Read Chang Naga 2 LÜNGBÜDOBÜ 5 Bible Online

2 LÜNGBÜDOBÜ 5 - Chang Naga bible

2 LÜNGBÜDOBÜ 5

¹Ladang Solomonei BUNYUBOUeibü chem khümbo wantikei, haobou Dawidei saüenan phobü peisilei shuong yoshaikei, hoba chandinam, hon hoba Mühghaüeibü chema chaksiam pendou küpjeman phokei.

²Hobaje Dawid sangnyu laobou Zion ki, khoka BUNYUBOUeibü Saopobü Busen jungan angla shanga Israelbü jaishou shuong hoba chung kongnyu shuong pendou Israelbü leiyeibü shuong Solomonei yoshaitikei.

³Hobaje Israelbü pendou nyetboubü lema Choba thedanga kamshaikei.

⁴Ladang Israelbü jaishou shuong pendou loukei, kheijinei Levi shuongei Saopobü Busen kho sungbakei.

⁵Hobaje neichema kibü Saopobü Busen kamshang neichem, hoba saopobü chaksiam pendou haoenei jungan angkei, hoba khübü kho Levi ungshedbou shuongei jungan angkei.

⁶Hobaje Solomon Choba hoba hao jungto yoshaibü Israelbü danei Saopobü Busen thedanga sanlon hoba masu pongsu lembü juong aweenko haitian lembü kukei.

⁷Hibü ungshedbou shuongei BUNYUBOU to theyolanyobü Saopobü Busen kho kho kishang chem maangkabou Saopobü shemjang kaakyembü kherabim kaakphang to sungbakei.

⁸Aishanga kaakyembü kherabimei haoeneibü kaak shuong kho Saopobü Busen kishang thükae pinan Saopobü Busen hoba khoeibü kaang küplepbei.

⁹Hobaje kaang shuong kho yongko louan kisije kaang thonbü ae khoje lembüchem maangkabou thedang Saoposhang ka hapbo kikei, lausikei khübü kho khong ka hapla athük, hoba tat sühko khübü kho khünei kia.

¹⁰Laangdak penyi laobou Mosaei Horeba phokei khoto limbo Saopobü Busen khonei ai akitei; khünei BUNYUBOUei Israelbü shu- ong yoa haoen Ijep ka longjinei theyolanyobü che kümbei.

¹¹Ladang ungshedbou shuong Saoposhang ka longkei, (aieilausi yoan kibü ungshedbou pendou haoen lolo saüenan kikei, hoba haoen janyinbü akitei;

¹²tokei Levi shuong aoyou chia laubü shuong kikei, haoen pendou khei Asaf, Heman, Jeduthun hoba haoeneibü shousi shuong hoba haoeneibü jaisinasi shuong neisimei maibü lean pithung kongkin jungan lemshang chaangbou thon thona lokei hoba haoen yoa ungshedbou saongaoto saoche teklaang metko kikei.)

¹³Ladang teklaang metbü shuong hoba chia laubü shuong BUNYUBOU nyensang hoba olinbü lenbüa ngühlang che ong tegü kikei, hoba ladang haoenei teklaang hoba pithung hoba chia kongkin shuongei haoeneibü langh longtikei, hoba BUNYUBOU nyen sangko laukei, “Aieilausi hao maibü ki; aieilausi haoeibü üeisanou ponpen kida.” Kheijinei chem kho, khei BUNYUBOUeibü chem kho, sangmeiei shenkei.

¹⁴Hibü sangmei kibü khoei ungshedbou shuongei khangenla athüken; aieilausi BUNYUBOU soneikangbüei Mühghaüeibü chem kho shenkei.