Read Chang Naga 2 LÜNGBÜDOBÜ 28 Bible Online

2 LÜNGBÜDOBÜ 28 - Chang Naga bible

2 LÜNGBÜDOBÜ 28

¹Ahazei songdakla khangjinei po saoche kikei, hoba haoei po anthüklak Jerusalema songdakkei; hoba BUNYUBOU thedanga ai tükde kho haoei hao bou Dawid phatko aküm.

²Lausikei haoei Israelbü Choba shuong lama paikei, hoba tokei Baal shuong shanga namdei jonbü noksa heangsho kümbei.

³Tokei haoei Hinnom yomanga jen juokkei hoba BUNYUBOUei Israel shousi shuong thedang ka shian apbü songalebü phangshuongeibü mangsenlabü kümsilei tegütham jembü shousi shuong wana jikkei.

⁴Hobaje haoei haitibü juokbü lembü kukei, hoba shongh lemshanga shonghkhua hoba bulong phanga jen juokkei.

⁵Khei yingsije BUNYUBOUei hao Siriabü ik to khümbo kuan apbei; hoba haoenei hao thükkei, hoba tan juong lapjung satkei, hoba haoen Damaska to leibakei. Hobaje Israelbü Choba aoei hao thüka juong haitian thük hapbei, haoeibü ik to kukei.

⁶Aishanga Ramaliaeibü shou Pekaei Jihudaa chalou chenei hajar saongao to saoche haitikei, haoen pendou kho maangkaangbü mütshuong; aieilausi haoenei BUNYUBOU haoeneibü pisibou Mühghaü inletkei.

⁷Hobaje Efraimbü hauki yaangkibü müt che Zikri, haoei Chobaeibü shou Maaseia, Chobaeibü chema leiyeibou Azrikam hoba Choba to thenbou Elkana haitikei.

⁸Hobaje Israelbü shousi shuongei haoeneibü shousi shuong hoba jaisinasi, yaksa shuong, langsenkei; hoba haoen ka solangbü peisilei juong sunglangkei, hoba kho Samaria to sungbakei.

⁹Lausikei khünei BUNYUBOUeibü thuseibü che, nyen Obed kikei; hoba Samaria to loubü tan shuokla haukei, hoba haoen to laukei, “Chühashi, BUNYUBOU kaneibü pisibou Mühghaü Jihudabü to khau angko kibü haangjung haoei kaneibü ik to haoen kukei, hoba kanei khau angko haoen haitibü khuthük sühko anga.

¹⁰Hobaje tou kanei Jihuda si Jerusalembü shousi bousu yaksa shuong aaola lela huongda; lausikei kan yoakei BUNYUBOU kaneibü Mühghaü khulimbo shed shonbü aki lo?

¹¹Hibü tou kanei kü to ditshi, hoba kaneibü jaisinasi shuong kanei langsenbü shuong kho ngaitiashi; aieilausi BUNYUBOU hatlamoklabü khauang kan thüka kia.”

¹²Kheijinei wapyo ka loubü shuong khulimbo Efraimeibü shousi shuong atei Johananeibü shou Azaria Meshillemoteibü shou Berekia. Shallumeibü shou Jehekia, hoba Haldaieibü shou Amasa, haoen lokei, hoba haoen to laukei,

¹³kanei hato langsenbü shuong leian aloujan; aishanga tou kibü küneibü shedbü shabü to aei jinyokubü kanei BUNYUBOU khulimbo kün la shed sungbakula huongda, aishanga küneibü shedbü yaang kia, hoba Israel khulimbo hatlamoklabü khauang kia.

¹⁴Hibü in si aubu jungbü shuongei lapjung loubü shuong hoba soletbü peisilei shuong konglebü shuong si kaman kibü tan thedanga phokukei.

¹⁵Hobaje nyen shenko laubü mütshuong kho meimeikei hoba langsenbü shuong kho leibakei, hoba soletbü peisilei ka haoen yoa mütkong kibü pendou la neitikei, haoen la youkhap kukei, shaula yunglabü sungbakukei, hoba onang naangla hoba haoen yoa hau akibü gadua settikei, haoenei jembü jaisina jungto Loulong Sangnyu kibü Jerikho to leibakei. Kho phaia haoen Samaria to ngaikei.

¹⁶Kho jiha Ahaz Chobaei Assiriabü Choba jungto hao to thuila shanga hautikei.

¹⁷Aishanga Edombü nyibou louan Jihuda shikei, hoba müt laplangkei.

¹⁸Filistiabü ikei yomang sangnyu shuong hoba Jihuda yungkük shikei, hoba Bethshemes, Aijalon, Gederot, Soko hoeibü sangnyu shuong yoan, Temna, hoeibü sangnyu shuong yoan, Gimzo hoeibü sangnyu shuong yoan lekei, hoba haoen khünei kikei.

¹⁹Aieilausi Israelbü Choba Ahaz laüa BUNYUBOUei Jihuda yantikei, aishanga haoei Jihuda to phokai adambo kümbei, hoba BUNYUBOU khulimbo aeibou amaiko shed shonkei.

²⁰Hobaje Assiriabü Choba Tiglath Pileser hao jungto loukei, hoba hao hau kitikhoulabü jeiko thushed kukei.

²¹Hobaje Ahazei BUNYUBOUeibü chem ka Chobaeibü chem hoba yaangbü shuongeibü chem ka phejan che khüm hebü kho Assiria Choba la kukei; lausikei khoei hao to athui.

²²Hobaje haoeibü jeteibü thusheda Ahaz Chobaei BUNYUBOU khulimbo shed aei ong shonkei.

²³Aishanga Damaskabü mühghaü shuong laobouei hao thükenkei, haoen la haitibü lembü kukei, hoba haoei laukei, “Siriabü Choba shuongeibü mühghaü shuongei haoen to thuikei, hibü ngei haoen la haitibü lembü kü to thuitila kulabü.” Lausikei khübü kho hao hoba Israelbü pendou shanga maulabü kikei.

²⁴Hobaje Ahazei Mühghaü chema thung si phau shuong yoshaikei, hoba Mühghaüeibü chema kibü thungsi phau shuong netla yeiko wapnyinkei, hoba BUNYUBOUeibü chem kou khinan phokukei; hoba haoei Jerusalem nongbü pendoua lemshang dangkei.

²⁵Hobaje BUNYUBOU haoeibü pisibou Mühghaü maangto shattiko, Jihudabü sangnyu wekoa haoei mühghaü to jen juokla shongh lemshang kümbei.

²⁶Tou haoeibü joubü kümsilei haoeibü lamthen pendou khangbü hoba thonbü, to chühshi, khübü kho Jihuda si Israel Choba shuongeibü lea doan kia.

²⁷Hobaje Ahaz bousi shuong yoa yepbei, hoba haoenei haoeibü sangnyua khei Jerusalema khünkei, aishanga haoenei hao Choba shuongeibü hee to asungba, hoba haoeibü shou Hezekiaei hao jeiko songdakkei.