Read Chang Naga 2 LÜNGBÜDOBÜ 25 Bible Online

2 LÜNGBÜDOBÜ 25 - Chang Naga bible

2 LÜNGBÜDOBÜ 25

¹Amaziaei songdakla khangjinei hao po saoto ngao kikei, hoba haoei Jerusalema po saoto gü songdakkei; hoba haoeibü nyueibü nyen Jehoaddan Jerusalemsao kikei.

²Hobaje haoei BUNYUBOU thedanga ai tükde kho kümbei, lausikei maangpon tükdebüeije aying.

³Hobaje sangle kho haoeibü ika kaangkhühtham yeijinei hao bou haitibü sambü shuong kho haoei haitikei.

⁴Lausikei haoeneibü shousi shuongje haoei ühaiti, lausikei BUNYUBOUei Mosa ngühkhüm lea sakkubü shousi shuong shanga nyusibou ühailabü ayingsi nyusibou shanga shousi ühailabü dogo kibü tegütham haoei kümbei.

⁵Kheijinei Amaziaei Jihudabü mütli shuong kamshaitikei hoba haoen chung then kibü hima, Jihuda si Benjamin chung hajar hoba saongao leiyeibü shuong phanga phokukei, hoba haoei po saoche ka thükae pakkei, hoba wapyola hauenlabü phai hoba aubu si aih jungla thükbü hajar saongao sem kikei.

⁶Hobaje chandinam seret khujin bang atbü saongao lu haoei tokei Israel ka maangkaangbü müt hajar saongao munam kuan lekei.

⁷Lausikei Mühghaü müt che louan laukei, “O Choba, Israelbü sepai tan ka yoa tohauti; aishanga BUNYUBOU Israelbü yoa hoba Efraimbü pendou yoa ayokei.

⁸Lausikei kho thüng no wapyoa hau kilabü dogo damalonga, Mühghaüei dangbou thedanga no tuongtilabü; aishanga thuila hoba tuongtila Mühghaü to sei kia.”

⁹Hobaje Amaziaei Mühghaü müt to laukei, “Lausikei ngei Israelbü sepai tan la chandinam seret khujin bang atbü saongao kubü kho lai kümla?” Hobaje Mühghaü müt khoei jongaiko laukei, “Kho toje aei juongbou kula BUNYUBOUei thükakei.”

¹⁰Kheijinei Efraim ka hao jungto loubü sepai tan nyibou chem to ngaitikei, hoba haoen Jihuda to aeibou khauangkei, hoba hatla moklabü che khau angan chem to ngaikei.

¹¹Lausikei Amazia maangkaangkei, hoba haoeibü mütshuong leian haukei, hoba jem yomang pholi khüto haukei hoba Seirbü hajar an wapbei.

¹²Hobaje Jihudabüei lubü hajar an langsenkei, hoba haoen laanglak to leian angkei hoba laanglak ka tekan yantikei, hoba haoen pendou netla yeiko phetnyinkei.

¹³Lausikei Amaziaei ngaitibü sepai tan shuong aoyou yoa lason to ohauti haoenei Jihuda sangnyu shuong shikei; Samaria ka Beth- horon sühko hoba hajar sem haitikei, hoba peisilei juong solangkei.

¹⁴Edombü haitibü ka Amazia longeian phaia haoei Seir mühghaü shuong sungbakei, hoba haoeibü mühghaü shanga phokei, hoba haoen lembei, hoba khübü la lembü kukei.

¹⁵Hibü BUNYUBOU Amazia to khauangkei hoba hao jungto thuseibü che hautiko hao to laukei, “Aila nyi lubü mühghaü shuong laobouei haoen kaibü ik ka akhümen haoen lembei?”

¹⁶Lausikei hao joyoko kijinei Chobaei hao to laukei, “Künei no Choba la songsido kubou che yeitikei sai? Nangashi! No aila haimangsühda?” Hibü thuseibü khoei nangkei, lausikei laukei, “Mühghaüei no mautila maang angenan kia dogo ngei ngekei, aieilausi nyi ho kümbei hoba lenbü adit.”

¹⁷Kheijinei Jihudabü Choba Amaziaei songsido lekei, hoba Israelbü Choba Jehueibü shou Jehoazeibü shou Joash jungto hautiko laukei, “Kaiya, sen theshuok haüyokho.”

¹⁸Hobaje Israelbü Choba Joashei Jihudabü Choba Amazia jungto ngüh hautiko laukei, “Lebanona jakham cheei Lebanona cedar bulong to kaibü nouyangnyu küneibü shoueibü yak la lela labü dogo lauan hautikei, hoba Lebanon yamkabü meisiau cheei jakham kho nakeikei.

¹⁹Nyi lauda, ‘Chühashi ngei Edom to ngümbei,’ hoba kaibü maangpon yonglambo yaangan apbei. Lausikei tou chema kiashi; aila no hoba ka yoa Jihuda yoan tuonglabü lele nyi khonsak sungbakukei?”

²⁰Lausikei Amaziaei ngüha ale; aishanga kho Mühghaü ka kikei, haoei haoen dangbou ik to haoen kula shanga; aieilausi haoenei Edombü mühghaü shuong lambei.

²¹Hibü Israelbü Choba Joash angkei; hoba hao hoba Jihudabü Choba Amazia Jihudabüeibü Bethshemesa lasona cheei che to haüyokei.

²²Hobaje Israelbüei Jihuda thükkei, hoba mütpem weko jembü chem to satkei.

²³Hobaje Israelbü Choba Joash Beth Shemesha Jehoaha- zeibü shou, Joaseibü shou Jihudabü Choba Amazia lapbei, hoba hao Jerusalem to sungbakei, hoba Jerusalem kümthang Efraim Bakhün ka Chemnyek Bakhün sühko iknop saongao lei leilukei.

²⁴Hobaje haoei hon si chandinam pendou sokei, Mühghaüeibü chema hapbü thungsiphau pendou, hoba khübü yoa Obed-Edom yoan; haoei tokei Chobaeibü chem kabü nyaksinam hoba lapan kibü mütshuong sokei, hoba Samaria to hao sepeijung ngaikei.

²⁵Hobaje Jihudabü Choba Joasheibü shou Amazia, Israelbü Choba Jehoahazeibü shou Joas haian phaia po anthükngao lang kikei.

²⁶Tou Amaziaeibü joubü kümsilei khangbü ka thonbü sühko Jihuda si Israelbü Choba shuongeibü lea doan aki lo?

²⁷Haoei BUNYUBOU thedang ka satetlangkei, hoba khünei hao haitikei.

²⁸Hobaje haoenei hao kolia sungbakei, hoba Dawid sangnyua bousi shuong yoa khünkei.