasemlam asühshongko haiteikei; hoba chanyu neplamto hao haikei.