Read Chang Naga 2 LÜNGBÜDOBÜ 26 Bible Online

2 LÜNGBÜDOBÜ 26 - Chang Naga bible

2 LÜNGBÜDOBÜ 26

¹Kheijinei Jihudabü pendouei Uzzia lekei, hoba hao po anthüklak kikei, hoba hao bou Amazia jeiko hao Choba yeitikei.

²Bousi shuong yoa Choba kho yepan phaia haoei Elot dangkei hoba nyibou Jihuda la kukei.

³Uzzia songdakla khangjinei hao po anthüklak kikei, hoba Jerusalema haoei po anjinsem to nyi songdakkei, hao nyueibü nyen Jekolia Jerusalemsao kikei.

⁴Hao bou Amaziaei kümbü pendou haoei BUNYUBOU thea ai tükde kho kümbei.

⁵Haoei jembü lolo Zekhariaeibü chaloua BUNYUBOU lambei, hoba Zekhariaei Mühghaü to souhatbü hao to lenkei, hoba lalokche haoei Mühghaü lambei, khülokche Mühghaüei hao haükukei.

⁶Hao haukei hoba Filistiabü khulimbo wapyokei, hoba Gat kümthang, Jabne kümthang, hoba Ashdod kümthang leilutikei. Haoei Ashdod hoba Filistia nyangko sangnyu shuong pendou kümetkei.

⁷Hobaje Filistiabü khulimbo hoba Gurbaala kibü Arabbü hoba Menuatbü khulimbo Mühghaüei hao to thuikei.

⁸Ammonbüei Uzzia la khüm kukei, hoba haoeibü nyenhang Ijep leilang sühko phinthonko haukei, aishanga hao aeibou hau kian apbei.

⁹Tokei Uzziaei Jerusalem chemnyek bakhüna hoba yomang bakhüna hoba nongbü saibüa laangchem dangkei hoba khübü kho thangetko kúmbei.

¹⁰Hobaje yamlamanga haoei laangchem shuong dangkei, hoba deikhün juong thuyetan kümbei, aieilausi haoei samkeisamuk juong shongh youa kikei. Haoei sekmou chemmou maangdakkei hoba semlüh sek juong moukei.

¹¹Tokei Uzziaei wapyolabü sepai tan kikei, hoba kho Jeli dobou hoba ikjaibou Maaseia, Hannaniaei sakkubü tegü, kho Chobaeibü lajamleibou yoa che, haoen lühbak webü tegü tan tan kikei.

¹²Chung jaishou then lühbak danko lakjaibü shuong kho hajar nyito saongao lak.

¹³Haoen phanga tokei sepai tan hajar saongao sem to nyet hoba saongao ngao, haoenei dangbou khulimbo Choba to thuila hau yaangbü yoa wapyola thükan kikei.

¹⁴Hobaje Uzziaei haoen shanga khei tan pendou shanga aih, aubu, nameibü khun, wapyobü hele laujin hoba wenlaang lamlekukei.

¹⁵Jerusalema haoei maanglimaangsang mütshuongei lamenbü laujin kiplabü hoba laang yaangbü tekla shanga enjin laangchem thüka hoba chemnyeka küman kikei. Hobaje haoeibü nyen saabüa sühko hangenkei, aieilausi hao hau aki shongko Mühghaüei hao to kaang thuikei.

¹⁶Lausikei hao hau kiko yeisi hao jembü maulabü shanga yonglaman apbei, hoba haoei haoeibü Mühghaü khulimbo ngühkhüm leilukei; aishanga haoei lemshanga jen juokla BUNYUBOUeibü lemshang to atkei.

¹⁷Hobaje hao phai to Azaria ungshedbou atkei, hoba BUNYUBOUeibü ungshedbou maang kaangbü müt saolei atkei.

¹⁸Hobaje haoen Uzzia Choba khulimbo lokei, hoba hao to laukei, “Uzzia, BUNYUBOU to jen juoklabü kho kaibü kümsilei aying, lausikei jen juokla khümbo kubü Aron shousi ungshedbou shuong shangabü ki; saoposhang ka angashi; aieilausi nyi ngühkhüm leilua; ayingsi BUNYUBOU Mühghaü ka nyi jembü nyensang ühüplabü.”

¹⁹Kheijinei Uzzia khau angko maangpokkei, jen juokla haoeibü ika phaushou kikei, hoba ungshedbou shuong to hao maangpokko kijinei BUNYUBOU chema lemshang nyangko ungshedbou shuong thedanga haoeibü khüngjaa im longkei.

²⁰Hobaje thükkabou ungshedbou Azaria hoba ungshedbou pendouei hao to chühkei hoba chühashi, haoeibü khüngjaa im kikei. Hobaje haoenei hao tongde thongan angtikei, hoba hao hao lolo angla panteiko kikei, aieilausi BUNYUBOUei hao to ngümbei.

²¹Hobaje Uzzia Choba hao haibü chalou sühko im bauan kikei, hoba im bausije chem lubü chenei kikei, aishanga BUNYUBOUeibü chem ka hao kuktian kikei. Hobaje hao shou Jotham Chobaeibü chemdang thüka, mütli thüka songdakko kikei.

²²Tou Uzziaeibü joubü kümsilei khangbü ka thonbü sühko Amozeibü shou Isaia thuseibouei doakei.

²³Hobaje Uzzia bousi shuong yoa yepbei, hoba haoenei hao bousi shuong yoa Choba shuong khünshang nyangko khünkei, aishanga haoenei laukei, “Hao la im baua.” Hobaje haoeibü shou Jothamei hao jeila songdakkei.