Read Chang Naga EZRA 5 Bible Online

EZRA 5 - Chang Naga bible

EZRA 5

¹Tou thuseibü shuong Hagai si Zekharia Iddoeibü shi, Israel Mühghaü ao haoen thüka kikei hao nyena Jihuda si Jerusalema kibü Jihudabü to tetenko joyokei.

²Kheijinei Shieltieleibü shou Zerubabel, hoba Jozadakeibü shou Jeshaua meimeikei hoba Jerusalema kibü Mühghaüeibü lembüchem dangngaila khangkei, hoba Mühghaüeibü thuseibou müt nyi hamei haoen to thuikei.

³Kho jihsiphaia shumang danan kibü provinsa governor Tattenai hoba Shethar-boznai hoba haoeneibü jenabou shuong haoen jungto loukei hoba haoen to hai laukei, “Aoei kan la ho chem dangla hoba kümsemla sakkukei?”

⁴Kheijinei künei haoen to hai jongaikei, “Ho chem dangbü mütshuong nyen ao?”

⁵Lausikei haoeneibü Mühghaüeibü nyek kho Jihudabü jaishou shuong thüka chühko kikei, hoba Dairas jungto ho shangabü asühlang shongko hoba tokei ho shanga leei jongaibü anopmai shongko haoenei haoen anangti.

⁶Shumang danan kibü governor Tattenai hoba Shethar-boznai hoba shumang danan hauan kibü haoeibü jenabou Afarsabü shuongei Dairas Choba jungto hautibü ledo:

⁷Haoenei hao jungto le che hautikei, laonei hai doan kikei; Dairas Choba jungto, pendou sangmai yingshima.

⁸“Ho Chobaei ngeshima khei kün Jihudabü provins hoba Mühghaü yaangbü lembüchem to haukei; laang yaangbüei ho dangda, kümthanga wa jinda hoba kümsilei kho lembo lembo haoeneibü ika thusinaang maiko hauda.

⁹“Khünei künei jaishou shuong to phekei, ‘Aoei kan la ho chem dangla hoba ho kümthang kümsemla ngühkhüm kukei?’

¹⁰Künei haoen to haoeneibü nyen khei haoeneibü leiyeibü shuong nyen künei doan ka la ngetila shanga phekei.”

¹¹Hobaje haoenei kün to hai jongaiko laukei, “Kün müh si kao kümbou Mühghaü khangenbü shuong ki, hoba shangied dangbü chem che laobou Israelbü Choba yaangbü cheei dangkei hoba kümsembei, ho chem nyibou künei kümetda.

¹²Lausikei küneibü pisibouei khuthükbü Mühghaü maangto shattisi haoei Nebukhadnezzar Babilonbü Choba, Khaldibü ik to kukei, haoei ho chem leilukukei, hoba mütshuong Babilon to laplangkei.

¹³Lausikei Babilonbü Choba Sairas shaangboubü poa Sairas Chobaei ho Mühghaüeibü chem dangla ngühkhüm kukei.

¹⁴Hobaje tokei Mühghaüeibü chema hon si chandinam chaksiam shuong laobou Nebukhadnezzarei Jerusalema kibü lembüchem ka sunglangan kikei, hoba Babilon to lemshang to sungbakei khübü chaksiam Sairas Chobaei Babilonbü lembüchem ka sungletkei hoba khübü kho müt cheeibü nyen Sheshbazar la khümbo kukei, aoei hao governor la yeitikei.

¹⁵Hobaje hao to laukei, ‘Habü chaksiam sungjung hauashi, hoba Jerusalema kibü lembüchema phoashi, hoba Mühghaüeibü lembüchem kho shangied kishanga dangshi.’

¹⁶Kheijinei Sheshbazar loukei, hoba Jerusalema kibü Mühghaüeibü chem chemshang imenkei, hoba kho chalou ka tou sühko dangko loukei, hoba toukei kho akümsembei.

¹⁷“Tou khei yingsikei Choba thedanga maialonga Sairas Chobaei Jerusalema ho Mühghaü chem dangla shanga ngühkhüm kümasi aküm, kho Chobaeibü thanshanga lamtiashi, hoba kho shanga Chobaei mangsühbü kün la ngetishima.”