Read Chang Naga 2 LÜNGBÜDOBÜ 9 Bible Online

2 LÜNGBÜDOBÜ 9 - Chang Naga bible

2 LÜNGBÜDOBÜ 9

¹Hobaje ladang Sheba Chobasaoei Solomoneibü nyensang shangabü ditkei, phebü sekbüei Jerusalema Solomon takteila shanga shuong yaangbü leian ponlem hibü künbü ut shuong hoba hon juong hoba namseklaang künan sao loukei; hoba ladang sao Solomon jungto loukei, saoei hao to saoeibü maangpona kibü pendou lenyokei.

²Hobaje Solomonei saoei phebü pendou sao la lenkei; hoba Solomon ka haoei sao la alenbü aikei huan akitei.

³Hobaje ladang Sheba Chobasaoei Solomoneibü songsihon hoba haoei dangan kibü chem,

⁴hoba haoei shaushang yungshang khümsok, hoba haoeibü sambü shuong setbü hoba haoeibü khangenbü shuong hoba haoeneibü neisimei, hoba tokei haoeibü thung jungbü shuong, hoba haoeneibü neisimei; hoba BUNYUBOU chem to hao lai angda kho hapjinei touje saoeibü maanga laulabü ai akitei.

⁵Hobaje saoei Choba to laukei, “Kün kaodaka kaibü kümsilei shuong hoba kaibü songsihon shangabü ngei ditbü ngühlang maimaitham kikei.

⁶Kho ngeibü nyekei ühüp shongko ngei maialem; hoba kaibü songsihon yaangbü kho kü la jamde ongkei alenko kikei; aieilausi ngei ditbü nyensang tokei no limakei.

⁷Kaibü mütli shuong olinlabü, hoba no khangenbü habü olinlabü, aoyouei ka thedanga athakko loda, hoba kaibü songsihon ditda:

⁸BUNYUBOU kaibü Mühghaü haübou yingshi, aoyouei BUNYUBOU kaibü Mühghaü shanga Choba yeila haoeibü Choba setshanga no setitikei ka to olinko kikei; aieilausi kaibü Mühghaüei Israel to sanoukei, haoen ponpen shanga phokulabü, khei yingsikei haoei no haoen thüka mat jemla hoba ngühmai kümla Choba yeitilabü.”

⁹Hobaje saoei Choba la hon seret khujin bang atbü saongaoto saoche, hoba ponlem hibü hoba namseklaang kukei, hoba tokei Sheba Choba saoei Solomon Choba la ponlem hibü kubü tegü aineikei akitei.

¹⁰(Hobaje tokei, Hiram khangenbü shuong hoba Solomoneibü khangenbü shuong aoyouei Ofir ka hon jungan loukei, algum bu hoba namseklaang shuong jungan loukei.

¹¹Hobaje Chobaei algum buei BUNYUBOU chem hoba Chobaeibü chem shanga lin kümbo younak kümbei, hoba chia laubü shuong shanga kongkin, tokjin, pithung shuong kümbei; hoba Jihuda kaodaka shangied khübü kho aijihdangakei hapan achüh.)

¹²Hobaje Solomon Chobaei Sheba Chobasao la saoei maikubü pendou, saoei ai ong phekei, saoei Choba jungto jungan loubü to liman kukei. Hibü sao ngaikei hoba sao hoba saoeibü khangenbü shuong saoeibü kaodak to ngaikei.

¹³Tou po weko Solomon jungto loubü hon seret khujin bang atbü saongao lakto saosemto lak kikei;

¹⁴kho namyak namseibü hoba khüm hebü ayoko kikei, hoba Arabiabü Choba pendouei hoba kaonyek kabü governor shuongei Solomon jungto hon hoba chandinam sungbakukei.

¹⁵Hobaje Solomon Chobaei honei yaübü aih wekoa hon shekel saongao lak jinan kümbei.

¹⁶Hobaje haoei honei yaübü aih saongao sem kümbei; aih wekoa hon shekel saongao sembang lekei; hoba Choba Lebanon yamlamang chema khübü kho phokei.

¹⁷Chobaei tokei thunyu hau- hei Chobaeibü setshang yaangbü che kümbei, hoba kho hon lanbüei jonlepbei.

¹⁸Chobaeibü setshang kho younak lak kikei hoba younakshang che honei kümbei, laobou Choba setshanga sapyoan kikei, hoba jijihama ik denshang hoba molosaonyu penyi ik denshang nyangko loan kikei.

¹⁹Hobaje younak lak thüka khünei younak che che thon wekoa molosaonyu anthüknyi loan kikei; hoba aijihdangakei Choba sanglea kho phatko akitei.

²⁰Hobaje Solomon Chobaei yungbü thung pendou hon kikei, hoba Lebanon yamlamang chem kabü thungsiphau pendou hon lanbü kikei; Solomon haangaje chandinam kho aikei weko akitei.

²¹Aishanga Choba kho Hirameibü khangenbü shuong yoa Tarshish to haubü longchem shuong kikei, po semboubü weko che Tarshishbü longchem shuong hon, chandinam, thunyu hauh, meisu, hoba püngau sungbakei.

²²Hibü nyakanama, songahona Solomon Choba kaodak Choba pendou to thükkabou kikei.

²³Hobaje kaodakbü Choba pendou Solomon jungto haoeibü maang- pona Mühghaüei jinkubü songsihon ditan chühla lamjung loukei.

²⁴Hobaje haoen mütpem wekoei jembü jongsak chandinam thung, phau, hon thung, neisimei, insia- ubu, ponlem hibü, koli hoba gadu po weko khüjobang sungbakei.

²⁵Hobaje koli si kailong shuong shanga Solomoneibü chem hajar lei, hoba koli sepai hajar anthüknyi, haoen kho haoeibü kailong sangnyu shuonga hoba Jerusalema Choba yoa kitikei.

²⁶Hobaje haoei Choba pendou thüka Eufrates ka Filistia kaonyek sühko songdakkei.

²⁷Hobaje Chobaei Jerusalema chandinam kho laang tegü hoba cedar bu kho Shefela bhuklong tegü apsileko yeitikei.

²⁸Hobaje Solomon shanga Ijep ka hoba kaonyek pendou ka koli sungbakei.

²⁹Tou Solomoneibü joubü kümsilei khangbü ka thon sühko thuseibou Nathaneibü ngühlia, hoba Shilonbü Ahijaeibü tetenbüa hoba Nebateibü shou Jeroboam shanga hapbou Iddoeibü mangsanga doan aki lo?

³⁰Solomonei Israelbü pendou thüka po saonyi songdakkei.

³¹Hobaje Solomon bousi shuong yoa yepbei, hoba haobou Dawid sangnyua khünkei; hoba haoeibü shou Rehoboamei hao jeiko songdakkei.