Read Chang Naga 2 LÜNGBÜDOBÜ 23 Bible Online

2 LÜNGBÜDOBÜ 23 - Chang Naga bible

2 LÜNGBÜDOBÜ 23

¹Tou po nyetboubüa Jehoiada ungshedbou hao hau kingaikei, hoba saongaobang lei- yeibü, Jerohameibü shou Azaria, Jehonaneibü shou Ishmael, Obedeibü shou Azaria, Adaiaeibü shou Maasela, hoba Zikhrieibü shou Elishafat yoa theyolanyokei.

²Hobaje haoen Jihudaa shoongeikei hoba Jihudabü sangnyu pendou ka Levibü hoba Israelbü chung khuleibü shuong leishaikei hoba haoen Jerusalem to loukei.

³Hobaje Mühghaüeibü chema kamshaibü pendouei Choba to theyolanyobü che lekei. Hobaje haoei haoen to laukei, “Chühashi, Dawideibü shousi shuong shanga BUNYUBOUei joyobü tegütham, Chobaeibü shouei tongde songdaklabü.

⁴Kanei kümlabü kümsilei ho, kan ungshedbou shuong hoba Levibü aoyou Nounyet kümlabü kümsilei wanan longeilaje phejan sema che je koukhün lombü;

⁵hoba phejan sema che chemshang bakhüna kilabü.

⁶ungshedbou shuong hoba khangenbü shuong Levibü to limbo aokei BUNYUBOU chem to alotti, haoenje atla thükkei aishanga haoen saopobü ki, lausikei müt pendouei BUNYUBOUei sakkubü jungeijan.

⁷Levibü mütpem weko lulueibü in si aubu jungan Choba kaijembo kilabü hoba aoyou lotlaje haitilabü. Hao ladang lotlaje hoba ladang longlaje kan Choba yoa kishi.”

⁸Levibü hoba Jihudabü pendouei ungshedbou Jihoiadaei sakkubü tegü pendou kümbei. Haoen mütpem weko aoyou Nounyet kümsilei wanla, aoyou kümtoleito haula haoen yoto haoeibü müt shuong leian loukei; aieilausi ungshedbou Jehoiadaei janyinbü kho linjung asattiko kikei.

⁹Hobaje ungshedbou Jeho- iadaei saongao thüka leiyeibü shuong la Dawideibü Mühghaü chema kibü aubu si aih shuong khümbo kuan apbei.

¹⁰Hobaje haoei mütpem weko lulueibü ika in si aubu jungan mae chemphei ka nanae chemphei sühko Choba kaijembo lemshang hoba chem nyangko apyokei.

¹¹Kheijinei haoenei Chobaeibü shou leian longkei hoba hao la Chobaeibü khun hankukei, hoba hao la thebülanbü kho kukei, hoba hao Choba yeitikei; hoba Jehoiada hoba haoeibü shousi shuongei hao la onang naangkukei; hoba haoenei laukei, “Choba haangkhu onko kishi!”

¹²Ladang Athaliaei müt lang- yobü ngühlang hoba Choba nyen sangbü ditkei, sao mütshuong jungto BUNYUBOUeibü chem to loukei;

¹³saoei chühkei, hoba chühashi, Choba kho haoeibü thaonyu nyangko koukhüna sakan loan kikei, hoba lajamleibü si pithung metbü shuong Choba nyangko hoba kaonyek kabü mütshuong pendou olinyokei hoba teklaang metkei, chia laubü shuongei tokei kongkin kaangko nyensang chia lauko leiyeikei; kheijinei Athaliaei jembü neisimei jitnyinkei, hoba laukei, “Khüpettia! Khüpettia!”

¹⁴Hobaje Jehoiada ungshedbouei sepai saongao thüka lajamleibou shuong leian longkei, hoba haoen to laukei, “Sao kho lin kanglang khüto leian kaiyang; hoba sao phai to ao semlaje hao inei wapettiashi, aishanga ungshedbouei laukei, ‘BUNYUBOU chemaje sao tühaiti.’ ”

¹⁵Hibü haoenei sao to ik atkei, hoba kolieibü koukhün danko Chobaeibü chem khüto haukei, hoba khünei haoenei sao haitikei.

¹⁶Hobaje Jehoiadaei hao hoba mütshuong hoba Choba haoen pendou kanglanga khei haoen BUNYUBOUeibü mütli yinglabü dogo theyolanyobü che kümbei.

¹⁷Hobaje müt pendou Baal chem to haukei, hoba kho leilukukei, hoba haoeibü lemshang hoba haoeibü mangh noksa netla yeiko jangnyinkukei hoba Baal ungshedbou Mattan lemshang thüka haitikei.

¹⁸Hobaje BUNYUBOUeibü chem shanga Levi ngühkhümei sakkubü ungshedbou shuongei shean lenbü tegütham Mosa ngühkhüma doan kibü tegü olinyoko hoba chia lauko Dawidei sakkubü tegü Dawidei BUNYUBOUeibü chema jankuan kibü tegü BUNYUBOUeibü juokbü lembü kula Jehoiadaei lombü shuong pienkei.

¹⁹Hobaje BUNYUBOUeibü chem koukhüna den che asaopoko kialonga aokei üetla shanga koukhün lombü shuong haoei phokukei.

²⁰Hobaje haoei saongao thüka lajamleibü shuong hoba yaangenbü shuong, hoba mütshuong thüka governor shuong hoba kaonyeka kibü pendou leian BUNYUBOUeibü chem ka Choba kho hangan louyenkei, hoba haoen thükkabou koukhün danko Chobaeibü chem to loukei, hoba Choba kho Choba sangle setshang thüka settikei.

²¹Hibü kaonyeka kibü mütshuong pendou olinyokei, hoba sangnyu kho küpjembo kikei, hoba haoenei Athalia inei wapettikei.