Read Chang Naga EZRA 4 Bible Online

EZRA 4 - Chang Naga bible

EZRA 4

¹Tou ladang Jihuda si Benjamin lothetbü shuongei BUNYUBOU Israel Mühghaü la lembü chem che langsenbü shuongei dangkua dogo ditkei,

²kheijinei haoenei Zerubbabel jungto hoba püshi yoa khuleibü shuong jungto nyangko loukei, hoba haoen to laukei, “Künei kan yoa dangyokho; aieilausi kanei tegü künei kaneibü Mühghaü lamda; hoba küneikei Assiriabü Choba Esarhaddon, aoei kün hato leian loukei, kho chalou ka hao la künei haitibü lembü kuda.”

³Lausikei Jerubbabel si Jeshua hoba joubü Israelbü püshi khuleibü shuongei haoen to laukei, “Küneibü Mühghaü la chem che dangkula kün yoa kan ai khaman aki, lausikei Persia Choba Sairasei kün la sakkubü tegü künei lolo ong BUNYUBOU Israel Mühghaü la dangkulabü.”

⁴Kheijinei kaonyeka kibü shuongei Jihudabü shuong hau thettikei, hoba chem dangla haoen hatentikei,

⁵hoba haoeneibü lamthen lusaktikula haoen khulimbo ngühkhüm ngebü shuong jekthetkei, hoba Persia Choba Sairas songdak sünga, khei Dairas songdak sühko kipjim kukei.

⁶Ahasuerasei songdakjinei, haoei songdak khangjinei haoenei Ji- huda si Jerusalema kibü shuong khulimbo shetbü kuko dokei.

⁷Hobaje Artazerkzes haanga Bishlam hoba Mithredat hoba Tabed hoba joubü haoeneibü himshuongei Persia Choba Artazerkzes jungto dokei, le kho Aramaik ngüha dokei hoba kho sepeikei.

⁸Sepai lajamleibou Rehum si dobou Shimshaiei Jerusalem khulimbo Artazerkzes Choba jungto hai dokei;

⁹Kheijinei sepai lajam leibou Rehum si Shimshai dobou hoba haoeneibü jenabou shuongei dokei. Dinabü hoba Afarsatbü, Tarbetbü, Afarsibü, Arkhevibü, Babilonbü, hoba Elambü,

¹⁰hoba joubü phangshuong aoyou yaangenbü hoba hangenbü Osnappar to leian loukei, hoba Samaria sangnyua apyokei, hoba shumang danan kibü joubü kaonyeka hoba kho tegü,

¹¹Hobaje kho le kho haoenei Artazerkzes Choba jungto hautikei, “Shumang danan kibü kaodaka kibü no khangenbü shuongei ka jungto salem hautida.

¹²Ka jungka longbü Jihudabü kün jungto Jerusalem to louan kia dogo Chobaei ngeshima; haoenei khüpyobü hoba amaibü sangnyu kümda, hoba kümthang yeia, hoba chemshang kümetda.

¹³Chobaei ho ngeshima, khei ho sangnyu kümalonga hoba kümthang shuong yeialonga, haoenei khümnam ayingsi lotnam akulabü, hoba thonlamaje hoei Choba shuongeibü khümnam thushed la yeitikulabü.

¹⁴Tou künei Chobaeibü jem shauda buba, Chobaeibü himou chühko setla kün shanga janbü ayingsije, kho künei hautia hoba Choba la aukabü kuda.

¹⁵Khei kabou habüeibü lea dobü lamyola shanga doan phobü le khünei nyi ho sangnyu ho khüpyobü sangnyu Choba shuong hoba provins shanga amai, hoba shangieda ho sangnyua haoenei kaonyek khulimbo longkei dogo ngelabü, kho haangjung ho sangnyu leiluan aptikei.

¹⁶Ho sangnyu kümalonga hoba kümthang kümalonga, kho tetlabü shumang dananje no phejan akilabü dogo Choba la künei aukabü kuda.”

¹⁷Kheijinei Chobaei jongaibü le hautikei, “Sepai lajamleibou Rehum hoba dobou Shimshai jungto hoba joubü haoeneibü jenabou Samariaa kibü jungto hoba shumang danan kibü joubü kaonyek jungto salem.

¹⁸“Laobou le kanei kün jungto hautikei, kü thedanga shangashatko wea.

¹⁹Hobaje ngei ngühkhüm che kukei, hoba laman chüha hoba ho sangnyu shangied ka thama Choba shuong khulimbo longkei, hoba khüpyobü hoba kaonyek khulimbo hanei longkei dogo hapena.

²⁰Shumang danan kibü kaonyek pendou thüka Jerusalem songdakbü Choba yaangbü shuong kikei, hoba haoen la khüm hebütakbü nam kuko kikei.

²¹Ngei ngühkhüm che aküm shongko ho sangnyu akümla kanei habü mütshuong nangteila ngühkhüm kuashi.

²²Hobaje khünei kan nyibutham teki, hoba aila Choba konglabü lele leilubü longtila?”

²³Ladang Artaxerkzes Chobaei dobü Rehum si Shimshai thedanga hoba haoeneibü himshuong la wean lenkei, panteiko haoenei Jerusalem to Jihudabü jungto haukei hoba haoen maangshat lamlam nangtikei.

²⁴Kheijinei Jerusalema Mühghaüeibü chema kümboleiko kibü kho Persia Choba Dairas songdakbü po nyiboubü asühshongko nangan phokei.