Read Chang Naga 2 LÜNGBÜDOBÜ 7 Bible Online

2 LÜNGBÜDOBÜ 7 - Chang Naga bible

2 LÜNGBÜDOBÜ 7

¹Tou ladang Solomoneibü welau thonkei, khuthük ka wan louyenkei hoba juokbü lembü hoba haitibü lembü shuong kho lonshembei, kheijinei BUNYUBOU soneikangbüei lembüchem shenkei.

²Hobaje ungshedbou shuongei BUNYUBOUeibü chem to üeten, aieilausi BUNYUBOU soneikangbüei BUNYUBOUeibü chem shenkei.

³Hobaje Israel shousi shuong pendouei wan louyenjinei chühko kikei, hoba haoen lolo haoeneibü thenyek shon thüka khüpetkei, hoba lembei, hoba BUNYUBOU to olinbü lenko laukei, “Aishanga hao maibü ki, aieilausi haoeibü üeisanou ponpen kida.”

⁴Kheijinei Choba hoba müt pendouei BUNYUBOU thedanga haitibü lembü kukei.

⁵Hobaje Solomon Chobaei masu pongsu hajar saotonyi hoba sanlon hajar sao ngaoto saoche lembü kukei. Kho tegü Choba hoba müt pendouei Mühghaüeibü chem saüenkei.

⁶Hobaje ungshedbou shuong haoen lulueibü kümaleia lekei. Levibü shuongei BUNYUBOUeibü chia kongkin shuong, laobou Dawid Chobaei BUNYUBOU la olinbü lenla shanga kümbei, aieilausi haoeibü üeisanou pon- pen kida, haoeneibü kümsileiei nyensang kukei; haoen thedanga ungshedbou shuongei teklaang metkei, hoba Israelbü pendou lokei.

⁷Hobaje BUNYUBOUeibü chem thedanga jenyu kabü chemso kho Solomonei saüenkei; aieilausi haoei khünei juokbü lembü, hoba sangmai lembü haabüei lembei; aieilausi chisaknam lemshon laobou Solomonei kümbei khoei juokbü lembü, hoba shausiyung lembü hoba haabü kho ashembo kikei.

⁸Kho jih Solomonei lem kho chalou nyetnyet likei, hoba Israelbü pendou hao yoa aeibou tan yaangbü che, Hamat to haubü lamnyu ka Ijepbü shushou sühko kikei.

⁹Hobaje setbounyet haoenei thangyen che kambei, aieilausi lemshang saüenbü chalou nyet hoba lem chalou nyet haoenei noukei.

¹⁰Hobaje lit nyetboubü chalou saoto semboua haoei mütshuong kho haoeneibü neichem lambo hautikei, hoba Dawid to hoba Solomon to hoba hao mütli to BUNYUBOUei maibü shanga olinyokei, hoba maangpon olinbüei hautikei.

¹¹Kho tegü Solomonei BUNYUBOUeibü chem hoba Chobaeibü chem kho yeikei; BUNYUBOUeibü chema hoba haoeibü chema Solomonei kümla takbüsanbü pendou haoei thük hapbo kümbei.

¹²Kheijinei BUNYUBOU nangnak Solomon jungto longkei hoba laukei, “Ngei kaibü welau dida, hoba kishang ho kü shanga lembüsabü lembü chem che kilabü.

¹³Lang aloutila ngei müh khinan apalonga, ayingsi kü mütli yoa ngei shatlim hautialonga,

¹⁴ngeibü mütli aoyou kü nyena ngaan ki haoen lolo semboambo laualonga hoba welaualonga hoba kü the lamalonga hoba haoeneibü lamnyu amaibü ka sepeialonga kheijinei ngei khuthük ka ditlabü hoba haoeneibü shedbü apbulabü, hoba haoeneibü kaodak maitilabü.

¹⁵Tou hanei welaubü jungto ngeibü nyek hautilabü, hoba ngeibü nou haangkulabü.

¹⁶Aieilausi tou ho chem, ngeibü nyen khünei ponpen kila shanga ngei pienkei hoba saüenkei; hoba ngeibü nyek hoba ngeibü maang- pon ponpen khünei kilabü.

¹⁷Hobaje ka shangaje kabou Dawidei kümbü tegü nyi kü thedanga paiko laualonga, hoba ka la sakkubü tegü pendou nyi kümbo laualonga hoba ngei sakkubü ngühkhüm hoba ngeibü matjem shuong jungeikho laualonga,

¹⁸kheijinei kabou Dawid to theyolanyobü Israela songdakla ka shanga müt che ongkei akikoje akilabü dogo laubü tegü ngei kaibü sangle yaüenkulabü.

¹⁹Lausikei kanei sepeinyu ngaialonga, hoba ngeibü takletbü ngühkhüm hoba ngeibü sakkubü shuong laobou ngei kan thedanga phokukei, kho apyoan lubü mühghaü shuong khangenkho hoba lembho laualonga;

²⁰kheijinei ngei haoen la kubü kaodak ka li yoan pheian aplabü; hoba ho chem laobou kü nyen shanga ngei saüenko yeitikei, ngei kü the ka tekan aplabü, hoba müt pendou yoa kho ngei amaaphelabü hoba tetlatalabü che yeitilabü.

²¹“Hobaje ho chem laobou aeibou tonenan ki kho to, ‘Aila BUNYUBOUei ho kao hoba hao chem to hai kümbei?’

²²Hobaje haoenei jongailabü, ‘Aieilausi haoenei jembü pisibou Mühghaü, aoei haoen Ijep ka leiyenkei hao inletkei, hoba lubü mühghaü shuong to ikphen lambei hoba haoen to lembei; hibü khei yingbü khoei haoei haoen thükto khonsak ho pendou loutikei.’ ”