Read Chang Naga 2 LÜNGBÜDOBÜ 20 Bible Online

2 LÜNGBÜDOBÜ 20 - Chang Naga bible

2 LÜNGBÜDOBÜ 20

¹Kho phaia Moabbü, Ammonbü, hoba haoen yoa Meunbü Jehoshafat khulimbo wapyola loukei.

²Hobaje müt at louan Jehoshafat to lenkei, “No khulimbo tan yaangbü che yungnyu khatjung hauan Siria ka louada, hoba chühashi, haoenei Hazazon Tamar (kho Engedi) shia.”

³Hobaje Jehoshafat hatkei, hoba hao lolo BUNYUBOU lamla meimeikei, hoba Jihuda khümboa mühei nyengla huiletkei.

⁴Hobaje BUNYUBOU ka thuibü lamla shanga Jihudabü liko yoshaikei, khei Jihudabü sangnyu pendou ka haoenei BUNYUBOU lamla loukei.

⁵Hobaje Jihuda si Jerusalem thangyena BUNYUBOU chema haanbü chemsoa Jehoshafat lokei,

⁶hoba laukei, “O BUNYUBOU, küneibü pisibou Mühghaü, khuthüka no Mühghaü aying lo? hoba phangshuong sangle pendou thüka no songdakbou aying lo? Kaibü ika sei si hau kia, hibü aoeikei kakhu limbo aloenenda,

⁷O küneibü Mühghaü, ho kaonyeka kibü shuong kaibü mütli Israelbü thedang ka shian apan kaibü thangbou Abraham lilabü la ponpen shanga kukei aying lo?

⁸Hobaje haoen khünei kida, hoba kaibü nyen shanga hanei saoposhang che kümbei hoba laukei,

⁹Kün thükto thushed loualonga in, matjembü, shatsinyat lim, ayingsi mühsinou loualonga, künei ho chem thedanga hoba ka thedanga lolabü, (aieilausi ho chema kaibü nyen kia) hoba küneibü khonsaka ka to ngeklabü, hoba nyi ditlabü hoba nyi khümenlabü.

¹⁰“Hobaje tou Ammon, Moab, Seir shongh mütshuong to chühashi, aoyou Ijep ka loujinei nyi Israelbü la ashiti.

¹¹Chühashi, nyi kün la phet phanla kubü, ka shangabü ka kün shian apla louan kün la haoenei pailettiko lauda.

¹²O küneibü Mühghaü, nyi haoen thüka mat jemlep lo? aishanga kün khulimbo loubü ho tan yaangbü khulimbo kün hau aki, ai kümla künei angekei, lausikei küneibü nyek ka thüka kia.”

¹³Hobaje Jihudabü pendou BUNYUBOU thedanga haoeneibü shousi yaksi hanbüshou sühko yoan lokei.

¹⁴Kheijinei kaman kibü shuong yoa Zekhariaeibü shou Jahaziel, Benaiaeibü shou Jeieleibü shou, Mathaniaeibü shou Asaf shousi shuong Levibü thükto BUNYUBOU soushou loukei.

¹⁵Hobaje haoei laukei, “Ditashi, Jihuda si Jerusalema kibü pendou hoba no Jehoshafat Choba; BUNYUBOUei hai lauda, ‘Kan tehüt, ayingsi ho tan yaangbü shanga maang apbo teki; aishanga lason kho kaneibü aying, BUNYUBOUeibü ki.

¹⁶Ngiet kanei haoen khulimbo yanashi, chühashi, haoen Ziz aeto angbü lam to loulabü, hoba Jeruel yam chaangbou pholi thon aenei kanei haoen haplabü.

¹⁷Kho lasona kanei wapyola akhamlabü; jembü loshanga hoba kan yoa BUNYUBOU khümenbü kho to chüh- ashi, O Jihuda hoba Jerusalem tehüt; ayingsi maang tüp; ngiet haoen khulimbo hauashi; aishanga BUNYUBOU kan yoa kia!’ ”

¹⁸Hobaje Jehoshafatei jembü thenyek kaoa shatko khüpetkei; hoba Jihuda si Jerusalema kibü pendou BUNYUBOU thedanga khü- petan lembei.

¹⁹Hobaje Levibü Kohateibü shousi shuong; Koraeibü shousi shuong, ngühlang yaangbüei BUNYUBOU Israel Mühghaü nyen sangla lokei.

²⁰Hobaje haoen ngeyang enyu pikei hoba Tekoa yam to haukei, hoba haoen haujinei Jehoshafat lokei hoba laukei, “Kü to ditshi, O Jihuda si Jerusalema kibü shu- ong; BUNYUBOU kaneibü Mühghaü to mailemshi, khünei kan khümenlabü, haoeibü thuseibü to mailemshi, khünei kan thük haplabü.”

²¹Hobaje haoei müt shuong to wapyoan phaia sepai tan thedanga, saopobü hele lean BUNYUBOU to chia laulabü hoba nyen sangko BUNYUBOU la nyensang kuashi, aieilausi haoeibü üeisanou ponpen kida, dogo haoen haujinei laulabü haoei pienkei.

²²Hobaje ladang haoenei chia laula hoba nyen sangla khangkei, haoen khulimbo louan kibü Ammonbü, Moabbü, hoba Seirbü shongh müt shuong khulimbo BUNYUBOUei thoan kiteikei, khünei haoeneibü lason kho jangtikei.

²³Aishanga Ammonbü si Moabbü shousi shuong Seir shongha kibü shuong khulimbo lokei, haoen khümbo haitila hoba mautila shanga hoba ladang haoenei Seira kibü shuong langlangko thonan aptikei, mütpem wekoei cheei che, cheei che mautila thuikei.

²⁴Ladang Jihudabü lamang lapheishon khüto loukei, haoenei shuong yaangbü aeto chühkei, hoba chühashi, haoen kho kaoa tuongan kibü haibü maang shuong kikei, che ongkei asaten.

²⁵Ladang Jehoshafat hoba hao müt shuongei haoen ka makletbü nyaksinam sungla loukei, hoba haoenei masu juong, peisilei shu- ong, neisimei hoba namsek peisilei shuong laobou haoenei jembü shanga touje akünkhümlabü lele yoshaikei; hoba peisilei yoshaijinei haoen semnyet sühko kikei, kho juong kikei.

²⁶Hobaje sembounyet haoenei haoen lolo Beraka pholia kamshaikei; aishanga haoenei khünei BUNYUBOU haükukei, khei yingbü khoei kho kaonyek to Beraka pholi dogo lauda.

²⁷Kheijinei haoen Jerusalem to nyibou olinyoko haula haoen thedang to Jehoshafat shaangan Jihuda si Jerusalembü mütpem weko ngaikei, aieilausi BUNYUBOUei haoeneibü dangbou thüka haoen olinyotikei.

²⁸Hobaje haoen Jerusalem to BUNYUBOU chem to pithung, kongkin si teklaang jungan loukei.

²⁹Hobaje ladang Israelbü dangbou shuong khulimbo BUNYUBOUei wapyokei dogo ditkei, kaonyek kabü Choba sangle pendouei Mühghaü to hatkei.

³⁰Hibü Jehoshafateibü sangleje sangsembo kikei, aishanga haoeibü Mühghaüei hao la hao kaijembo hakso kukei.

³¹Hobaje Jehoshafatei Jihudaa songdakkei; haoei songdakla khangjinei po khujin to ngao kikei; hoba Jerusalema haoei po saoto ngao songdakkei, hoba haoeibü nyu nyen Azuba, Shilhieibü nouyangshou kikei.

³²Hobaje haoei haobou Asa paibü lama paikei, hoba BUNYUBOU thedanga ai maikei kho kümbo khoka abang.

³³Khei yingsikei shongh lemshangje sungan üp; ayingsi mütshuongei haoeneibü pisibou Mühghaü to maangkuko akidei.

³⁴Tou Jehoshafateibü kümsilei khangbü ka thonbü sühko Hananieibü shou Jehu ngühli laobou Israelbü Choba shuong ngühlia jinan ki, khünei habü ho doan kia.

³⁵Kho phaia Jihudabü Choba Jehoshafatei Israelbü Choba Ahazia aoei amaiko kümbei, hao lolo hao yoa yokei.

³⁶Hobaje haoei hao yoa Tarshish to haula long kümla yokei, hoba haoei Eziongebera long shuong kho kümbei.

³⁷Kheijinei Mareshabü Dodavahueibü shou Eliezerei Jehoshafat khulimbo tetenko laukei, Ahazia yoa nyi no lolo yosije, BUNYUBOUei kaibü kümaleia leilubü longtilabü, hoba long shuong kho leiluan apbei khünei haoen Tarshish to ohauen.