Read Chang Naga EZRA 1 Bible Online

EZRA 1 - Chang Naga bible

EZRA 1

¹Persia Choba Sairas shaangboubü poa Jeremiaeibü sembung danko BUNYUBOUeibü ngüh haüthüktila BUNYUBOUei Persia Choba Sairaseibü soushou thungeisi haoei haoeibü Choba sangle pendou aenei phinthonbü che lamlekei hoba kho dotikei.

²“Persia Choba Sairasei hai lauda, BUNYUBOU khuthükbü Mühghaüei kü la kaodak Choba sangle pendou kuan kia hoba haoei Jihudaa kibü Jerusalema hao la chem che dangkula kü la sakkukei.

³Kan pendou yoa aoyou haoeibü mütli ki, haoeibü Mühghaü hao yoa yoshi, hoba hao Jihudaa kibü Jerusalem to angshi, hoba BUNYUBOU Israel Mühghaüeibü chem kümettiashi. (Jerusalema kibü Mühghaü kho hao ki.)

⁴Hobaje aoyou ainei ong ki Mühghaüeibü chem shanga maang angbü lembü kubü to liman, lubü kishanga kibü mütshuongei chandinam hoba hon peisilei hoba meisiauei thuiyoashi.”

⁵Kheijinei Jihuda si Benjamin chung jaishou shuong, ungshedbou shuong, hoba Levibü shuong, khei aoyou Jerusalema kibü BUNYUBOUeibü chem kümetla angla Mühghaüei thungeiko kikei, haoen meimeikei.

⁶Hobaje haoen nyangko aoyou kikei, khei maang angko lembü kubü pendou to liman haoenei chandinam chakei, honei, meisiauei hoba namsek peisileiei haoen to thuikei.

⁷Hobaje tokei BUNYUBOUeibü chema chaksiam shuong laobou Nebukhadnezzarei Jerusalem ka sunglangkei, hoba haoeibü mühghaü chema phoan kikei, khübü kho Sairas Chobaei sungenkei.

⁸Khübü kho Persia Choba Sairasei namthanbou Mithredateibü ikei sungjung longkei hoba khübü kho Jihudabü konglebou Sheshbazar la wean kukei.

⁹Hobaje khübü wean chühbü kho ho: honeibü phau 30 chandinam phau 1000 inshou 27

¹⁰honeibü kamphau 30 chandinam kamphau 410 hoba lubü thungsiphau 1000

¹¹Hon si chandinam thungsiphau pendouei hajar ngaoto saongao lei. Khübü pendou kho Sheshbazarei langsenbü shuong Babilon ka Jerusalem to leibajinei sungbakei.