Read Chang Naga 2 LÜNGBÜDOBÜ 29 Bible Online

2 LÜNGBÜDOBÜ 29 - Chang Naga bible

2 LÜNGBÜDOBÜ 29

¹Hezekiaei songdakla khangjinei hao po saoto ngao kikei; hoba haoei Jerusalema po saoto gü songdakkei, hoba haoeibü nyu nyen Abija, Zekhariaeibü nouyangshou kikei.

²Hobaje BUNYUBOU thedanga ai tükde kho haobou Dawidei kümbü pendou tegü, haoei kümbei,

³Haoei haoeibü songdakbü po sao to ngaoboubü shaangbou lita BUNYUBOUeibü chem koukap shuong ipbei hoba khübü kho kümetkei.

⁴Hobaje haoei ungshedbou shuong si Levi shuong leian lotkei, hoba chaangbou ae hopabü kaoena kamtikei, hoba haoen to laukei,

⁵“Ngeibü ngüha leashi, kan Levibü shuong, tou kan lolo saüenashi, hoba BUNYUBOU kaneibü pisibou Mühghaüeibü chem saüenashi hoba saoposhang ka asaopobü sunglangashi.

⁶Aishanga seneibü pisibou shuongei shed shona, hoba BUNYUBOU seneibü Mühghaü thedanga ai amai kho kümbei, hoba hao nangletnyu apbei, hoba haoeneibü thenyek BUNYUBOU kishang ka sepeijung satkei, hoba haoen takphai yeikei.

⁷“Hobaje chemso koukap shuong khinan apbei, hoba wanthung nyettikei, hoba jen ajuok, ayingsi Israel Mühghaü la saoposhanga juokbü lembü aku.

⁸Khei yingbüei BUNYUBOU maangshat Jihuda si Jerusalem thüka kikei, hoba haoei haoen hatlabü hoba moklabü che yingla hoba semlabü che kila kanei jembü nyekei hapbü tegütham haoei haoen khümbo kukei.

⁹Aishanga ditashi, seneibü bousi shuong inei tuonga, hoba seneibü bousu yaksa shousi shuong kho shanga thüngshanga kia.

¹⁰“Tou BUNYUBOU Israel Mühghaü yoa khei hao to hatbü khau angbü sen ka satan apla shanga theyolanyobü che lela kü maangpona kia.

¹¹Kü shousi shuong tou maang akuko teki; aishanga BUNYUBOUei kan hao thedanga lola hoba hao kan khangenbü shuong yingla, jen juokla piena.”

¹²Kheijinei Levi shuong meimeikei, Amasaeibü shou Mahat, Azariaeibü shou Joel, Kohatbü shousi shuong hoba Merarieibü shousi shuong, Abdieibü shou Kish, Jehalleleleibü shou Azaria; hoba Gershombü Zimmaeibü shou Joa, Joaeibü shou Eden;

¹³Eliazafaneibü shousi shuong Shimri hoba Jeuel; Asafeibü shousi shuong Zekharia, hoba Mattania;

¹⁴hoba Hemaneibü shousi shuong Jehuel hoba Shimei; Jeduthuneibü shousi shuong Shemaia hoba Uzziel.

¹⁵Hobaje haoenei haoeneibü jaisinasi shuong ngashaikei, hoba haoen lolo saüenkei, hoba BUNYUBOUeibü ngüh Chobaei sakkubü tegü BUNYUBOUeibü chem saüenla chem maangto atkei.

¹⁶Hobaje ungshedbou shuong BUNYUBOUeibü chem maangto atkei, hoba BUNYUBOUeibü chema haoenei asaopobü hapbü pendou BUNYUBOUeibü chem khong aeto sungjung longkei. Hobaje Levibü shuongei kho Kidron shumang to jungan haula sungkei.

¹⁷Tou shaangboubü lit shaangbou nyet khangkei, hoba lit setboubüa haoen BUNYUBOUeibü chemsophang to loukei; hoba haoenei setbounyet BUNYUBOU chem saüenkei, hoba shaangbounyet lit anthüklak boubüa haoenei thontikei.

¹⁸Kheijinei haoen Chobaeibü chem chemmaang Hezekia Choba jungto atkei, hoba laukei, “Künei BUNYUBOUeibü chem pendou saüena, hoba juokbü lemshang, saüenbü wentek shanga khümsok hoba khünei kibü thungsiphau pendou,

¹⁹Tokei Ahaz Chobaei haoei songdakjinei haoei shed shonbü apbü thungsiphau pendou künei lamlea hoba saüena; hoba chühashi, khübü kho BUNYUBOUeibü lemshang thedanga kia.”

²⁰Kheijinei Hezekia tongde pikei, hoba sangnyua leiyeibü shuong kamtikei, hoba BUNYUBOU chem to angkei.

²¹Hobaje masu pongsu nyet, sanlon paang nyet, hoba lon nyet sangle shanga, shabü lembü shanga, saoposhang lemshanga hoba Jihuda shanga haoenei sungbakei. Hobaje haoei Aroneibü shousi shuongto BUNYUBOUeibü lemshang khübünei lemla sakkukei.

²²Hibü haoenei masu pongsu shuong haitikei hoba ungshedbou shuongei sii kho sungkei, hoba kho lemshanga lakkei; hoba haoenei sanlon paang shuong haitikei, hoba sii kho lemshanga lakkei, hoba haoenei sanlon shoushou shuong haitikei, hoba sii kho lemshanga lakkei.

²³Hobaje shedbü lembü shanga haoenei lon paang kho Choba si kambü shuong thedang to nyangko jungan loukei, hoba khübü to haoenei ikkei shangetkei.

²⁴Hobaje ungshedbü shuongei khübü kho haitikei hoba haoenei lemshang thüka sii naangkuko Israelbü pendou shanga shedbü ka angbü lembei; aieilausi Chobaei Israelbü pendou shanga juokbü lembü hoba shedbü shanga lembü kujan dogo ngühkhüm kukei.

²⁵Hobaje BUNYUBOU chem Levibü shuong pithung teklaang, kongkin Dawid Chobaei sakkubü tegü hoba Chobaei chühenbü tegü Gad hoba Nathan thuseibou haoei phokukei, aishanga haoeibü thuseibü shuongei sakkubü kho BUNYUBOU ka kikei.

²⁶Hobaje Levibü shuongei Dawidei kongkin shuong hoba thuseibü shuongei teklaang jungan lokei.

²⁷Hobaje Hezekiaei lemshanga juokbü lembü kula sakkukei, hoba juokbü lembü kho kula khangjinei BUNYUBOUeibü chia khokei khangkei, teklaang si Israelbü Choba Dawideibü kongkin shuong yoa khangkei.

²⁸Kambü shuong pendouei lembo kijinei chia laubü shuongeikei chia, hoba teklaang metbü shuongei teklaang metkei, ho pendou juokbü lembü awan shongko kikei.

²⁹Hobaje ladang haoenei lembü kubü thonkei, Choba si hao yoa yobü pendouei khüpetko lembei.

³⁰Tokei Hezekia Choba si yaangenbü shuongei Levibü shuong to Dawid chia hoba chühenbü Asafeibü ngüh shuongei BUNYUBOU nyen sangla sakkukei. Hobaje haoenei olinbüei chia laukei, hoba haoenei haoeneibü khu khüpjung atan lembei.

³¹Kheijinei Hezekiaei laukei, “Tou kan jembü lolo BUNYUBOU la khümbo kua, nyangko kaiya, hoba haitibü lembü hoba nyensang kubü jungan BUNYUBOU chem to kaiya.” Hobaje lajucheei maangangenan kikei, pendouei juokbü lembü sungbakei.

³²Hobaje kambü danei sungbabü juokbü lembü kho masu pongsu anjinlei, sanlon paang saongao hoba san shoushou saoan; khübü pendou BUNYUBOU la juokbü lembü kubü kikei.

³³Hobaje saüenbü peisilei shuong kho masu pongsu saongao lak hoba sanlon hajar sem.

³⁴Lausikei ungshedbou shuong kho shisho ong kikei, hibü khoei juokbü lembü pendouje alonkhümti, hibü khoei kümsilei kho athon shongko hoba ungshedbou shuong haoen lolo asaüen shongko haoeneibü jaisina Levi shuongei haoen to thuikei; aishanga ungshedbou shuong toje Levibü shuongeibü maangpona saüenla shanga aei dambü haübou kikei.

³⁵Juokbü lembü juong kibü to aeian sangmai lembü haabü, hoba juokbü lembü shanga yunglabü lembü kikei. Kho tegü BUNYUBOUeibü kümsilei kho küplep thaetnyu kikei.

³⁶Hobaje Mühghaüei mütshuong shanga lamlekubü shanga Hezekia hoba mütli pendouei olinyokei, aieilausi kümsilei kho hakde ong haüthükkei.