Read Chang Naga 2 LÜNGBÜDOBÜ 8 Bible Online

2 LÜNGBÜDOBÜ 8 - Chang Naga bible

2 LÜNGBÜDOBÜ 8

¹Po saoche thonlama laoboua Solomonei BUNYUBOUeibü chem hoba haoeibü dangkei,

²Huramei hao la kuan kibü sangnyu shuong Solomonei kümetkei, hoba Israel mütli khünei kitikei.

³Hobaje Solomon Hamath si Zoba to haukei hoba kho thükkei.

⁴yamlamanga haoei Tadmor kümbei hoba Hamatha thanshang sangnyu shuong haoei kümbei.

⁵Haoei tokei Beth Horon sangkhu hoba Beth Horon sangyou kümbei, kümthang, bakhün hoba thangtetlabüei sangnyu shuong lelepan phokei.

⁶Hobaje Baalath si Solomonei dangbü thanshang pendou hoba haoeibü kailong shuong shanga sangnyu pendou koli sepai shuong shanga sangnyu shuong hoba Jerusalema hoba Lebanona, hoba haoeibü sangle pendoua ai ong Solomonei mangsühkei kho kümbei.

⁷Hitbü, Amorbü, Perizbü hoba Hivbü hoba Jebusbü jouan kibü shuong, aoyou Israelbü aying,

⁸haoen phainei kaonyeka apyoan kibü haoeneibü shousi shuong, aoyou Israel shousi shuongei amauti haoen ka Solomonei kayang lekei, hoba kho tegü tat sühko kia.

⁹Lausikei Israelbü shousi shuong kaje Solomonei haoeibü kümsilei shanga sambüla ayeiti; lausikei haoen wapyobü shuong hoba haoeibü lajamleibou yoa kongnyu hoba haoeneibü kailong hoba haoeneibü koli sepai thüka songdakbü shuong kikei.

¹⁰Hobaje habü ho Solomon Chobaeibü khusabü saoanto anjinsem konglebü shuongei mütshuong thüka songdakkei.

¹¹Hobaje Solomonei Faraoeibü nouyangnyu Dawid sangnyu ka haoei sao shanga dangkubü chem to leian angkei, aieilausi haoei laukei, “Ngeibü yak Israel Choba Dawideibü chema akilabü, aieilausi BUNYUBOUeibü Saopobü Busen louan kibü khüneije Saopobü kia.”

¹²Kheijinei Solomonei BUNYUBOU lemshang laobou haoei chemsophang thedanga kümbei khünei juokbü lembü BUNYUBOU la kukei.

¹³Chalou angboua kümla khambü tegütham, Mosaei sakkubü tegü Nounyet, lit haanbü hoba po weko lem sem, tokai ajinbü wentek lem, bale lem, hoba lemshang neichem lem.

¹⁴Haobou Dawideibü song ngühkhüm tegütham, haoeneibü kümsilei shanga ungshedbou shuong janyinbü, hoba chalou angboua kümla khambü kibü tegü Levi ungshedbou shuong thedanga nyensangla hoba khangenlabü kümsilei shanga, hoba bakhün shanga bakhün lombü shuong haoen janyinbüa pienkei, aieilausi Mühghaü müt Dawidei kho tegü sakkukei.

¹⁵Hobaje ajanjan pendou shanga hoba thanbü shuong shanga Chobaei ungshedbou si Levi shuong la ai sakkukei, kho ka haoen sukjung angai.

¹⁶BUNYUBOUeibü chem huongbü chalou ka kho ayei shongko, Solomoneibü kümsilei pendou kho hai yeikei. Kho tegü BUNYUBOUeibü chem yeikei.

¹⁷Kheijinei Edom kaonyeka yungkoa Eziongeber si Elath to Solomon haukei.

¹⁸Hobaje Hu- rama hao jungto hao khangenbü shuong danko jahaz shuong hoba yungnyu shanga ngebü khangenbü shuong hautikei, hoba Solomon khangenbü shuong yoa liko haoen Ofiri to haukei, hoba haka hon khujin bang atbü saongao lei to anjinsem sungbakei hoba Solomon Choba jungto kho sungbakei.