Read Chang Naga 2 LÜNGBÜDOBÜ 33 Bible Online

2 LÜNGBÜDOBÜ 33 - Chang Naga bible

2 LÜNGBÜDOBÜ 33

¹Manasseei songdakla khangjinei, hao po anthüknyi kikei; hoba haoei Jerusalema po anjinsem to ngao songdakkei.

²Hobaje Israel shousi shuong thedang ka BUNYUBOUei shian sattibü mangsenlabü phangshuong kümsilei tegütham ai BUNYUBOU thedanga amai kho kümbei.

³Aishanga haobou Hezekiaei leilutibü shongh lemshang kho haoei nyibou kümetkei, hoba Baal shuong shanga haoeibü lemshang kümbei, hoba Asherot kümbei, hoba müha kibü pendou kho lembei, hoba haoen khangenkei.

⁴Jerusalema ngeibü nyen ponpen kilabü dogo BUNYUBOUei lenan kibü BUNYUBOUeibü chema haoei lemshang kümbei.

⁵Hobaje BUNYUBOUeibü chem chemso penyia haoei müha kibü tan pendou shanga lemshang kümbei.

⁶Haoei haoeibü shousi shuong Hinnom yomanga wana jikkei, seibü- yaübü kümsilei hoba thulenbü manghdakbü hoba khopjikseibü jungto haukei; haoei BUNYUBOU thedanga hao khauangtila amaibü juong kümbei.

⁷Hobaje haoei kümbü noksa BUNYUBOUeibü chema phokei, ho lembü chem shanga Mühghaüei Dawid si Solomon to laukei, “Ho chema hoba Jerusalema laobou Israel phang pendou ka ngei pienkei, ngei kü nyen ponpen pholabü.

⁸Hobaje Israelbüei ong ngühkhüm pendou takletbü ngühkhüm hoba Mosa danko kubü songa kibü ngühkhüm ngei haoen la sakkubü pendou maangsangko kümbo laualonga, touje ngei kaneibü pisibou la kubü kaodak ka you ayaütilabü.”

⁹Manasseei Jihuda si Jerusalema kibü suletkei khoei Israel thedanga BUNYUBOUei phangshuong aoyou mautikei haoen toje aei amaibou kümbei.

¹⁰Hobaje BUNYUBOUei Manasse si haoeibü mütli to joyokei, lausikei haoenei maang aku.

¹¹Hibü BUNYUBOUei haoen thükto Assiriabü sepai lajamleibü shuong leibakei, hoba haoenei Manasse langsenkei hoba ika janglühei phenan Babilon to leibakei.

¹²Hobaje ladang hao khonku khonsaka kikei haoei BUNYUBOU haoeibü Mühghaüeibü onou hapla sukeijakei, hoba haoeibü bousi shuong thedanga aeibou semboambo yeikei.

¹³Haoei hao to welaukei, hoba Mühghaüei haoei subüjabü sungletkei hoba haoeibü welau ditkei, hoba nyibou haoeibü sangle Je- rusalem to sungbakei. Kheijinei ong Manasseei BUNYUBOU Mühghaü dogo ngekei.

¹⁴Phaila haoei Gihon chanep ae Dawid sangnyua Ngau Bakhün aeto atshang kümthang thükkabou kümbei, hoba kho Ofel sühko dangjung haukei, hoba kho aeibou suokan kümbei; haoei tokei Jihuda lapheishon kibü sangnyu pendoua lajamleibü shuong phokei.

¹⁵Hobaje BUNYUBOUeibü chem ka haoei küksithang mühghaü shuong hoba heangsho kho sunglangkei, hoba Jerusalem hoba BUNYUBOUeibü chem shongh shuonga haoei dangbü lemshang pendou kho sangnyu napheinei tekan apbei.

¹⁶Haoei tokei BUNYUBOUeibü lemshang kümetkei, hoba kho thüka sangmai lembü hoba nyensang kubü lembü haitian lembei; hoba haoei Jihudabü la BUNYUBOU Israel Mühghaü khangenla sakkukei.

¹⁷Khei yingsikei mütshuongei tokei shongh lemshanga lembü kukei, lausikei kho BUNYUBOU haoeneibü Mühghaü to ong kikei.

¹⁸Tou Manasseeibü joubü kümsilei, hoba Mühghaü to haoei welaubü, hoba BUNYUBOU Israel Mühghaü nyena hao to thuseibü joyobü ngüh shuong, chühashi, khübü kho Israel Choba shuong lüngbüdobüa doakei.

¹⁹Hobaje haoeibü welau hoba Mühghaüei lai haoeibü subüjabü sungletkei, hoba haoeibü shabü hoba haoeibü maanglem akibü hoba hao lolo eaaoa ayeijinei haoei shongh lemshang kümbü shanga Asherim hoba noksa phobü chühashi, haoeneibü lüngbüdobüa doan kia.

²⁰Khünei Manasse haoeibü bousi shuong yoa yepbei, hoba haoenei hao haoeibü chema khünkei, hoba hao shou Amonei hao jeila songdakkei.

²¹Hobaje Amon songdakla khangjinei po sao to nyi kikei, hoba haoei Jerusalema po nyi songdakkei.

²²Haoei BUNYUBOU junga ai amaibü kikei haobou Manasseei kümbü heangsho pendou la lembü kukei, hoba haoen khangenkei.

²³Haobou Manasse jembü lolo eaaoa yeibü tegütham haoei BUNYUBOU thedanga eaaoa ayei, lausikei ho Amonei aei aei ong shedbü jin- yokei.

²⁴Hobaje hao khangenbü shuongei hao khulimbo huon takkei, hoba haoeibü Choba chema hao haitikei.

²⁵Kheijinei kaonyek kabü mütshuongei Amon Choba khulimbü shuong pendou haitikei; hoba hao shou Josia hao jeila Choba yeitikei.