Read Chang Naga 2 LÜNGBÜDOBÜ 31 Bible Online

2 LÜNGBÜDOBÜ 31 - Chang Naga bible

2 LÜNGBÜDOBÜ 31

¹Tou ladang ho pendou wankei, yoan kibü Israelbü pendou Jihudabü sangnyu shuong lambo haukei hoba saopobü thaonyu shuong netla yeiko ngümnyinkukei hoba Asheram akan koutikei, hoba lemshang shongh hoba lemshang Jihuda si Benjamin, Efraim hoba Manasse pendoua haoenei pendou amauti shongko leilukukei. Kheijinei Israelbü pendou jembü sangnyu shuong to mütpem weko lulu kishang lambo ngaikei.

²Hobaje Hezekiaei ungshedbou shuong hoba Levibü shuong janyinbü pienkei, mütpem weko jembü janletbü kümsilei den lulu, ungshedbou shuong hoba Levibü shuong, juokbü lembü hoba sangmai lembü shanga BUNYUBOU kishang hoba bakhüna khangenla hoba olinbü hoba nyensang kula.

³Chobaei haoei kibü ka lembü kho juokbü lembü shanga kikei; ngeyang si chasem juokbü lembü hoba Nounyet shanga juokbü lembü, lit haanbü lemsilang janenbü, BUNYUBOUeibü ngühkhüma doan kibü tegü kikei.

⁴Hobaje Jerusalema kibü to ungshedbou si Levi shuongeibü phejan kula sakkukei, khei haoenei BUNYUBOUeibü ngühkhüma hau kilabü lele.

⁵Sakkubü ngühkhüm kho phinthonjinei Israelbüei shaangbü buhek deihek, youshou, semlühdei, onang, naodei, hoba sek ka longbü pendou kukei, hoba haoenei ajanjan pendou ka an phejan juong sungbakei.

⁶Hobaje Jihudabü sangnyu shuonga kibü Israelbü si Jihudabü mütliei masu si sanlon an phejan hoba BUNYUBOU haoeneibü Mühghaü la khümbo kuan kibü peisilei sungbakei, hoba khübü kho shaangtian phokukei.

⁷Litnyu nyetboubüa haoenei yoshaian kibü kho che la haushaikei hoba khübü kho lit nyetboubüa küpjembei.

⁸Ladang Hezekia hoba haoeibü yaangenbü shuongei yoshaian phobü kho hapbei, haoenei BUNYUBOU si hao mütli Israelbü haükukei.

⁹Hobaje Hezekiaei ungshedbou shuong si Levibü shuong to yoshaian kibü jongsak shanga pheyokei.

¹⁰Thükkabü ungshedbou Azaria, ao Zadok chemdang ka kikei, haoei hao to jongaiko laukei, “Haoenei BUNYUBOU chem to lemla jungan loubü jihsiphai ka senei souko aoko shaua, hoba juong jouakei; aishanga BUNYUBOUei jembü mütli haükua, hibü senei juong jouko thanena.”

¹¹Kheijinei Hezekiaei haoen la BUNYUBOU chema shemjang lamlela sakkukei, hoba haoenei lamlekei.

¹²Hobaje haoenei maangkuko lembei, an phejan hoba khümbo kubü peisilei shuong sungbakei. Khübü thüka ikjaibou kongnyubou kho Konania kikei, hoba haoeibü na Shimei nyiboubü la lean kikei.

¹³Jehiel, Azaria, Nahat, Asahel, Jerimot, Jezabad, Elil, Ismakhia, Mahat, hoba Banania khübü kho Hezekia Choba si Mühghaüeibü chema haoeibü konglebou Azaria pienbü tegütham, Konania hoba haoeibü na Shimei phanga ikjaibü shuong kikei.

¹⁴Hobaje Levibü Imnaeibü shou Kare, chaangbou ae bakhün lombou kho Mühghaü la maangmai lembü kubü thüka bunyu kikei, BUNYUBOU shanga thanan kibü lembü hoba saopobü peisilei shuong jankula.

¹⁵Eden, Miniamin, Jeshua, Shemaia, Amaria, hoba Shekania, haoenei maangkuko sangnyu shuonga ungshedbou thuiko haoeneibü jaisina si shuong phejan jankuko chingbü, nashou lulu thüng janan lekei.

¹⁶Chungeibü ngühlia doan kibü to limbo bousu shuong po sem ka thükae aoyou BUNYUBOUeibü chem to chalou angbou jembü kümsilei tegü lotlaje haoen lulueibü kümsilei tegü khangenla shanga haoen janyobü tegü thuiko kikei.

¹⁷Ungshedbou shuong nyen dobü kho haoenei bousu shuongeibü lin ka kikei; Levibü kho po saoche jaishou hoba thükaeei jembü kümsilei tegü tan tana kikei.

¹⁸Ungshedbou shuong haoen haoeneibü nashou hanbü shuong, haoeneibü yaksi shuong, haoeneibü shousi shuong, haoeneibü nouyangshousi shuong tan khümbo nyen doan kikei.

¹⁹Hobaje Aroneibü shousi shuong, ungshedbou shuong, ao- youeibü sanglea kikei haoeneibü sangnyu shuonga kikei, sangnyu shishoa ungshedbou shuong yoa bousu weko hoba Levibü yoa aoyou nyen doan kikei haoen la phejan kula nyen kuan kikei.

²⁰Kho tegü Hezekiaei Jihuda pendoua kümbei; hoba BUNYUBOU haoeibü Mühghaü thedanga ai maikei hoba tükde hoba maanglemenbü kikei kho kümbei.

²¹Hobaje Mühghaüeibü chem kümaleia haoei sungletbü kümsilei pendou ngühkhüm hoba sakkubü tegütham hao hoba Mühghaü lambüa haoei hatlepbü kümsilei wekoa haoei haoeibü maangpon khümboei kümbei hoba khoei hao naangmaikei.