Read Chang Naga 2 LÜNGBÜDOBÜ 35 Bible Online

2 LÜNGBÜDOBÜ 35 - Chang Naga bible

2 LÜNGBÜDOBÜ 35

¹Josiaei Jerusalema BUNYUBOU shanga püetbü lem likei, hoba haoenei shaangbou lit chalou anthükleiboua püetbü lema san shoushou haitikei.

²Hobaje haoei ungshedbou haoen haoeneibü kümaleia hoba BUNYUBOUeibü chema kümsilei shanga haoen thungeijangeikei.

³Hobaje Levibü shuong aoyouei Israelbü pendou la songlenkei hoba aoyou BUNYUBOU shanga saopobü kikei haoen to haoei laukei, “Saopobü Busen kho Dawideibü shou Solomon, Israel Chobaei kümbü chema phoashi, touje kaneibü phaka pela akhamda, tou BUNYUBOU kaneibü Mühghaü hoba haoeibü mütli Israel khangenashi.

⁴Israelbü Choba Dawidei doan phokubü hima kan lolo kaneibü bousi thenbüei janbü hima lamleashi.

⁵Hobaje kan jaisinasi daneibü shousi shuong chungeibü shi thenei janyinbü tegü saoposhanga loashi, hoba Levi shuong bousi shuong chem- pen weko phejan che janletashi.

⁶Püetbü lem san shoushou haitiashi, hoba kan lolo saüenashi, hoba kaneibü jaisinasi shuong shanga Mosa danko BUNYUBOU ngüh tegütham lamleashi.”

⁷Hobaje Josiaei noknyüh la haoeibü san shoushou shuong, lon shoushou shuong, shatsinam tan ka hajar khujin kukei, hoba masu pongsu hajar sem, khübü kho Chobaei haoeibü kukei.

⁸Hobaje haoeibü yaangenbü shuongei maangnyu angko müt shuong la, ungshedbou shuong la, hoba Levi shuong la kukei. Hilkia, Zekharia, hoba Jehiel, Mühghaüeibü chema kongnyu ikjaibü shuongei ungshedbou shuong la püetbü lem shanga san shoushou hoba lon shoushou hajar nyi to saongao lak hoba masu pongsu saongao sem kukei.

⁹Tokei Konania hoba haoeibü jaisinasi Shemaia, hoba Nethanil hoba Hashabia hoba Jeiel, hoba Jozabad, Levibü konglebü shuongei Levibü shuong la püetbü lem lembü san shoushou si lon shoushou hajar ngao hoba masu pongsu saongao ngao kukei.

¹⁰Kho tegü kümsilei lamlekei, hoba ungshedbou shuong lulueibü kaoena lokei, hoba Levibü shuong Chobaei sakkubü tegü lulueibü janletbü tegütham lokei.

¹¹Hobaje haoenei püetbü lemeibü san shoushou kho haitikei, hoba haoeneibü ikei sungletbü sii ungshedbou shuongei lakkei, hoba Levi shuongei khübü kho khon okei.

¹²Hobaje Mosaeibü lea doan kibü tegü BUNYUBOU la lemla shanga khei khübü kho noknyüh chemdang shuong janyinbü la janan kula shanga haoenei juokbü lembü shuong kho sungenan phokei. Haoenei masu pongsu shuong khokei kho tegü kümbei.

¹³Hobaje songa kibü tegü haoenei püetbü lem kabü san shoushou kho wana ngoukei, hoba saopobü lembü shuong kho chaka khaüchaka hoba phau- yaanga ngoukei, hoba shuong jungto jungan haukei.

¹⁴Phaila haoenei haoen shanga hoba ungshedbou shuong shanga lamlekei, aieilausi Aroneibü shou si ungshedbou shuong nang anakshongko lembüa haabü hoba juokbü lembü shanga akongakangko kikei; hibü Levi shuongei haoen shanga hoba Aroneibü shousi ungshedbou shu- ong shanga lamlekei.

¹⁵Hobaje Dawidei sakkubü tegü chia laubü shuong Asafeibü shousi shuong haoeneibü kaoena kikei, hoba Asafei Heman. hoba Jeduthun Chobaeibü leiyeibou hoba koukhün lombü shuong bakhün weko kikei; haoen jembü kümsilei ka apyoan haula khaman akidei, aishanga haoeneibü jaisina Levi shuongei lamlekei.

¹⁶Hibü BUNYUBOUeibü kümsilei pendou chalou jeteia püetbü lem lembü noula BUNYUBOUeibü lemshanga juokbü lembü kula Josia Chobaei sakkubü tegü kümbei.

¹⁷Hobaje Israelbü shousi shuong khünei yobü shuongei kümaleia püetbü lem hoba tokai ajinbü wentek lem chalou nyetnyet noukei.

¹⁸Hobaje Samuel thuseibou chalou ka Israela kho tegübüje lem lian achüh, ayingsi Josiaei noubü phatko Israelbü Choba cheei ongkei püetbü lem ungshedbou shuong, Levi shuong, Jihuda, hoba Israel pendou, hoba Jerusalema kiteibü shuong yoa lian achüh.

¹⁹Josiaei songdakbü po anthük setboubüa kho püetbü lem likei.

²⁰Kho pendou phaia, ladang Josiaei lembü chem yeikei, Ijepbü Choba Neko Karkhemish khulimbo wapyola Eufrates aeto angkei, hoba Josiaei hao khulimbo haukei.

²¹Lausikei haoei hao jungto youkobü hautiko laukei, “No Jihudabü Choba ngei ka to ai kümla? Tat ngo no khulimbo loubü aying, lausikei laobou phang yoa ngo wapyoda kho khulimbo ki; hoba Mühghaüei kü to panteiashi dogo kü la sakkua, Mühghaü ao kü yoa ki haoei no mautisi amaibüla hao khulimbo aloko nangashi.”

²²Khei yingsikei Josiaei hao ka thenyek asepei lausikei hao to wapyola shanga hao lolo hukoshepbo kümbei, hoba Mühghaüeibü sembung ka loubü Nekoeibü ngüh shuong kho adit, hoba Megidddo pholia wapyola loukei.

²³Lau jungbüei Josia Choba to kipbei; hoba Chobaei haoeibü sambü shuong to laukei, “Ngo yaüenashi, aieilausi ngo maiko leilua.”

²⁴Hibü haoeibü sambü shuongei hao haoeibü kailong ka tonenkei, hoba haoeibü kailong nyiboubüa phokukei, hoba Jerusalem to hao sungbakei hoba hao haikei, hoba bousi shuongeibü heea hao khünkei. Hobaje Jihuda si Jerusalembü pendouei Josia shanga mang haapbei.

²⁵Hobaje Jeremiaei Josia shanga mang haapbei; hoba chia laubü bousu si yaksa shuong pendouei tat sühko Josia shanga maang waangko lauyoda hoba haoenei ho Israela habü ho songle ngühkhüm che yeitikei, hoba chühashi, khübü kho ügütü lea doan kia.

²⁶Tou Josiaeibü joubü kümsilei kho khangbü hoba shembü hoba haoeibü kümsilei maibü shuong kho BUNYUBOUeibü ngühkhüma doan kibü tegütham;

²⁷chühashi, khübü kho Israel si Jihudabü Choba shuongeibü lea doan kia.