Read Chang Naga 2 LÜNGBÜDOBÜ 2 Bible Online

2 LÜNGBÜDOBÜ 2 - Chang Naga bible

2 LÜNGBÜDOBÜ 2

¹Tou Solomonei BUNYUBOU nyen shanga lembüchem che hoba haoeibü sangle shanga chem che dangla maangangenkei.

²Hobaje onat künla hajar anjinlei hoba shongh kaodak ka laang jakla hajar saolei, hoba haoen thüka chühla hajar semto saongao lak Solomonei janletkukei.

³Hobaje Solomonei Taireibü Choba Hiram jungto ngühlang hautiko laukei, “Nyi kübou Dawid to jungeibü hoba hao lolo kishang chem che dangla cedar bu hao la kutibü tegü, kho tegü kümbüma.

⁴Chühashi, Israel shanga ponpen jungeila sakkubü tegü hao thedanga ponlem teibü jen jikla shanga hoba Mühghaü thedanga phobü wentek athakko lemla, hoba ngeyang si chasem juokbü lembü shanga, Nounyet shuong hoba lit haanbü shuong hoba BUNYUBOU kaneibü Mühghaüei takletkubü lema longa hao la kho khümbo kuko BUNYUBOU ngeibü Mühghaü nyen shanga ngei chem che danglabü kia.

⁵Ngei dangla kibü chem kho yaangbü kilabü, aishanga küneibü Mühghaü, mühghaü pendou tokei yaangbou ki.

⁶Lausikei müh, khei thükkabou müheikei hao takan chühla athüksije, aoei hao la chem che dangkula thükla? Hao thedanga juokbü lembü kulabü to limbo hao shanga chem che dangkulabü ngokei aoma lo?

⁷Hibü tou hon, chandinam, chinam hoba namkung hoba nakthüngan sakbü si laü mühson, leiphe kheibü kümda, tokei noksa küman jinla minbü Jihuda hoba Jerusalema kü yoa kila ngebü aoyou kübou Dawidei phoan ki haoen yoa kila shetenbü müt che kü jungto hautishi.

⁸Tokei kü la Lebanon ka cedar bu, fir bu si algum bu kutishi, aieilausi Lebanona kaibü sambü shuongei wa maian latda dogo ngei ngea. Hobaje chühashi, ngeibü sambü shuong kaibü sambü shuong yoa kilabü.

⁹Khei kü shanga wa juong lamlelabü longlabü aieilausi ngei dangla kibü chem kho yaang hoba maangpanglabü kilabü.

¹⁰Hobaje chühashi, kaibü khangenbü bu akbü shuong la ngei whet shausiyung takbü hajar saoche, barli youshou takbü hajar saoche, ih shongmok hajar saoche hoba onang shongmok hajar saoche kulabü.”

¹¹Kheijinei Tairbü Choba Hiramei le chenei hai jongaiko Solomon jungto hautikei, “BUNYUBOUei jembü mütli sanoubü ka haoei no haoen thüka Choba yeitikei.”

¹²Hiramei tokei laukei, “Israelbü BUNYUBOU Mühghaü haübou yingshi, aoei müh si kao kümbei, aoei Dawid Choba la songsihon kibü shou che kukei, jembü songsihon jungeienbü hoba ditenbü jongsak kubüei aoei BUNYUBOU shanga lembüchem che hoba haoeibü sangle shanga Chobaeibü chem che danglabü ki hao haübou yingshi.

¹³Hobaje ngei tou minbü ngebü müt diten shuokenbüei shenbü Huram hautida.

¹⁴Daneibü yaksa shou yoa yaksa cheeibü shou hautia, hoba bou kho Tairbü müt, hon, chandinam, chisak nam namkung, laang, bu, hoba nakthüngan sakbü, mühson, hoba siieibü son, leiphe hoba phemba neisimei, hoba noksa jinshang kümsilei phang pendou kümla hoba hao la kümla kubü phang pendou kümla thükbü kaibü kümsileia libünyenbü mütshuong yoa ngeibü BUNYUBOU Dawid kabou haoeibü kümaleia libünyenbü shuong yoa kümla haoei ditletakei.

¹⁵Hibü tou khei yingsije whet si barli youshou onang hoba ih laobou shanga ngeibü bunyuei joyoa kho haoei khangenbü shuong jungto nahautikua.

¹⁶Hobaje lajuche khamda Lebanon ka künei bu aklabü, hoba kho longei yungnyua Jopa to sungbalabü, khüka nyi kho Jerusalem to künan anglabü.”

¹⁷Kheijinei Solomonei haobou Dawidei shaangla webü tegü, Israel kaoa kibü yungkük yungthang yen pendou wean chühsi hajar saongaoto anjinsemto sem hoba saongao lak yingan kikei.

¹⁸Haoen hajar anjinlei la onat künla kukei, hajar saolei shongh kaodaka laang jakla hoba mütshuong kümsilei kümtila leiyeibü hajar semto saongao lak.