Read Chang Naga 2 LÜNGBÜDOBÜ 32 Bible Online

2 LÜNGBÜDOBÜ 32 - Chang Naga bible

2 LÜNGBÜDOBÜ 32

¹Ho kümsilei hoba maanglemenbü kümsilei phaia Assiriabü Choba Sennakherib louan Jihuda shikei hoba haoei thüklabü dogo daman lapheishon shibü sangnyu shuong kho khulimbo la thokei.

²Hobaje ladang Hezekiaei Sennakherib louan Jerusalem khulimbo wapyola shanga loukei dogo chühenkei,

³haoei sangnyu thükaenei yungdei kibü dei kho thaktila shanga haoeibü leiyeibü shuong hoba lakjaibü shuong yoa ngüh küpjembei; hoba haoenei hao to thuikei.

⁴Hobaje müt juong kamshaikei, hoba haoeneibü deikhün pendou hoba kaonyek danko koubü shumang kho thaktiko laukei, “Aila Assiriabü Choba shuongei louan dei juong hapla?”

⁵Haoei maangnyu angko kümtikei hoba leiluan kibü kümthang pendou phokei hoba kho thüka laangchem huongkei, hoba Dawid sangnyua haoei Millo hau kitikei. Haoei tokei in si aubu hoba aih juong kümbei.

⁶Hobaje haoei mütli thüka lajamleibü shuong phokukei, hoba sangnyu bakhüna haoen hao jungto kamshaitikei, hoba haoen maang haksoko joyoko laukei,

⁷“Hau kiashi, hoba olinangko kishi, Assiriabü Choba shanga hatko ayingsi mokko teki, ayingsi hao yoa kibü tan pendou khüto tehüt, aieilausi hao yoa kibü khotoje sen yoa kibü yaangbou che kia.

⁸Hao yoa pheeibü in si aubu ki, lausikei sen yoaje sen to thuila hoba seneibü lason wapyola BUNYUBOU seneibü Mühghaü kia.” Hobaje mütshuongei Jihudabü Choba Hezekiaeibü ngüha maanglembei.

⁹Kho phaia Assiriabü Choba Sennakheribei hao khangenbü shuong Jerusalem to Jihudabü Choba Hezekia jungto ngühlang hautikei, hoba Jerusalema kibü Jihudabü pendou jungto hautiko,

¹⁰“Assiriabü Choba Sennakheribei hai lauda, Jerusalem shibü natko haiteila kanei ainei maanglemda?

¹¹Mühsinou hoba deilaei haitilabü lele, ‘Assiriabü Choba ik ka seneibü BUNYUBOU Mühghaüei sen khümenlabü,’ dogo lauko Hezekiaei kan suletda aying lo?

¹²Ho Hezekiaei kanei lemshang chenei lemlabü hoba kho thüka jen juoklabü dogo Jihuda si Jerusalem la sakkuko haoeibü lemshang shongh hoba lemshang sunglangkei aying lo?

¹³Kaonyek kabü mütli pendou to ngo hoba kübousi shuongei ai kümbei kanei angekei lo? Kaonyeka phangshuongeibü mühghaü shuongei ngeibü ik ka haoen püetla thükan kikei lo?

¹⁴Kaneibü Mühghaüei ngeibü ik ka kan püetlabü lele, kübousi shuongei lemailela mautibü phangshuongeibü mühghaü pendou yoa kü ik ka jembü mütli püetla thükbü ao ki?

¹⁵Hibü tou Hezekiaei kan tehuonetti, ayingsi kanei hao to mai telem; aieilausi ai phangeibü mühghaüeikei ayingsi sangleei ngeibü ik ka hoba kübousi shuongeibü ik ka jembü mütli püetla thükan akitei; kaneibü Mühghaüei ong ai ngeibü ik ka khümenla thükla!”

¹⁶Hobaje haoeibü khangenbü shuongei toukei aei BUNYUBOU Mühghaü hoba Hezekia khulimbo laukei.

¹⁷Tokei haoei, Israelbü Mühghaü, BUNYUBOU attila le che doko laukei, “phangshuongeibü mühghaü shuongei haoen jembü mütli ngeibü ik ka akhümenlabü.”

¹⁸Hobaje haoenei hatlenko hoba haoen khonkutila haoenei ngüh yaangbüei Ibribü ngühyema kümthanga Jerusalembü to haoenei sangnyu kho lelabü dogo ngekkei.

¹⁹Hobaje haoenei Jerusalembü shanga kaodakbü mühghaü shuong tegü müteibü ikei kümbü kümsilei la yeitiko laueikei.

²⁰Hobaje Hezekia Choba si Amozeibü shou Isaiaei ho shangabü welaua Mühghaü to ngekkei.

²¹Hobaje BUNYUBOUei khuthük hangangbü che hautikei, hoba haoei Assiriabü shaishang hau yaangbü müt pendou leiyeibü shuong hoba lajamleibü wapan apbei. Hibü hao jembü kaodak to himousele ngaikei. Hobaje ladang hao haoeibü mühghaü chem to lotkei, haoeibü shousi atei hao khünei inei wapettikei.

²²Assiriabü Choba Sennakheribeibü ik ka hoba lubüeibü ik pendou ka BUNYUBOUei Hezekia hoba Jerusalembü mütli khümenkei, hoba pendou aenei haoen la hakso kukei.

²³Hobaje juongei Jerusalem to hoba Jihudabü Choba Hezekia jungto namsek peisilei jongsak sungbakei; hibü kho chalou ka phang pendouei Hezekia nyenhanga tonenkei.

²⁴Kho jihsiphaia Hezekia hailabü lele shatkei; hoba haoei BUNYUBOU to welaukei, hoba haoei hao to joyokei hoba amaaphelabü che kukei.

²⁵Lausikei Hezekiaei hao la ku kubü tegü angaitiku, aishanga haoeibü maangpona yonglambo kikei; hibü hao hoba Jihuda hoba Jerusalem thükto BUNYUBOU khauang kikei.

²⁶Lausikei Hezekiaei haoeibü maangpon yonglambü shanga hao lolo sang sembei, hao hoba Jerusalema kibü shuong; hibü Hezekia chalouaje Mühghaü khauang haoen thükto alou.

²⁷Hobaje Hezekiaeibü nyaksinam juong hoba nyenhang yaang kikei, hoba haoei habü shanga thanshang, chandinam shanga, hon shanga, namsek laang shanga, ponlem hibü shanga, aih shanga, namsek chaksiam phang pendou shanga kümbei.

²⁸Youshou, ih, hoba onang habü shanga thanshang; hoba meisiau phang pendou hoba sanlon shuongeibü chem dangkei.

²⁹Kho tegü jembü shanga sangnyu shuong hoba sanlon tan hoba masu tan shanga juong kümbei; aieilausi Mühghaüei hao la nyaksinam juong kukei.

³⁰Hobaje Hezekiaei ong Gihon dei shuong thükkabou deikhün thangetkei, hoba khübü kho Dawid sangnyu chanep aeto tangshaitham leijung koukei. Hobaje haoeibü kümsilei pendoua naang maikei.

³¹Khei yingsikei Babilon Chobaeibü youkobü shuong aoyouei hao jungto kaonyeka tetsida kümbü shanga pheyola hautikei, Mühghaüei haoeibü maangpona ai ki pendou ngela shanga takteila khei phokukei.

³²Tou Hezekiaeibü joubü kümsilei kho hoba haoeibü kümsilei maibü kho, chühashi, khübü kho Jihuda hoba Israelbü Choba shuongeibü lea, Amozeibü shou Isaia thuseiboueibü mangsanga doan kia.

³³Hobaje Hezekia bousi shuong yoa yepbei, hoba haoenei hao Dawideibü shousi shuongeibü heedang aeto angshanga khünkei. Hobaje Jihuda si Jerusalema kibü pendouei hao haijinei souhat lenkei, hoba haoeibü shou Manasseei hao jeila songdakkei.