Read Chang Naga 2 LÜNGBÜDOBÜ 34 Bible Online

2 LÜNGBÜDOBÜ 34 - Chang Naga bible

2 LÜNGBÜDOBÜ 34

¹Josia songdakla khangjinei hao po set kikei, hoba haoei Jerusalema po khujinto sem songdakkei.

²BUNYUBOU junga ai tükde ki kho haoei kümbei, hoba haobou Dawideibü lamnyua paikei; hoba haoei mae ayingsi nanae asepei.

³Aieilausi haoei songdakbü po setboubüa hao tokei nashou che ong kikei, hoba haoei hao bou Dawideibü Mühghaü lamla khangkei; hoba po anthüknyi boubüa Jihuda si Jerusalem ka shongh lemshang Asherim hoba heangsho noksa jakenbü hoba tühnyinbü haoei lühan apbula khangkei.

⁴Hobaje haoenei hao thedanga Baal lemshang leilukukei, hoba kho thüka loan kibü jen juokshang wapan koutikei; hoba haoei Asherim, ikei dangbü hoba tühnyinbü noksa shuong kho haoei netla yeiko leilukukei, hoba haoei khübü kho thamngula yeitikei hoba aoyouei khübü to lembei haoeneibü heea kho phinan jinkukei.

⁵Hobaje tokei ungshedbou shuongeibü lo kho lemshang thüka jinkei, hoba Jihuda si Jerusalem saüenkei.

⁶Hobaje Manasse, Efraim, hoba Simeon sangnyu shuonga Naftali sühko hauan khübü kaijembo leilubü thüka,

⁷haoei lemshang shuong kho jeinyinan apbukei, hoba Asherim si noksa shuong kho wenla yeiko jangnyinkukei, hoba Israel kaodak pendoua jen juokbü lemshang pendou wapan koutikukei, kho phaia hao Jerusalem to ngaikei.

⁸Tou haoei songdakbü po anthükset boubüa haoei kaonyek si chem kho saüenan phaia Azaliaeibü shou Shafan, sangnyu governor Maasaia, Joahaz ngühli doboueibü shou Joa, BUNYUBOU haoeibü Mühghaü chem kümetla haoei hautikei.

⁹Thükkabou ungshedbou Hilkia jungto haoen loukei, hoba BUNYUBOUeibü chem to jungan loubü nam kho khümbo kukei, kho Levi shuongei khonga lombou shuongei Manasse hoba Efraim ka hoba Israelbü joubü pendou ka hoba Jihuda si Benjamin pendou ka Jerusalema kibü pendou ka heshaibü kikei.

¹⁰Haoenei kho BUNYUBOUeibü chema ikjaibü shuong aoyouei kümbüleibü shuong chühda haoen la kukei; hoba BUNYUBOU chema kümsilei kümbü kho chem jeileila hoba kümetla shanga kukei.

¹¹Haoenei kho mistri shuong la hoba chem kümetbü shuong la laang thüngan kibü hoba thaonyu la lela hoba bu beam lela hoba Jihudabü Chobaei nyaüan aplabü chem shanga kukei.

¹²Hobaje mütshuongei kümsilei kho maangkuko kümbei, hoba Jahat si Obadia, Levibü, Merarieibü shousi shuong. Hobaje Zekharia si Meshullam, Kohatbü shousi shuong haoen thüka chühla haoei phokukei. (Levibü chia laula kongkin tokla minbü pendou)

¹³On künbü shuong thüka kikei, hoba kümsilei phang weko kümbü pendou leiyeikei, hoba Levibü atje dobou hoba kongnyubou shuong hoba bakhün lombü shuong kikei.

¹⁴BUNYUBOUeibü chem to jungan lotbü nam kho haoenei jungan longjinei Mosa danko kubü BUNYUBOUeibü ngühkhüm le Hilkia ungshedbouei hapbei.

¹⁵Kheijinei Hilkiaeibü dobou shafan to laukei, “BUNYUBOUeibü chema ngei ngühkhüm le kho hapa”; hoba Hilkiaei le kho Shafan la kukei.

¹⁶Shafanei le kho Choba jungto jungan loukei, hoba tokei Choba to laukei, “No khangenbou la kubü pendou kümdaleida.

¹⁷BUNYUBOUeibü chema hapbü nam pendou haoenei kongena hoba kho ikjaibü shuong si kümbüleibü shuong la kua.”

¹⁸Kheijinei dobou Shafanei Choba to laukei, “Ungshedbou Hilkiaei kü la le che kukei.” Hobaje Shafanei kho Choba thedanga wekei.

¹⁹Chobaei ngühkhüm shuong kho ditjinei haoei haoeibü neisimei jitnyinkei.

²⁰Hobaje Chobaei Hilkia Shafaneibü shou Ahikam, Mikaeibü shou Abdon, dobou Shafan si Chobaeibü sambü Asaia to laukei,

²¹“Hauashi, BUNYUBOU to kü shanga hoba Israela hoba Jihudaa jouan kibü shuong shanga le sungbabü shanga kho pheashi; aishanga sen la khüpan jinkubü BUNYUBOU maangshat yaangbü kia, aieilausi ho lea doan kibü tegü kümla seneibü pisibou shu- ongei BUNYUBOUeibü ngüh ajungei.”

²²Hibü Hilkia hoba aoyou Chobaei hautian kikei, neisimei shemjang lombou Hasraeibü shou Tokhaeibü shou Shallumeibü yak Hulda thuseinyu jungto haukei. (tou sao Jerusalema nyiboubü kishang kikei) hoba sao to ho shanga joyokei.

²³Hobaje saoei haoen to laukei, “BUNYUBOU Israelbü Mühghaüei hai lauda: ‘Kü jungto kan hautibü müt khüto lenshi,

²⁴BUNYUBOUei hai lauda, Chühashi, ngei ho kaonyek hoba khünei kibü shuong thükto amaibü loutikulabü. Jihuda Choba thedanga webü shedsikhau shuong pendou kho;

²⁵aieilausi haoenei ngo inletkei, hoba haoeneibü ikei kümbü pendouei ngo khauangtila shanga haoenei lubü mühghaü shuong la jen jikkua, hibü ngeibü maangshat ho thükto khüpan jinkulabü hoba anyetlabü.

²⁶Lausikei Jihuda Choba aoei BUNYUBOU to phela kan hautikei kanei hao to hai lenshi, Israel Mühghaü BUNYUBOUei hai lauda: Nyi ditbü ngüh shuong shangabü kho;

²⁷kaibü maangpon sepeian kisije hoba ho kaonyek hoba habü mütli shanga khulimbo ditjinei, Mühghaü thedanga eaaoa yeibü shanga hoba no kü thedanga eaaoa yeikei, hoba kaibü neisimei jitnyinkei hoba kü thedanga haapsije, ngeikei kaibü subüjabü ditda dogo BUNYUBOUei laukei.

²⁸Chühashi, ngei kaibü bousi shuong jungto leibalabü hoba no jembü hee to haksoa loutilabü hoba amaibü laobou ngei ho kishang hoba ho mütli thükto sungbalabü ki. kho kaibü nyekei ühüplabü.’ ” Hobaje haoenei Choba jungto ngüh kho sungngaibakei.

²⁹Kheijinei Chobaei Jihuda si Jerusalembü jaishsou shuong pendou ngashaikei.

³⁰Hobaje Chobaei Jihudabü mütshuong pendou hoba Jerusalema kibü hoba ungshedbou shuong hoba Levibü shuong, müt hanbü yaangbü pendou leian BUNYUBOUeibü chem to angkei hoba mút pendouei ditko theyolanyobü le ngühshuong laobou BUNYUBOUeibü chema hapbei kho haoei wekei.

³¹Hobaje Choba hao kishanga lokei hoba BUNYUBOU phainei paila hoba haoei sakkubü shuong jungeila hoba haoeibü aukabü shuong hoba haoeibü takletbü ngühkhüm shuong haoeibü sensimaang hoba haoeibü soushou pendouei ho lea doan kibü thebülanbü kümla BUNYUBOU thedanga thebülanbü lekei.

³²Kheijinei haoei Jerusalema hoba Benjamina yoan kibü shuong khünei lotikei, hoba Jerusalema kibü shuongei BUNYUBOU haoeneibü pisibou Mühghaü to thebülanbü tegü kümbei.

³³Hobaje Israel shousi shuong shangabü kaonyek pendoua mangsenlabü pendou sunglangkei, hoba Israela kibü pendouei BUNYUBOU haoeneibü Mühghaü khangentikei. Haoeibü chalou pendoua haoeneibü BUNYUBOU haoeneibü pisibou Mühghaü ka sepeijung angaiko phai sembei.