Read Chang Naga EZRA 3 Bible Online

EZRA 3 - Chang Naga bible

EZRA 3

¹Tou ladang lit nyibou loukei, hoba Israelbü sangnyu shuonga kikei, mütshuongei haoen lolo müt che maimai Jerusalem to yoshaikei.

²Kheijinei Jozadakeibü shou Jeshua hoba haoeibü jaisina ungshedbou shuong hoba Shealtieleibü shou Zerubbabel hoba haoeibü jaisina shuong lokei, hoba Mühghaü müt Mosa ngühkhüma doan kibü tegü haoenei Israel Mühghaüeibü lemshang kho dangngaikei hoba kho thüka juokbü lembü lemla shanga kümbei.

³Haoenei lemshang kho, kho phoshanga phokei, aieilausi kaonyeka kibü shuong shanga haoen thüka hatlamoklabü kikei, hoba kho thüka haoenei juokbü lembü kukei.

⁴Hobaje doan kibü tegütham haoenei dip lem likei, hoba songle ngühkhüm tegütham lühbakei chalou weko juokbü lembü, chalou angboua khambü thüng lembei.

⁵Hobaje kho phaia athakko juokbü lembü hoba janenan kibü BUNYUBOU la khümbo kubü lemsilang shuong hoba mütpem weko aoyouei maangangbü lembü lemla kubü haoenei jungeikei.

⁶Lit nyetboubü shaangbou nyet ka haoenei BUNYUBOU la juokbü lembü lemla kula khangkei, lausikei BUNYUBOU lemshang chem chemshangje tokei ayaüenko kikei.

⁷Haoenei tokei laangeibü mistri la hoba bueibü mistri la nam kukei, hoba shausiyung hoba yunglabü onang, Sidonbü la hoba Tairbü la Lebanona cedar bu yungnyu to Joppa aeto Persiabü Choba Sairas haoenei sakkubü hapbü tegü sungbala shanga kukei.

⁸Tou Jerusalema Mühghaü chem to haoen loubü nyibou poa lit nyiboubüa Shealtieleibü shou Zerubbabel hoba Jozadakeibü shou Jeshua hoba Levi shuong, hoba langsenbü ka Jerusalem to longbü pendouei khangkei, hoba BUNYUBOUeibü chem kümsilei chühla shanga Levi shuong po saoche ka thükae haoenei pienkei.

⁹Kheijinei Mühghaüeibü chema kümbüleibü shuong to chühla Jeshua hoba haoeibü shousi shuong hoba jaisinasi shuong Kadmiel hoba haoeibü shousi shuong, Jihudaeibü shousi shuong to liko lokei; Henadakeibü shousi shuong, haoeneibü jaisina Levi shuong yoan lokei.

¹⁰Hobaje chemdangbü shuongei BUNYUBOUeibü chem khünei chemshang yaükei, ungshedbou shuong lulueibü neisimei lean teklaang jungtikei hoba Asafeibü shousi, Levibü shuong, Israel Choba Dawidei sakkubü tegü BUNYUBOU sangtila pithung jungtikei.

¹¹Hobaje haoenei nyensang kubü jongaiyoko BUNYUBOU la nyensang kuko hoba olinbü lenko laukei, “Aieilausi hao maibü ki, aishanga Israel aenei haoeibü üeisanou ponpen kida.” Hobaje ladang haoenei BUNYUBOU nyen sangkei, müt pendouei ngüh yaangbüei ngekkei; aishanga BUNYUBOUeibü chem chemshang yaüenan kikei.

¹²Lausikei ungshedbou shuong hoba Levibü shuong hoba püshi chung kongnyubou hoba jaishou shuong shaangla dangbü chem hapbü shuongei haoen thedanga kho chem chemshang yaübü hapan ngüh yaang longko haapbei, hoba juongei olinbüei ngekkei.

¹³Hibü mütshuongei haapbü si olinbü ngekbü shangashen, aieilausi mütshuongei ngüh yaangbüei ngekkei, hoba ngüh kho saabü ka ditko kikei.