Read Chang Naga 2 LÜNGBÜDOBÜ 21 Bible Online

2 LÜNGBÜDOBÜ 21 - Chang Naga bible

2 LÜNGBÜDOBÜ 21

¹Hobaje Jehoshafat bousi shuong yoa yepbei hoba Dawid sangnyua bousi shuong yoa khünkei; hoba haoeibü shou Jehoramei hao jeiko songdakkei.

²Haoeibü nasi shuong kho, Jehoshafateibü shousi shuong kikei; Azaria, Jehiel, Zekharia, Azarishu, Maikel, hoba Shefatia, habü pendou kho Israelbü Choba Jehoshafateibü shousi shuong kikei.

³Hobaje haoeneibü bouei haoen la jongsak yaang chandinam, hon hoba Jihudaa kümthang thangan kibü sangnyu shuong yoan kukei, lausikei sangleje Jehoram la kukei, aieilausi haoeibü shou jaishoubou kikei.

⁴Tou ladang Jehoram boueibü sangle thüka chingkei, hoba hao lolo hau kikei haoei nasi shuong pendou hoba Jihudabü konglebü at inei wapettikei.

⁵Jehoramei songdakla khangjinei po khujin to nyi kikei, hoba haoei Jerusalema po set songdakkei.

⁶Hobaje Ahab chempenei kümbü tegü haoei Israelbü Choba shuong lama paikei; aishanga haoeibü yak Ahabeibü nouyangshou kikei; hoba BUNYUBOU junga ai amai kho haoei kümbei.

⁷Khei yingsikei BUNYUBOUei Dawid chung amauti, aieilausi haoei Dawid to theyolanyobü che kümbei, hoba haoei hao la hoba hao shou la ponpen shanga wanthung che kula thekuan kikei.

⁸Haoeibü songdak jihsiphaia Edomei Jihuda sangle khulimbo meimeikei, hoba haoeibü Choba che phokei.

⁹Kheijinei Jehoramei haoeibü lajamleibü shuong hao yoa leian danjung haukei, hoba nangnak hao pienkei, hoba hao kaijembo kibü Edombü hoba kailong thüka lajamleibou haitikei.

¹⁰Hibü tat sühko Jihuda sangle khulimbo Edom loakei. Kho chaloua Libnaia haoeibü sangle khulimbo lokei, aieilausi haoei bousi shuongeibü Mühghaü, BUNYUBOU phai senan ngaitikei.

¹¹Aeila leko haoei Jihuda shongh kaodaka shongh lemshang kümbei, hoba Jerusalema kibü shuong pejapelako yeitikei, hoba Jihudabü ayingbü to leian haukei.

¹²Hobaje Elija thuseibou ka hao jungto ledo che sungbakei, hoba weko laukei, “BUNYUBOU, kabou Dawid Mühghaüei hai lauda, ‘Kabou Jehoshafateibü youmoa apaibü haangjung, ayingsi Jihudabü Choba Asaeibü youmoa apaiko,

¹³Israelbü Choba shuong youmoa paisije, hoba Jihuda si Jerusalema kibü shuong Ahab chempen shuongei kümbü tegü, pejapelako hautisije, hoba kaboueibü shousi shuong katoje maibou kibü kaibü nasi shuong nyi haitisije;

¹⁴chühashi, BUNYUBOUei kaibü shousi shuong, kaibü yaksi shuong, hoba nyi kibü pendou to shieikoelabü.

¹⁵Hobaje no lolo shatsinyat amaibü che kaibü shimung shat, khei chalou angbou shatei nyatei kaibü oksishiang along shongko shieikoelabü.’ ”

¹⁶Hobaje Jehoram khulimbo BUNYUBOUei Filistiabü, Arabbü, Ethiopiabü, nyangko kibü shuong thungeiko khauang longtikei;

¹⁷hoba Jihuda khulimbo haoen angkei, hoba khüto tuyetjung lotkei, hoba Chobaeibü chema kibü nyaksinam pendou sunglangkei, haoeibü shousi shuong hoba yak kei yoan khei yingbü khoei nashoubou tham Jehoahaz to limbo haoeibü shou che ongkei ajou.

¹⁸Hobaje ho pendou phaiaje BUNYUBOUei haoeibü shimunga ladangkei amailabü shat che hautikei.

¹⁹Jih sühbüa po nyi kian phaia shatei haoeibü oksishiang nujung longan khonku yaanga haikei. Bousi shuongeibü haibü wanjik tegü hao haibü wanjik aküm.

²⁰Haoei songdak la khangjinei po khujin to nyi kikei hoba haoei Jerusalema po set songdakkei, hoba aoei awaangko hao bangjung satkei, hoba haoenei hao Dawid sangnyua khünkei, lausikei Choba shuongeibü heea akhün.