Read Chang Naga 2 LÜNGBÜDOBÜ 24 Bible Online

2 LÜNGBÜDOBÜ 24 - Chang Naga bible

2 LÜNGBÜDOBÜ 24

¹Joash songdakla khangjinei po nyet kikei; hoba haoei Jerusalema po saonyi songdakkei, hoba hao nyueibü nyen Zibia Beersheba ka kikei.

²Hobaje ungshedbou Jehoiada salang sünga Joashei BUNYUBOU thedanga ai tükde kho kümbei.

³Jehoiadaei hao shanga yak mütnyi ngakukei, hoba bousu si yaksa shou kikei.

⁴Kho phaia Joashei BUNYUBOUeibü chem dangngaila dambei.

⁵Haoei ungshedbou si Levi shuong liko kamshaitian laukei, “Jihudabü sangnyu shuong jungto hauashi, hoba Israelbü pendou ka po che ka po che sühko kaneibü Mühghaü chem kümetla nam yoshaiashi, hoba kanei panteiyoko kümashi.” Lausikei Levi shuongei kho panteiko aküm.

⁶Hobaje Chobaei konglebou Jehoiada ngakei hoba laukei, “Jihuda si Jerusalem ka BUNYUBOU khangenbou Mosaeibü ngühkhüm neichem shanga khüm hebü Levibü shuong ka nyi aila ahi?”

⁷(Aishanga yaksa amaibü Athaliaeibü shousi shuongei Mühghaüeibü chem phekyetjung atan saüenbü peisilei pendou Baal shanga jungeikei)

⁸Hibü Chobaei sakkukei, hoba haoenei busen che kümbei hoba kho BUNYUBOUeibü chem khonga phokei.

⁹Hobaje Jihuda si Jerusalem pendoua Mühghaü khangenbou Mosaei yama Israelbü la hebütakbü sakkubü BUNYUBOU shanga helatakla ngetikei.

¹⁰Hobaje konglebü pendou hoba müt pendou olinyokei, hoba thon asüh shongko haoenei sungjung louan busen khünei jinkukei.

¹¹Hobaje ladang ong Levi shuongei busen kho Chobaeibü ikjaibü shuong jungto sungbakei, haoenei khünei nam juong hapjinei Chobaeibü dobou hoba thükkabou ungshedbouei busen kho kongku hoba kho sungjung hauan phoshang khünei phoku dogo kümbei. Kho tegü haoenei chalou angboua kümbei, hoba nam juong yoshaikei.

¹²Hobaje Choba si Jehoiadaei BUNYUBOUeibü chem ikjaibü shu- ong la kho kukei, hoba haoenei BUNYUBOUeibü chem kümetla namkung hoba chisaknam kümbüleibü shuong shanga munam kukei.

¹³Kho tegü kümbüleibü shuongei kümbei hoba haoenei kümsilei kho haoeneibü ikei kümjung haukei, hoba haoenei Mühghaüeibü chem kho küpjembo phokuko kho hau kitikei.

¹⁴Hobaje ladang haoenei yeikei, haoenei joubü nam kho Jehoiada si Choba jungto sungbakei, hoba khoei BUNYUBOU shanga thungsi phau lembü jihsiphaia jungeila hoba juokbü lembü shanga hoba ponlem hibü shanga phau hoba hon si chandinam thungsi phau kümbei, hoba haoenei Jehoiada salang sünga athakko BUNYUBOUeibü chema juokbü lembü kukei.

¹⁵Lausikei Jehoiada baushi hoba poei onan hao haikei, hao haijinei po saongao to khujin kikei.

¹⁶Hobaje haoenei hao Dawid sangnyu Choba shuong yoa khünkei, aishanga haoei Israela Mühghaü shanga hoba haoeibü lembüchem shanga maibü kümbei.

¹⁷Tou Jehoiada haian phaia Jihudabü konglebü leiyeibü shuong loukei hoba Choba suthetkei. Kheijinei Chobaei haoen ngüha lekei.

¹⁸Hobaje haoenei BUNYUBOU haoeneibü pisibou Mühghaü apyokei, hoba Asherim hoba heangsho lembei; hoba haoen kho shedbü shanga Jihuda si Jerusalem jungto maangshat loukei.

¹⁹Khei yingsi dogokei haoen BUNYUBOU jungto leian loula haoei haoen jungto thuseibü shuong hautikei, hoba haoenei haoen khulimbo tetenkei, lausikei haoenei aditku.

²⁰Hobaje Mühghaü soushou Jehoiada ungshedboueibü shou Zekharia thükto loukei, hoba mütshuong thüka hao lokei, hoba haoen to laukei, “Mühghaüei hai lauda, ‘Kan thusinaang amailabü, aieilausi kanei BUNYUBOUeibü ngühkhüm leiluda, kanei hao inletsi haoeikei kan inletkei.’ ”

²¹Hobaje haoei ngo khulimbo huon takkei hoba Choba sakkubüei BUNYUBOUeibü chemsophanga haoenei hao to laangei tetkei.

²²Kho tegü Joash Chobaei Zekhariaeibü bou Jeho- iadaei hao to sanou lenbü kho adamen, lausikei hao shou haitikei. Hao haijinei haoei laukei, “BUNYUBOUei ho ngean phok lamshima!”

²³Po thonlam toje Siriabü sepai shuong Joash khulimbo longkei, hoba haoen Jihuda si Jerusalem khulimbo loukei hoba müt yoa konglebü pendou mautikei, hoba haoen ka soletbü pendou Damaskabü Choba jungto hautikei.

²⁴Khei Siriabü sepai tan hanbü che ong lousi dogokei BUNYUBOUei haoen ik to tan aeibou yaangbü che khümbo kukei, aishanga haoenei haoeneibü pisibou Mühghaü BUNYUBOU inletkei, kho khei haoenei Joash thük to shieikoe amaiko kümbei.

²⁵Ladang haoenei hao aeibou leilutian apyoan satkei, haoeibü yaangenbü danei hao khulimbo huon takkei, aieilausi haoei Jehoiada ungshedboueibü shoueibü sii phinkei; hoba haoenei hao yepshanga haitikei. Hibü hao haikei, hoba haoenei hao Dawid sangnyua khünkei, lausikei haoenei hao Choba shuongeibü heea akhün.

²⁶Hao khulimbo huon takbü shuong kho Ammon sao Shimeateibü shou Zabad, hoba Moab sao Shimriteibü shou Jehozabad kikei.

²⁷Haoeibü shousi shuong shanga hao khulimbo onat juong shanga hoba BUNYUBOUeibü chem dangbü shanga Choba shuongeibü lea wanenbüa doakei, hoba haoeibü shou Amaziaei hao jeila songdakkei.