Read Chang Naga 2 LÜNGBÜDOBÜ 36 Bible Online

2 LÜNGBÜDOBÜ 36 - Chang Naga bible

2 LÜNGBÜDOBÜ 36

¹Kheijinei kaonyek kabü mütliei Josiaeibü shou Je- hoahaz haobou jeila Jerusalema Choba yeitikei.

²Jehoahazei songdakla khangjinei hao po saoto sem kikei; hoba haoei Jerusalema lit sem songdakkei,

³Hobaje Ijepbü Chobaei hao kho Jerusalem ka kakan apbei, hoba chandinam seret khujin bang atbü saongao hoba hon seret khujin bang atbü kayang hikei.

⁴Hobaje Ijepbü Chobaei haoeibü na Eliakim Jihuda hoba Jerusalem thüka Choba yeitikei, hoba haoeibü nyen Jehoiakim dogo jeitikei, hoba Nekoei haoeibü jai Jehoahaz sungkei hoba Ijep to hao leian haukei.

⁵Jehoiakim songdakla khangjinei po saoto ngao kikei, hoba haoei Jerusalema po anthüknyi songdakkei, hoba haoei BUNYUBOU haoeibü Mühghaü thedanga ai amai kho kümbei.

⁶Hao khulimbo Babilonbü Choba Nebukhadnezzar angkei, hoba Babilon to haula hao namlühei khühkei.

⁷Nebukhadne- zzarei tokei BUNYUBOUeibü chem ka thungsiphau shuong Babilon to sunglangkei, hoba khübü kho haoeibü Choba chema phokei.

⁸Tou Jehoiakimeibü joubü kümsilei kho hoba haoei kümbü mangsenlabü shuong kho hoba laobou ong hao to chühenkei, chühashi, khübü kho Israelbü si Jihudabü Choba shuong lea doan kia; Jehoiakimei hao jeila songdakkei.

⁹Johoiakhin hao songdakla khangjinei po anthükset kikei, hoba haoei Jerusalema lit sem chalou an songdakkei hoba BUNYUBOU thedanga ai amai kho kümbei.

¹⁰Nyibou poa longeijinei Nebukhadnezzar Chobaei BUNYUBOUeibü chema kibü namsek thungsiphau shuong yoan haoei Babilon to sunglangkei, hoba haoeibü na Zedekia Jihuda si Jerusalem thüka Choba yeitikei.

¹¹Zedekia songdakla khangjinei po saoto che kikei, hoba haoei Jerusalema po anthük che songdakkei,

¹²hoba BUNYUBOU haoeibü Mühghaü thedanga ai amai kho kümbei; Jeremia aoei BUNYUBOUeibü sembung ka joyokei hao thedanga eaaoa ayei.

¹³Hobaje haoei Nebukhadnez- zar, aoei hao la Mühghaü nyena theyolanyotikei, hao khulimbo lokei. BUNYUBOU Israel Mühghaü khulimbo hao tukeisekkei hoba haoeibü maangpon kaangkei.

¹⁴Leiyeibü ungshedbou hoba müt pendouei kho tegü yongko maang akuko phang shuongeibü mangsenlabü kümsilei phaisembo kikei, hoba BUNYUBOUeibü chem laobou haoei Jerusalema saüenkei, kho haoenei totnyinkei.

¹⁵Hobaje BUNYUBOU haoeneibü Mühghaüei haoen jungto ngühlang künbü shuong hanghangko hautidang lekei; aieilausi jembü mütli shuong to hoba haoeibü kishang to haoei sanouko kikei;

¹⁶lausikei BUNYUBOU khauang longbü haoen khulimbo along shongko hoba maingaila akiko ayei shongko haoenei Mühghaü ngühlang künbü shuong nyikukei, hoba haoeibü ngüh shuong awealau, hoba haoeibü thuseibü shuong naklepbei.

¹⁷Hibü haoei haoen thükto Khaldiabü Choba leian loukei, haoei haoeneibü heshou shuong haoeneibü saoposhanga inei wapettikei, hoba heshou ayingsi medei, chingbü ayingsi baushi to kei onou alen; haoen pendou haoei haoeibü ik to kukei.

¹⁸Hobaje Mühghaüeibü thungsiphau pendou hanbü yaangbü hoba BUNYUBOUeibü chema kibü nyaksinam hoba Chobaeibü nyaksinam hoba haoeibü yaangbü daneibü nyaksinam pendou haoei Babilon to sunglangkei.

¹⁹Hobaje haoenei BUNYUBOUeibü chema wan sapbei, hoba Jerusalem kümthang leilukukei, hoba Chobaeibü chema kibü pendou wana jikan apbukei, hoba thungsiphau maibüje pendou leilukukei.

²⁰Hobaje aoyou in ka satenkei haoen Babilon to leilangkei; hoba Persia sangle songdak asüh shongko haoen hao hoba haoeibü shousi shuong aaola yeian kikei.

²¹Jeremiaeibü sembung danko BUNYUBOUei laubü ngüh haüthüklabü shanga kaonyekei haoeneibü nousisou anou shongko kho khei kikei. Po anjinlei ontila kaonyek shakkei shakko yeitibü chalou shuong kaonyekei nousisou noukei.

²²Tou Persia Choba Sairas songdak po shaangboua Jeremiaeibü sembungei BUNYUBOUeibü ngüh haüthükla shanga BUNYUBOUei Persiabü Choba Sairas soushoua thungeikei, hibü haoeibü sangle pendoua haoei ngühlang phinkei, hoba dotikei.

²³Persia Choba Sairasei hai lauda, “Khuthükbü Mühghaüei kaodak sangle pendou kü la kua, hoba Jihudaa kibü Jerusalema hao chem che dangkula kü la sakkua. Kan yoa aoyou haoeibü mütli shuong ki, BUNYUBOU haoeibü Mühghaü hao yoa yoshima, hoba hao angashi.”