Read Chang Naga 2 LÜNGBÜDOBÜ 30 Bible Online

2 LÜNGBÜDOBÜ 30 - Chang Naga bible

2 LÜNGBÜDOBÜ 30

¹Tou Hezekiaei Israelbü pendou hoba Jihudabü pendou jungto ngala hautikei hoba Efraim si Manasse jungto le hautikei, BUNYUBOU Israel Mühghaü shanga püetbü lem lila Jerusalema BUNYUBOUeibü chem to kai dogo dokei.

²Aieilausi Choba si haoeibü yaangenbü shu- ongei hoba Jerusalema kamshaibü pendouei lit nyiboubüa püetbü lem kila ngühthang yenkei.

³Aieilausi ungshedbou shuong haoen lolo müt souko saüenan akisije hoba mütshuongeikei haoen lolo Jerusalema kamshaian akibü haangjung kho chaloua kho kila athükko kikei.

⁴Kho tegü Choba si kambü shuong pendou thedanga kümsilei kho tükde kikei.

⁵Hibü Beersheba ka Dan sühko, khei haoen Jerusalema BUNYUBOU, Israel Mühghaü shanga püetbü lem kila loujan dogo phinthonko hautila haoenei ngühkhüm che kümbei, aishanga doan kibü tegüthamje tan yaangbü kaman achüh.

⁶Hibü Israel si Jihuda pendou jungto Choba si yaangenbü shuong ka Chobaei sakkubü tegü kan Israel shousi shuong BUNYUBOU Abraham, Isak hoba Israel Mühghaü jungto sepeiashi, khünei Assiriabü Choba shuong ik ka kan satenan kibü shuong jungto longeienlabü dogo doko le künbü shuong haukei.

⁷“Kaneibü bousi shuong hoba kaneibü jaisinasi shuong tegü teki, aoyouei haoeneibü BUNYUBOU Mühghaü to maang alembo kikei, kho haangjung kanei hapbü tegütham haoei haoen sangliphanga yeitikei.

⁸Kaneibü bousi shuong tegü kan ngüm tekaang, lausikei kan lolo BUNYUBOU la khümbo kuashi, hoba haoeibü lemshang to kaiya, laobou haoei ponpen shanga saüenkuan ki hoba kan ka hao hatla moklabü khauang longbü ngaila shanga BUNYUBOU kaneibü Mühghaü khangenashi.

⁹Aieilausi kan BUNYUBOU jungto sepeialonga kaneibü jaisinasi shuong hoba kaneibü shousi shuong langsenbü shuongei onoulabü, hoba ho kaodak to longailabü. Aieilausi BUNYUBOU kaneibü Mühghaü to onou hoba sanoudambü ki hoba kan hao jungto sepeialonga haoeibü thenyek kan ka asepeilabü.”

¹⁰Hibü ngühlang künbü sangnyu che ka sangnyu che danko Zebulun sühko haukei; lausikei haoenei haoen la nyikukei hoba awealau.

¹¹Asher, Manasse, hoba Zebulunbü shuong shisho ong haoen lolo ngüha leko Jerusalem to loukei.

¹²Choba si yaangenbü shuongei BUNYUBOUeibü ngüha leko ai sakkukei, kho tokei haoen mütshuong maang- pon chela thangjaman kümtila Mühghaüeibü ik Jihudabü thüka kikei.

¹³Hobaje mütshuong tan yaangbü che tokai ajinbü wentek lem lila lit nyiboubüa Jerusalem to yoshaikei.

¹⁴Haoenei kümlaleila khangkei hoba Jerusalema kibü lemshang kho sungan apbei hoba jen juokla shanga lemshanga kibü pendou kho haoenei sunglangkei hoba Kedron koukhüna jinkukei.

¹⁵Hobaje lit nyetboubü chalou anthük leiboubüa püetbü lem san shoushou kho haitikei. Hobaje ungshedbou shuong si Levi shuong himou bautikei, hibü haoen lolo saüenkei, hoba BUNYUBOUeibü chem to juokbü lembü sungbakei.

¹⁶Mühghaü müt Mosaeibü ngühkhüm tegü haoen lulueibü kümaleia lokei, Levi shuongeibü ik ka sungbü kho ungshedbou shuongei lakkei.

¹⁷Aieilausi shuong yoa juong lulu lolo asaüenko kikei; hibü Levi shuongei asaüenko kibü mütpem weko shanga kho BUNYUBOU thedanga saopobü yeitila püetbü lem san shoushou kho haitikei.

¹⁸Aishanga müt juong khei Efraim, Manasse, Issakar, hoba Zebulunbü juong asaopoko kikei, lausikei doan kibü tegü ayingko püetbü lem shaukei, aieilausi Hezekiaei haoen shanga welauko laukei,

¹⁹“Aoei BUNYUBOU haoeibü bousishuong Mühghaü jembü maangponei lamda, saüenlabü shanga lemshangei shean lenbü ngühkhüm tegütham ayingsikei BUNYUBOU maibouei mütpem weko la shedbü apbushima.”

²⁰Hobaje BUNYUBOUei Hezekiaeibü welau ditkukei, hoba mütshuong maitikei.

²¹Hobaje Jerusalema yoan kibü shuong olinbü yaangbüei tokai ajinbü wentek lem kho chalou weko haoeneibü hau pendouei BUNYUBOU nyen sangkei.

²²Kheijinei Hezekiaei Levibü shuong aoyouei BUNYUBOUeibü kümsilei maian lanko kümbei pendou to thungeijangeiko lenkei. Hibü mütshuongei chalou nyet, sangmai lembü haitikei hoba haoeneibü pisibou Mühghaü BUNYUBOU la nyensang kuko lem shaukei.

²³Kheijinei kamshaibü pendouei tokei chalou nyetnyet lem kho lila maangangenkei, hoba chalou nyetnyet olinbüei noukei.

²⁴Aieilausi Jihudabü Choba Hezekiaei kambü shuong la masu pongsu hajar che hoba sanlon hajar nyet lembü kukei, hoba yaangbü shuongei kamshaibü shuong la masu pongsu hajar che, sanlon hajar an kukei. Hobaje ungshedbou shuong juongei lulu lolo saüenkei.

²⁵Hibü Jihuda ka louan yobü khümbo hoba Levibü si ungshedbou shuong Israel ka longbü kamshaibü khümbo hoba Israel kaodak ka louan yobü shuong hoba Jerusalem ka louan yobü shuong olinyokei.

²⁶Hibü Jerusalema olinbü yaang kikei, aieilausi Israel Choba Dawideibü shou Solomon chalou ka ho tegü Jerusalema kian achüh.

²⁷Hibü ungshedbou shuong hoba Levi shuong meimeikei hoba müt shuong haükukei, hoba haoeneibü ngühlang ditkei, hoba haoeneibü welau khuthüka haoeibü saoposhang onlangkei.